பாஜக தேசிய அமைப்பு செயலாளராக பி.எல்.சந்தோஷ் நியமனம்

புதுடெல்லி:

மத்தியில் ஆளும் பாரதிய ஜனதா கட்சியின் தேசிய அமைப்பு செயலாளராக 13 ஆண்டுகள் பொறுப்புவகித்த ராம்லால் தாய்க்கழகமான ஆர்.எஸ்.எஸ். இயக்கத்துக்கு நேற்று மீண்டும் திரும்பிச் சென்றதால் அந்த பதவி காலியாக இருந்தது.

இந்நிலையில், அந்த பொறுப்பில் பி.எல்.சந்தோஷ் இன்று நியமிக்கப்பட்டுள்ளார். இதற்கான உத்தரவை அக்கட்சியின் தேசிய தலைவரும் மத்திய மந்திரியுமான அமித் ஷா இன்று பிறப்பித்தார். 

இந்த பதவியில் நியமிக்கப்பட்டுள்ள பி.எல்.சந்தோஷ் இதற்கு முன்னர் 8 ஆண்டுகள் கர்நாடக மாநில பாஜக பொதுச் செயலாளராகவும், பின்னர் 2014-ம் ஆண்டில் இருந்து தமிழ்நாடு உள்ளிட்ட தென்மாநிலங்களின் பாஜக மேலிடப் பொறுப்பாளராகவும் பணியாற்றியுள்ளார். 

தற்போது அக்கட்சியின் தேசிய இணை பொதுச் செயலாளராக இருந்த பி.எல்.சந்தோஷுக்கு இந்த பதவி உயர்வை அமித் ஷா அளித்துள்ளார் என்பது குறிப்பிடத்தக்கது.