சென்னை:
தமிழ்நாடு கிரிக்கெட் சங்கம் (டி.என்.சி.ஏ.) சார்பில் டி.என்.பி.எல். என்று அழைக்கப்படும் தமிழ்நாடு பிரிமியர் லீக் 20 ஓவர் கிரிக்கெட் போட்டி 2016-ம் ஆண்டு அறிமுகப்படுத்தப்பட்டது.
இதுவரை 4 டி.என்.பி.எல். போட்டிகள் நடைபெற்றுள்ளது. இதில் சேப்பாக் சூப்பர்கில்லீஸ் 2 முறையும் (2017, 2019), டுட்டி பேட்ரியாட்ஸ் (2016), மதுரை பாந்தர்ஸ் (2018) ஆகியவை தலா ஒரு தடவையும் டி.என்.பி.எல். கோப்பையை கைப்பற்றியுள்ளன.
5-வது டி.என்.பி.எல். போட்டி கடந்த ஆண்டு ஐ.பி.எல். முடிந்த பிறகு டிசம்பர் மாதம் நடத்த திட்டமிடப்பட்டது. ஆனால் கொரோனா பாதிப்பு அதிகமாக இருந்ததால் போட்டியை நடத்த முடியவில்லை. இதனால் டி.என்.பி.எல். போட்டி ரத்து செய்யப்பட்டு இருந்தது.
5-வது டி.என்.பி.எல். போட்டியை இந்த ஆண்டு நடத்த தமிழ்நாடு கிரிக்கெட் சங்கம் முடிவு செய்தது. அதன்படி ஜூன் 4-ந்தேதி முதல் ஜூலை 4-ந்தேதி வரை தமிழ்நாடு பிரிமியர் லீக் போட்டியை நடத்த விரும்புகிறது.
இதற்கான அனுமதியை கேட்டு இந்திய கிரிக்கெட் கட்டுபாட்டு வாரியத்துக்கு (பி.சி.சி.ஐ.) தமிழ்நாடு கிரிக்கெட் சங்கம் கடிதம் எழுதி உள்ளது. இதை டி.என்.சி.ஏ. செயலாளர் ராமசாமி தெரிவித்துள்ளார்.
கொரோனா பாதுகாப்பு வளையத்துடன் 4 நகரங்களில் டி.என்.பி.எல். போட்டியை நடத்த முடிவு செய்யப்பட்டு இருக்கிறது.
