ரஞ்சி டிராபியில் பெங்கால் - ஐதராபாத் இடையிலான ஆட்டம் மேற்கு வங்காளத்தில் உள்ள கல்யாணி என்ற இடத்தில் நடைபெற்று வருகிறது. டாஸ் வென்ற பெங்கால் அணி பேட்டிங்கை தேர்வு செய்தது. அந்த அணி 60 ரன்கள் எடுப்பதற்குள் மூன்று விக்கெட்டை இழந்து தத்தளித்தது.
4-வது விக்கெட்டுக்கு மனோஜ் திவாரியுடன் மஜும்தார் ஜோடி சேர்ந்தார். இந்த ஜோடி அணியை சரிவில் இருந்து மீட்டது. குறிப்பாக மனோஜ் திவாரி சிறப்பாக விளையாடினார். நேற்றைய முதல் நாள் ஆட்டத்தில் பெங்கால் 5 விக்கெட் இழப்பிற்கு 366 ரன்கள் குவித்தது. மனோஜ் திவாரி 156 ரன்களுடனும், சக்ரபோர்ட்டி ரன்ஏதும் எடுக்காமலும் களத்தில் இருந்தனர்.
இன்று 2-வது நாள் ஆட்டம் தொடங்கியது. சதத்தை இரட்டை சதமாக மாற்றிய மனோஜ் திவாரி முதன்முறையாக முச்சதத்தையும் பதிவு செய்தார். இவரது சதத்தால் பெங்கால் 7 விக்கெட் இழப்பிற்கு 635 ரன்கள் குவித்து டிக்ளேர் செய்தது. மனோஜ் திவாரி 414 பந்தில் 303 ரன்கள் குவித்து ஆட்டமிழக்காமல் இருந்தார்.
