இங்கிலாந்துக்கு எதிரான 2-வது டெஸ்டின் முதல் நாள் ஆட்ட நேர முடிவில் இந்திய அணி 300/ 6 - ரோகித் அதிரடி சதம்

சென்னை:

இந்தியா - இங்கிலாந்து அணிகளுக்கு இடையேயான 2-வது டெஸ்ட் கிரிக்கெட் போட்டி சென்னை சேப்பாக்கம் மைதானத்தில் இன்று நடைபெற்று வருகிறது. இப்போட்டியில் டாஸ் வென்ற இந்திய அணியின் கேப்டன் விராட் கோலி முதலில் பேட்டிங்கை தேர்வு செய்தார். இதன்படி முதலில் பேட் செய்த இந்திய அணிக்கு துவக்கமே அதிர்ச்சி காத்திருந்தது. இளம் வீரர் சுப்மான் கில் ரன் எதுவும் இன்றி ஆட்டமிழந்து அதிர்ச்சி அளித்தார். 

இதையடுத்து, ரோகித் சர்மாவுடன் - புஜாரா ஜோடி சேர்ந்தார். புஜாரா வழக்கம் போல தடுப்பாட்டம் ஆட ரோகித் சர்மா சற்று அதிரடியாக ஆடினார் நிதானமாக ஆடி வந்த புஜாரா 21 ரன்களில் ஜேக் லீச் பந்தில் ஆட்டமிழந்தார்.  4-வது விக்கெட்டுக்கு களம் இறங்கிய கேப்டன் கோலி, மோயின் அலி சுழலில் சிக்கி போல்டு ஆனார். 86-ரன்களுக்குள் இந்திய அணி 3 விக்கெட்டுகளை இழந்து தடுமாறியது.  

இதனை தொடர்ந்து, ரோகித் சர்மாவுடன்  துணை கேப்டன் ரகானே ஜோடி சேர்ந்தார். ஒருபுறம் ரகானே பொறுப்பான ஆட்டத்தை வெளிப்படுத்தினார். ரோகித் சர்மா ஏதுவான பந்துகளை பவுண்டரிக்கு விரட்டியதால், ரன் வேகம் சீராக இருந்தது. தொடர்ந்து சிறப்பாக விளையாடிய ரோகித் சர்மா சதம் அடித்து அசத்தினார். சர்வதேச டெஸ்ட் போட்டிகளில் ரோகித் சர்மா அடிக்கும் 7-வது சதம் இதுவாகும்.  

பொறுப்புடன் ஆடிய ரஹானே அரை சதம் அடித்தார். அதிரடியாக ஆடிய ரோகித் சர்மா 161 ரன்கள் எடுத்த நிலையில் ஜேக் லீக் பந்து வீச்சில் வெளியேறினார்.  அவர் அவுட் ஆன சிறுது நேரத்தில் ரஹானேவும் மொயின் அலி பந்து வீச்சில் போல்ட் ஆகி வெளியேறினார். அடுத்து வந்த ரிஷப் பந்த் அவரது ஆட்டத்தை வழக்கம் போல ஆடினார்.

இந்நிலையில் அஸ்வின் இங்கிலாந்து கேப்டன் ஜோரூட் பந்து வீச்சில் 13 ரன்கள் எடுத்து வெளியேறினார். இதனையடுத்து ரிஷப் பந்துடன் அக்சர் படேல் ஜோடி சேர்ந்து நிதானமாக ஆடினர். இந்திய அணி முதல் நாள் ஆட்ட நேர முடிவில் 6 விக்கெட் இழப்பிற்கு 300 ரன்கள் எடுத்துள்ளது.

ரிஷப் பந்த் 33 ரன்களுடனும் அக்‌ஷர் படேல் 5 ரன்னிலும் களத்தில் இருந்தனர். இங்கிலாந்து அணி தரப்பில் ஜேக் லீச், மொயின் அலி 2 விக்கெட்டும் ஸ்டோன் ரூட் தலா 1 விக்கெட்டும் வீழ்த்தினர்.