காஞ்சிபுரம்

திருப்போரூர்:

திருப்போரூர் பஸ் நிலையத்தில் விரிவாக்க பணிகள் நடைபெற்று வருகின்றன. பழைய பஸ் நிலைய கூரையின் முன்புறம் பெயிண்ட் அடிக்கும் பணிகள் நடைபெற்றது.

சுமார் 30 அடி உயரத்தில் சாரம் அமைத்து 3 தொழிலாளர்கள் இதில் ஈடுபட்டனர்.

அப்போது திடீரென சாரம் சரிந்து கீழே விழுந்தது. அதில் நின்று வேலை செய்து கொண்டிருந்தவர்களில் 2 பேர் அலறியபடி கீழே விழுந்து லேசான காயத்துடன் தப்பினர்.

ஒருவர் மட்டும் மேற்புற கூரையை பிடித்துக்கொண்டு அந்தரத்தில் தொங்கி அலறினார். இதனால் பஸ்நிலைய பகுதியில் பரபரப்பு ஏற்பட்டது. இதனை பார்த்து அதிர்ச்சி அடைந்த பொதுமக்கள் பெரிய ஏணியை கொண்டு வந்து அதன்மூலம் அந்தரத்தில் தொங்கிய தொழிலாளியை பத்திரமாக மீட்டனர்.

சாரத்தில் பழைய கம்புகளை பயன்படுத்தியதால் பளு தாங்காமல் உடைந்தது தெரியவந்தது. அதிர்ஷ்டவசமாக 3 தொழிலாளர்களும் லேசான காயத்துடன் உயிர்தப்பினர்.

உயரமான பகுதியில் வேலை செய்யும்போது அதற்கென பாதுகாப்புடன் பணி செய்வதை ஒப்பந்தக்காரருக்கு அறிவுறுத்தி அதிகாரிகள் கண்காணிக்கவேண்டும் என்று பொதுமக்கள் தெரிவித்தனர்.

இந்த சம்பவத்தால் பஸ் நிலைய வளாகத்தில் சுமார் ஒரு மணி நேரம் பரபரப்பு ஏற்பட்டது.

தாம்பரம்:

சென்னையை அடுத்த தாம்பரம் விமானப்படை தளத்தில் இருந்து நேற்று முன்தினம் புறப்பட்ட ராணுவ விமானம் சிறிது நேரத்திலேயே சென்னை அருகே கடல் பகுதியில் திடீரென மாயமானது.

விமானம் புறப்பட்டுச் சென்ற 16 நிமிடங்களில் விமான கட்டுப்பாட்டு அறையுடன் கொண்டிருந்த தொடர்பு துண்டிக்கப்பட்டது. ரேடாரில் இருந்தும் மறைந்தது.

சென்னைக்கு கிழக்கே 370 கிலோ மீட்டர் தொலைவில் வங்காள விரிகுடா கடலுக்கு மேலே 23 ஆயிரம் அடி உயரத்தில் பறந்து கொண்டிருந்த போது விமானம் காணாமல் போனது.

இந்த விமானத்தில் 29 பேர் பயணம் செய்தனர். அவர்கள் கதி என்ன? என்று தெரியவில்லை. தற்போது விமானப்படை விமானங்களும், போர்க்கப்பல்களும் காணாமல் போன விமானத்தை தேடும் பணியில் ஈடுபட்டுள்ளன. இதில் எந்த முன்னேற்றமும் காணப்படவில்லை.

இதனால் தாம்பரம் விமானப்படை விங் கமாண்டர் ஜெகதீப்சிங் நேற்று இரவு சேலையூர் போலீஸ் நிலையம் சென்று உதவி கமி‌ஷனர் பழனிவேலை சந்தித்து முறைப்படி புகார் கொடுத்துள்ளார்.

