சிவகங்கை

மானாமதுரை:

சிவகங்கை மாவட்டம் மானாமதுரையில் ஓய்வு பெற்ற அலுவலர்கள் சங்க ஆண்டு விழா மற்றும் மூத்த குடிமக்கள் சங்க கூட்டம் சங்க தலைவர் முன்னாள் தாசில்தார் அங்குச்சாமி தலைமையில் நடந்தது. துணைத்தலைவர் ராசு வரவேற்றார். நிர்வாகிகள் மாசானம், பாண்டியன், காமாட்சி ஆகியோர் பேசினர். பாலுச்சாமி நன்றி கூறினார்.

இதில் மத்திய-மாநில அரசுகளை வலியுறுத்தி 12 தீர்மானங்கள் நிறைவேற்றப்பட்டன. செயலாளர் மீனாட்சிசுந்தரம் தீர்மானங்களை வாசித்தார்.

3 ஆண்டுகளுக்கு ஒரு முறை அகவிலைப்படியை ஓய்வூதியத்துடன் இணைத்து திருத்தப்பட்ட ஓய்வூதியம் வழங்க வேண்டும். அனைத்து ஓய்வூதியர்களுக்கும் இலவச பஸ் பாஸ் வழங்க வேண்டும்.

மானாமதுரை மேல் கரையில் இருந்து வைகை ஆற்றின் குறுக்கே கன்னார் தெருவிற்கு செல்ல தரைப்பாலம் அமைத்துதர வேண்டும். மானமதுரையில் இருந்து சிவகங்கை, காரைக்குடி வழியாக தினமும் சென்னைக்கு எக்ஸ்பிரஸ் ரெயில் விட வேண்டும் உள்ளிட்ட பல்வேறு தீர்மானங்கள் நிறைவேற்றப்பட்டன.

சிங்கம்புணரி:

சிவகங்கை மாவட்டம் சிங்கம்புணரி மற்றும் பல்வேறு பகுதிகளில் மாட்டு பொங்கல் அன்று தடையை மீறி மஞ்சுவிரட்டு நடத்தப்பட்டது.

சிங்கம்புணரியில் நடந்த மஞ்சு விரட்டில் பா.ஜனதா தேசிய செயலாளர் எச்.ராஜா தடையை மீறி காளையை அவிழ்த்துவிட்டார்.

இது தொடர்பாக எச். ராஜா மற்றும் சிங்கம்புணரி ஆர்.எஸ்.எஸ். பொறுப்பாளர்கள் உள்பட 12 பேர் மீது போலீசார் வழக்குப் பதிவு செய்தனர்.

அதுபோல தடையை மீறி மஞ்சு விரட்டு நடத்திய காளைபூர், சூரக்குடி, தத்துக் குடிபட்டி ஆகிய பகுதிகளில் 38 பேர் மீது போலீசார் வழக்குப்பதிவு செய்து உள்ளனர்.

காரைக்குடி:

சென்னை பெரியமேடு பகுதியைச் சேர்ந்தவர் அட்டானூர் ரகுமான் (வயது44). கம்ப்யூட்டர் நிறுவனத்தில் வேலை பார்க்கும் இவர், தனது உறவினர்கள் சிலருடன் பொங்கல் பண்டிகையையொட்டி ஒரு காரில் சுற்றுலாவாக ராமேசுவரம் புறப்பட்டார்.

இன்று காலை 4.30 மணி அளவில் திருச்சி -ராமேசுவரம் தேசிய நெடுஞ்சாலையில் காரைக்குடி அருகே உள்ள ஆவுடைபொய்கை பகுதியில் அந்த கார் வந்தது. அப்துல்காதர் (25) என்பவர் காரை ஓட்டி வந்தார்.

அப்போது எதிர்பாராத விதமாக ஓட்டுநரின் கட்டுப்பாட்டை இழந்த கார், நிலைதடுமாறி அங்கிருந்த பள்ளத்தில் கவிழ்ந்தது.

இந்த விபத்தில் காரில் பயணம் செய்த மும்தாஜ் (60) சம்பவ இடத்திலேயே பலியானார். மேலும் காரில் இருந்த முகமது சல்மான் (12), முகமது யூசுப் (9), ஆயிஷா சுல்தானா (5) ஆகிய 3 குழந்தைகள் உள்பட 8 பேர் காயம் அடைந்தனர். இவர்களில் முகமது யூனூஸ் (60), கார் டிரைவர் அப்துல் காதர் ஆகியோர் மேல்சிகிச்சைக்காக சிவகங்கை அரசு ஆஸ்பத்திரியில் அனுமதிக்கப்பட்டுள்ளனர்.

