விம்பிள்டன்: கெர்பரை வீழ்த்தி காலிறுதிக்கு முன்னேறினார் முகுருசா

இங்கிலாந்தின் லண்டன் நகரில் விம்பிள்டன் கிராண்ட்ஸ்லாம் டென்னிஸ் தொடர் நடைபெற்று வருகிறது. இன்று பெண்களுக்கான ஒற்றையர் பிரிவில் காலிறுதிக்கு முந்தைய சுற்று நடைபெற்று வருகிறது.

8 போட்டிகளின் ஒன்றில் 7-ம் நிலை வீராங்கனையான குஸ்னெட்சோவா, 9-ம் நிலை வீராங்கனையான ரட்வன்ஸ்காவுடன் மோதினார். இதில் குஸ்னெட்சோவா 6-2, 6-4 என நேர்செட் கணக்கில் எளிதில் வெற்றி பெற்று காலிறுதிக்கு முன்னேறினார்.

மற்றொரு போட்டியில் தரநிலை பெறாத ரிபாரிகோவா - மார்டிக் ஆகியோர் மோதினார்கள். முதல் செட்டை ரிபாரிகோவா 6-4 எனக் கைப்பற்றினார். ஆனால் 2-வது செட்டை மார்டிக் 6-2 எனக் கைப்பற்றினார். வெற்றியை தீர்மானிக்கும் கடைசி செட்டை ரிபாரிகோவா 6-3 எனக் கைப்பற்றி காலிறுதிக்கு முன்னேறினார்.

உக்ரைனைச் சேர்ந்த 4-ம் நிலை வீராங்கனை எலினா ஸ்விடோலினா, 13-ம் நிலை வீராங்கனையான லத்வியாவின் ஜெலினா ஓஸ்டாபென்கோவுடன் மோதினார். இதில் ஓஸ்டாபென்கோ 6-3, 7-6 என வெற்றி பெற்றார்.


ஓஸ்டாபென்கோ

மற்றொரு போட்டியில் முதல் நிலை வீராங்கனையாக ஏஞ்சலிக் கெர்பர், 14-ம் நிலை வீராங்கனையான முகுருசாவை எதிர்கொண்டார். முதல் செட்டை கெர்பர் 6-4 என எளிதில் கைப்பற்றினார். அதன்பின் முகுருசா அபாரமான ஆட்டத்தை வெளிப்படுத்தினார்.


அவரது ஆட்டத்திற்கு கெர்பரால் ஈடுகொடுக்க முடியவில்லை. இதனால் முகுருசா கடைசி இரண்டு செட்டையும் 6-4, 6-4 எனக் கைப்பற்றி கெர்பரை வெளியேற்றி காலிறுதிக்கு முன்னேறினார்.


வீனஸ் வில்லியம்ஸ்

மற்றொரு போட்டியில் வீனஸ் வில்லியம்ஸ் 27-ம் நிலை வீராங்கனையான கோன்சுவை நேர்செட் கணக்கில் வீழ்த்தி காலிறுதிக்கு முன்னேறினார்.