அதில் மாயமான விமானத்தில் பெண் அதிகாரி உள்பட 29 பேர் இருந்ததாகவும், அவர்களை பற்றி எந்த தகவலும் கிடைக்கவில்லை என்றும் கூறி உள்ளார். போலீசார் இந்த புகாரை பெற்றுக் கொண்டு முறைப்படி வழக்குப்பதிவு செய்துள்ளனர்.

புகாரில் காணாமல் போன 29 பேர் பெயர்கள் மட்டும் குறிப்பிட்டிருந்ததால் அவர்களின் முழு முகவரி மற்றும் விவரங்களை சேகரிக்க சேலையூர் இன்ஸ்பெக்டர் பொன்ராஜ், இன்று காலை தாம்பரம் விமானப்படை தளத்துக்கு சென்று விசாரணை மேற்கொண்டார். அவருடன் உளவு பிரிவு இன்ஸ்பெக்டர் மணி மற்றும் போலீசாரும் உடன் சென்றிருந்தனர். அங்கு அதிகாரிகளை சந்தித்து பெயர், முகவரி விவரங்களை சேகரித்தனர்.

இதில் 16 பேர் பெயர் விவரங்கள் தற்போது வெளியாகி உள்ளது.

1.பத்சரா– விமானி,

2.நந்தா–விமானி,

3. குணால்–

4.ராஜன்–

5. தீபிகா–

6.சஞ்சீவ்குமார்–

7.விமல்–

8.சாம்பமூர்த்தி,

9.பிரசாத் பாபு,

10.நாகேந்திரராவ்,

11.சேனாபதி,

12.பூபேந்திரசிங்,

13.மகாரானா,

14.சின்னாராவ்,

15.சீனிவாசராவ்

(இவர்கள் விசாகப்பட்டினம் கப்பல் படை ஊழியர்கள்).

16. முத்துக்கிருஷ்ணன்,– கடலோர பாதுகாப்பு படை வீரர் தூத்துக்குடி ஆழ்வார்திருநகரி அருகே உள்ள செம்பூரை சேர்ந்தவர்.

திருவான்மியூர்:

நீலாங்கரையை அடுத்த பனையூரைச் சேர்ந்தவர் மனோஜ். உத்தண்டி கிழக்கு கடற்கரை சாலையில் அடகு கடை வைத்துள்ளார்.

நேற்று காலை மனோஜின் தம்பி சுரேஷ் அடகு கடையில் இருந்தார். அப்போது மோட்டார்சைக்கிளில் வந்த 3 வாலிபர்கள் நகையை அடகு வைக்க வேண்டும் என்றனர். அவர்களிடம் சுரேஷ் நகை குறித்து விவரம் கேட்டார்.

திடீரென 3 வாலிபர்களும் சுரேசை சரமாரியாக தாக்கினர். மேலும் ஒருவன் கத்தியால் அவரை கையில் குத்தினான். அதிர்ச்சி அடைந்த சுரேஷ் 3 பேரையும் தள்ளி விட்டு கடையில் இருந்து வெளியே வந்து கூச்சலிட்டார்.

அலறல் சத்தம் கேட்டு பொதுமக்கள் ஏராளமானோர் அங்கு திரண்டனர். உடனே 3 வாலிபர்களும் மோட்டார்சைக்கிளில் தப்பி சென்று விட்டனர்.

இதனால் அடகு கடையில் இருந்த சுமார் ரூ. 50 லட்சம் மதிப்பிலான நகைகள் தப்பியது.

இதுகுறித்து கானாத்தூர் போலீசில் புகார் செய்யப்பட்டது. போலீசார் விரைந்து வந்து விசாரணை நடத்தினர். கடையில் இருந்த கண்காணிப்பு கேமிராவை ஆய்வு செய்தபோது அதில் கொள்ளையர்களின் உருவம் பதிவாகி இருந்தது. அவர்களை பற்றி தீவிர விசாரணை நடத்தி வருகிறார்கள்.