விபத்து குறித்து குன்றக்குடி போலீசார் வழக்குப்பதிவு செய்து விசாரணை நடத்தி வருகிறார்கள்.

சிவகங்கை:

சிவகங்கை மாவட்டம், திருப்பாச்சேத்தியை சேர்ந்தவர் கார்த்திகைசாமி (வயது 26). இவர் மீது பல்வேறு போலீஸ் நிலையங்களில் நகை பறிப்பு, வழிப்பறி, கொள்ளை, மிரட்டல் செய்ததாக வழக்குகள் உள்ளன.

இந்நிலையில் நேற்று கார்த்திகைசாமி தனது ஆதரவாளர்களுடன் மதுரைக்கு காரில் சென்றார்.

மதுரை மாவட்டம், கூடக்கோவில் போலீஸ்சரகம், எலியார் பத்தியில் உள்ள ஒரு பெட்ரோல் பங்கில் காருக்கு டீசல் போட்டுள்ளார். அப்போது பங்க ஊழியரான மதுரை கைத்தறிநகரை சேர்ந்த நாகராஜன் என்பவருடன் அந்த கும்பல் தகராறு செய்தது.

இதில் ஆத்திரமடைந்த கார்த்திகை சாமி மற்றும் அவரது ஆதரவாளர்கள் நாகராஜனை சரமாரியாக அடித்து உதைத்தனர். ரத்த வெள்ளத்தில் அவர் அங்கு மயங்கி விழுந்தார். பின்னர் அந்த கும்பல் பெட்ரோல் பங்கை அடித்து நொறுக்கி விட்டு தப்பியது.

இதுகுறித்த புகாரின் பேரில் கூடக்கோவில் போலீசார் சம்பவ இடத்துக்கு விரைந்து வந்து விசாரணை நடத்தினர். மேலும் போலீசார் அனைத்து சோதனை சாவடிகளையும் உஷார் படுத்தினர்.

ஊழியரை தாக்கிவிட்டு சென்ற கும்பல் சிவகங்கையை நோக்கி செல்வதாக தகவல் கிடைத்தது. இதையடுத்து அந்தமாவட்ட போலீசாரும் உஷார்படுத்தப்பட்டனர். அனைத்து ரோந்து போலீசாருக்கும் தப்பி சென்ற கும்பலின் கார் எண் வயர்லெஸ் மூலம் தெரிவிக்கப்பட்டது.

போலீஸ் டி.எஸ்.பி. பால முருகன், சிவகங்கை டவுன் இன்ஸ்பெக்டர் மோகன் தலைமையில் 20-க்கும் மேற்பட்ட போலீசார் அங்குள்ள சிவகங்கை மாவட்ட எல்லை சோதனை சாவடியில் தீவிர கண்காணிப்பில் ஈடுபட்டனர்.

இன்று அதிகாலை கார்த்திகை சாமி தனது ஆதரவாளர்களுடன் காரில் மானாமதுரை சோதனை சாவடிக்கு வந்தார். அங்கு போலீசார் காரை நிறுத்துமாறு கூறினர். ஆனால் கார்த்திகை சாமி காரை நிறுத்தாமல் வேகமாக சென்றுவிட்டார். இதையடுத்து போலீசார் காரை விரட்டி சென்றனர்.

இந்நிலையில் மானா மதுரை- சிவகங்கை ரோட்டில் சிவகங்கை டவுன் போலீஸ் நிலையத்தில் பணிபுரியும் போலீஸ்காரர் வேல்முருகன் ரோந்து பணி மேற்கொண்டிருந்தார்.

அப்போது அவருக்கு வயர்லெஸ் மூலம் தகவல் கிடைத்ததன் பேரில், கார்த்திகை சாமி அந்த வழியாக ஓட்டி வந்த காரை மறித்தார். இதனால் ஆத்திரமடைந்த அந்த கும்பல் வேல்முருகனை அரிவாளால் வெட்டி விட்டு தப்பியது. இதில் அவர் படுகாயமடைந்தார்.

பின்னர் அந்த கும்பல் சிவகங்கை அருகே உள்ள புதுக்குளம் கண்மாய் பகுதியில் காரை நிறுத்தி விட்டு அங்கிருந்து தப்பியது.

சிவகங்கை டி.எஸ்.பி. தலைமையிலான போலீசார், தொடர்ந்து ரவுடி கார்த்திகை சாமி மற்றும் அவரது கும்பலை தீவிரமாக தேடி வந்தனர்.

