இங்கிலாந்து அணியின் முன்னணி வேகப்பந்து வீச்சு ஆல்ரவுண்டர் பென் ஸ்டோக்ஸ். ஹாம்ஸ்ட்ரிங் காயத்தால் ஆஸ்திரேயாவிற்கு எதிரான ஒருநாள் தொடர் முழுவதும் விளையாடாத பென் ஸ்டோக்ஸ், இந்தியாவிற்கு எதிரான முதல் இரண்டு டி20 போட்டிக்கான இங்கிலாந்து அணியில் இடம்பெறவில்லை.
அதேவேளையில் துர்காம் அணிக்காக விளையாடிய பென் ஸ்டோக்ஸ் 68 பந்தில் 90 ரன்கள் அடித்து அசத்தினார். இதன்காரணமாக இந்தியாவிற்கு எதிரான மூன்றாவது டி20 போட்டிக்கான இங்கிலாந்து அணியில் இடம்பிடித்துள்ளார்.
ஆனால், ஆடும் லெவனில் அவருக்கு இடம் கொடுக்கப்படுமா? என்பது குறித்து கேப்டன் மோர்கன் உறுதியான தகவலை வெளிப்படுத்தவில்லை. இதுகுறித்து மோர்கன் கூறுகையில் ‘‘அடுத்த போட்டிக்கான இங்கிலாந்து அணியில் பென் ஸ்டோக்ஸ் இணைகிறார். அவர் ஒரு சிறந்த வீரர். அவர் அணியில் இடம்பெறுவாரா? என்பது குறித்து முடிவு எடுப்பது கடினமானது.
கடந்த காலங்களில் இதுபோன்ற முடிவுகளை எடுத்துள்ளோம். வலுவான ஆடும் லெவன் அணிக்கு எது தேவையோ, அதற்கான முடிவை நாங்கள் எடுப்போம்’’ என்றார். இதனால் பென் ஸ்டோக்ஸ் இந்தியாவிற்கு எதிரான கடைசி டி20 போட்டியில் விளையாடுவாரா? என்பதில் சந்தேகமே?
