ஸ்பெயின் நாட்டைச் சேர்ந்த பெப் குவார்டியோலா இங்கிலாந்து பிரிமீயர் லீக்கின் நடப்பு சாம்பியன் அணியான மான்செஸ்டர் சிட்டியின் பயிற்சியாளராக உள்ளார். இவரது வீடு ஸ்பெயினில் உள்ள பார்சிலோனாவில் உள்ளது. தற்போது ஸ்பெயினில் கொரோனா வைரசின் தாக்கம் மிகத்தீவிரமாக உள்ளது. தினந்தோறும் 500-க்கும் மேற்பட்டோர் பலியாகி வருகின்றனர்.
இந்நிலையில் பெப் குவார்டியோலாவின் தாயார் டோலோர்ஸ் சாலா கேரியோ (வயது 82) கொரோனா வைரஸ் தாக்கி பலியானார். பெப் குவார்டியோலாவின் தாயார் பலியான செய்தி அறிந்து மான்செஸ்டர் சிட்டி, மான்செஸ்டர் யுனைடெட், பார்சிலோனா அணிகள் தங்களது ஆழந்த இரங்கலை தெரிவித்துள்ளது.
பெப் குவார்டியோலா கொரோனா வைரஸ் தொற்றை ஒடுக்கும் நடவடிக்கைக்காக ஒரு மில்லியன் யூரோ வழங்கியிருந்தார் என்பது குறிப்பிடத்தக்கது.
ஸ்பெயினைச் சேர்ந்த பெப் குவார்டியோலா (வயது 49) 2016-ல் இருந்து மான்செஸ்டர் சிட்டி அணியின் தலைமை பயிற்சியாளராக இருந்து வருகிறார். அதற்கு முன் பார்சிலோனா, பேயர்ன் முனிச் அணிகளுக்கும் பயிற்சியாளராக இருந்துள்ளார்.