இதனிடையே கார்த்திகை சாமி மற்றும் அவரது ஆதரவாளர்கள் சிவகங்கை அருகே காயான்குளம் பகுதியில் உள்ள மூட்புதரில் பதுங்கியிருப்பதாக போலீசாருக்கு தகவல் கிடைத்தது. இதையடுத்து போலீசார் அந்த இடத்தை சுற்றி வளைத்தனர். பின்னர் கார்த்திகைசாமி மற்றும் அவரது கும்பலை சரண் அடையுமாறு போலீசார் எச்சரித்தனர்.

ஆனால் அவர்கள் சரணடைய மறுத்ததோடு திடீரென்று போலீசார் மீது சரமாரியாக தாக்குதல் நடத்தினர். இதையடுத்து போலீசார் தற்காப்புக்காக துப்பாக்கியால் சுட்டனர். இதில் கார்த்திகைசாமி மீது குண்டு பாய்ந்து அவர் சம்பவ இடத்திலேயே பலியானார். அப்போது தப்ப முயன்ற கூட்டாளிகள் 3 பேரை போலீசார் கைது செய்தனர்

சிவகங்கையில், ரவுடி போலீசாரால் சுட்டுக் கொல்லப்பட்ட சம்பவம் பரபரப்பை ஏற்படுத்தி உள்ளது.

போலீசார் தற்காப்புக்காக ரவுடியை சுட்டனரா? அல்லது என்கவுன்டரில் சுட்டுக் கொலை செய்யப்பட்டாரா? என்ற சந்தேகம் மக்களிடையே ஏற்படுத்தி யுள்ளது.

சிவகங்கை:

சிவகங்கை நகர் முத்து நகரைச் சேர்ந்தவர் கொங்கேஸ்வரி (வயது24). இவர் நேற்று காலை வீட்டை பூட்டி விட்டு வெளியே சென்று விட்டார். இதை நோட்டமிட்ட மர்ம ஆசாமிகள் நைசாக காம்பவுண்டு சுவரில் ஏறி உள்ளே குதித்தனர்.

பின்னர் வீட்டின் கதவை உடைத்து மர்ம கும்பல் உள்ளே புகுந்தது. பீரோவை திறந்து அதில் இருந்த 3¾ பவுன் நகை மற்றும் எல்.இ.டி. டி.வி., ரூ.50 ஆயிரம் மதிப்புள்ள குத்து விளக்குகள் ஆகியவற்றை திருடிக்கொண்டு தப்பினர்.

வீடு திரும்பிய கொங்கேஸ்வரி, கதவு உடைக்கப்பட்டு நகை மற்றும் பொருட்கள் கொள்ளையடிக்கப்பட்டு இருப்பதை கண்டு அதிர்ச்சி அடைந்தார்.

இதுகுறித்த புகாரின் பேரில் சிவகங்கை நகர் போலீஸ் இன்ஸ்பெக்டர் கருப்புசாமி வழக்குப்பதிவு செய்து கொள்ளையர்களை தேடி வருகிறார்.

சிவகங்கை:

திருப்பத்தூர் நகர் பிரபாகரன் காலனியைச் சேர்ந்தவர் முகமது அஸ்ரப் (வயது 42). இவரது மகள் தஸ்லிமா பானு (19). இவர் அங்குள்ள தனியார் கல்லூரியில் பி.காம் இறுதியாண்டு படித்து வந்தார்.

நேற்று காலை வழக்கம் போல தஸ்லிமா பானு கல்லூரிக்கு புறப்பட்டுச் சென்றனர். அதன் பின்னர் மாலையில் அவர் வீடு திரும்பவில்லை.

அவரது உறவினர் மற்றும் தோழிகள் வீடு உள்பட பல இடங்களிலும் பெற்றோர் தேடினர். ஆனால் அதற்கு எந்த பலனும் கிடைக்கவில்லை. இதனைத் தொடர்ந்து திருப்பத்தூர் போலீசில் முகமது அஸ்ரப் புகார் செய்தார்.

இன்ஸ்பெக்டர் ராஜ சேகர் வழக்குப்பதிவு செய்து மாயமான தஸ்லிமா பானுவை தேடி வருகிறார். அவர் கடத்தப்பட்டாரா? அல்லது வேறு எங்கும் சென்றாரா? என்பது குறித்து தீவிர விசாரணை நடைபெற்று வருகிறது.