ஏப்ரல் 6-ந்தேதி ஓட்டுப் போட்டுவிட்டு தேர்தலுக்கு முடிவுக்காக சுமார் ஒருமாதம் காத்திருக்கும் தமிழக கிரிக்கெட் ரசிகர்களை, தேர்தலில் யார் ஜெயிப்பா? யார் ஆட்சியமைப்பா? என்பதை பற்றி யோசிக்க விடாமல், Mint-ஐ just ரிலாக்ஸா வைக்கவும், விசில் போடவும் வந்து விட்டது ஐபிஎல் கிரிக்கெட் திருவிழா.
கொரோனா தொற்றால் ஆறு மைதானங்களில் மட்டுமே போட்டி நடைபெறுவதால் சிஎஸ்கே அணிக்கு சேப்பாக்கத்தில் எந்த போட்டியும் இல்லாதது ரசிகர்களுக்கு சற்று வருத்தமே.
சிஎஸ்கே முதல் போட்டியில் டெல்லி கேப்பிட்டல்ஸ் அணியை மும்பை வான்கவே மைதானத்தில் எதிர்கொள்கிறது.
இரு அணிகளும் நேருக்குநேர் மோதியதை வைத்து பார்த்தால் சிஎஸ்கே கையே ஓங்கியிருக்கிறது. 25 முறை மோதியதில் 8 முறை சிஎஸ்கேவுக்கு வெற்றி.
ஆனால் கடந்த சீசனில் பிளே-ஆப்ஸ் சுற்றுக்கு முன்னேற முடியாத பரிதாப நிலைக்கு தள்ளப்பட்டது. டெல்லிக்கு எதிரான 2 போட்டியிலும் சிஎஸ்கே-வுக்கு அடியே விழுந்தது.
Daddy Army -யான சிஎஸ்கேவில் வாட்சன், ஹர்பஜன் சிங், கேதர் ஜாதவ் வெளியேறிவிட்டனர். இதனால் இளைஞர்களுக்கு வாய்ப்பு கிடைக்கலாம்.
கடந்த சீசனில் ருத்துராஜ் கெய்க்வாட் கடைசியாக நடைபெற்ற 3 ஆட்டங்களிலும் அற்புதமான ஆட்டத்தை வெளிப்படுத்தி அரைசதங்கள் விளாசினார். அதனால் அவர் தொடக்க வீரர் இடத்தை கெட்டியாக பிடித்துக் கொள்வார். அவருடன் டு பிளிஸ்சிஸ் தொடக்க வீரராக களம் இறங்குவாரா? அல்லது உத்தப்பா களம் இறங்குவாரா? எனப் பார்க்க வேண்டும். கரெக்ட்-ஆன ஓபனிங் காம்பினேசனோடு முதல் போட்டியில் களம் இறங்க டோனி விரும்புவார்.
சிஎஸ்கேவுக்காக கடந்த சீசனில் 449 ரன்கள் அடித்து முதலிடம் பிடித்த டு பிளிஸ்சிஸ் பேட்டிங், பீல்டிங்கில் அசத்தக்கூடியவர். அம்பதி ராயுடன் அவருக்கு அடுத்த இடத்தில் உள்ளார்.
சின்ன தல ரெய்னா மீண்டும் அணிக்கு திரும்பியது மிகப்பெரிய பலம். மிடில் ஆர்டரின் ஆணி வேர்.
7 கோடி ரூபாய்க்கு ஏலம் எடுக்கப்பட்ட மொயீன் அலி, 9.25 கோடி ரூபாய்க்கு எடுத்த கிருஷ்ணப்பா கவுதமை தல டோனி எவ்வாறு பயன்படுத்துகிறார் என்பதை பார்க்க வேண்டும்.
பேட்டிங்கில் ருத்து ராஜ், உத்தப்பா, அம்பதி ராயுடு, ரெய்னா, எம்எஸ் டோனி, ஜடேஜா ஆகியோர் வலுவாக உள்ளனர்.
ஜடேஜா, கிருஷ்ணப்பா கவுதம், மொயீன் அலி, இம்ரான் தஹிர் சாய் கிஷோர், மிட்செல் சான்ட்னர் என சுழற்பந்து வீச்சாளர்களுக்கும் பஞ்சமில்லை.
தீபக் சாஹர், ஷர்துல் தாகூர், பிராவோ, சாம் கர்ரன் ஆகியோர் உள்ளனர். இந்த நான்கு பேரால் பேட்டிங்கும் செய்ய முடியும். இது சிஎஸ்கே-வுக்கு கூடுதல் பலம்.
டு பிளிஸ்சிஸ், பிராவோ, சாம் கர்ரன், மொயீன் அலி, இம்ரான் தஹிர் ஆகியோரில் எந்த நான்கு பேருடன், எந்த காம்பினேசனோடு தல டோனி களம் இறங்குகிறார் எனப் பார்க்க வேண்டும்.
எப்படியிருந்தாலும் வெற்றியோடு தொடரை தொடங்க வேண்டும் என சிஎஸ்கே களம் இறங்கும் என்பதில் சந்தேகமில்லை.
டெல்லி கேப்பிட்டல்ஸ் கடந்த முறை இறுதிப் போட்டிக்கு முன்னேறிய நம்பிக்கையுடன் களம் இறங்கும். கேப்டன் ஷ்ரேயாஸ் அய்யர் காயத்தால் விளையாடாதது அந்த அணிக்கு பின்னடைவு என்றாலும், சூப்பர் டூப்பர் பாஃர்மில் உள்ள ரிஷப் பண்ட் கேப்டன் பதவியுடன் களம் இறங்குவது அந்த அணிக்கு பலம்.
பிரித்வி ஷா, தவான், ரகானே. ஹெட்மையர், ஸ்டீவ் ஸ்மித், ரகானே, மார்கஸ் ஸ்டோய்னிஸ், ரிஷப் பண்ட் என பேட்டிங் வலுவாக உள்ளது. சுழற்பந்து வீச்சில் அஷ்வின், மிஸ்ரா, அக்சார் பட்டேல் உள்ளனர். கொரோனாவால் பாதிக்கப்பட்டுள்ள அக்சார் முதல் சில போட்டிகளில் விளையாட வாய்ப்பில்லை.
வேகப்பந்து வீச்சில் இஷாந்த் சர்மா, உமேஷ் யாதவ், ரபடா, கிறிஸ் வோக்ஸ், அன்ரிச் நோர்ஜே, டாம் கர்ரன் என சர்வதேச வீரர்களை கொண்டுள்ளது.
கடந்த முறை ரிஷப் காயத்தால் ஒன்றிரண்டு போட்டியில் விளையாட முடியாத நிலை ஏற்பட்டபோது காம்பினேசன் மாறியது. அப்போது ஹெட்மையர் அணியில் இடம் பிடிக்க முடியாமல் போனது. அதுபோன்ற சிக்கல்களை தீர்த்துவிட்டால் டெல்லி கேப்பிட்டல்ஸ் ஏறுமுகத்தில் செல்லும் என்பதில் சந்தேகமில்லை.
போட்டி நடைபெறும் மும்பை வான்கடே மைதானம் சேஸிங் செய்வதற்கு சாதகமாக இருக்கும். இதனால் டாஸ் வெல்லும் அணி முதலில் பந்து வீசும்.
முதலில் பேட்டிங் செய்யும் அணி 190 ரன்களுக்கு மேல் குவித்தால் வெற்றியை எதிர்பார்க்கலாம்.
