காஞ்சிபுரம்

தாம்பரம்:

பழைய பெருங்களத்தூர், சிவசண்முகம் சாலையில் வசித்து வருபவர் சிவனேசன். தனியார் நிறுவன ஊழியர். இவரது மனைவி காளீஸ்வரி.

இன்று காலை அவர்களது வீட்டிற்கு 2 வாலிபர்கள் வந்தனர். அப்போது சிவனேசனிடம் ‘‘உங்கள் வீட்டில் பில்லி, சூனியம், ஏவல் உள்ளது. பரிகாரபூஜை செய்தால் சரியாகி விடும்’’ என்றனர்.

இதனை நம்பிய சிவனேசன் பரிகார பூஜை செய்ய சம்மதித்தார். பூஜை செய்து கொண்டிருந்த போது 2 வாலிபர்களும் தங்க நகையை துணியில் கட்டி வைக்க கூறினர்.

இதையடுத்து காளீஸ்வரி 3 பவுன் நகையை துணியில் கட்டி சாமி படம் முன்பு வைத்தார். பூஜை முடிந்ததும் 2 வாலிபர்களும் வீட்டில் இருந்து புறப்பட்டனர்.

இதற்கிடையே சந்தேகம் அடைந்த காளீஸ்வரி நகை இருந்த துணியை பிரித்து பார்த்த போது எதுவும் இல்லை. அதிர்ச்சி அடைந்த அவர் கணவரிடம் தெரிவித்தார். பூஜை செய்வதாக ஏமாற்றி 2 வாலிபர்களும் நகையை திருடி செல்வது தெரிந்தது.

இதுபற்றி தெரிந்ததும் அப்பகுதி மக்கள் ஏராளமானோர் திரண்டனர். அவர்கள் 2 வாலிபர்களையும் விரட்டி பிடித்து தர்மஅடி கொடுத்தனர்.

பின்னர் அவர்களை பீர்க்கன்கரணை போலீசில் ஒப்படைத்தனர். அவர்களிடம் போலீசார் விசாரணை நடத்தி வருகிறார்கள். அவர்களிடம் இருந்து ஒரு மோட்டார் சைக்கிளும் பறிமுதல் செய்யப்பட்டு உள்ளது.

மதுராந்தகம்:

மதுராந்தகத்தை அடுத்த புதுப்பட்டியில் தனியார் பஞ்சு தயாரிக்கும் கம்பெனி உள்ளது. கார் மற்றும் வானங்களின் இருக்கைகளுக்கு தேவையான பஞ்சுகள் இங்கு தயாரிக்கப்படுகிறது.

நேற்று மாலை பணி முடிந்து ஊழியர்கள் கம்பெனியை பூட்டிச் சென்றனர். இந்த நிலையில் பஞ்சு தயாரிக்க வைத்திருந்த மூலப் பொருட்கள் அறையில் திடீரென தீப்பிடித்தது.

சிறிது நேரத்தில் தீ மளமளவென மற்ற அறைகளுக்கும் பரவியது. காற்றின் வேகத்தில் கம்பெனி முழுவதும் தீப்பற்றி எரிந்தது. இதனால் அப்பகுதியே புகை மூட்டமானது.

இதனை பார்த்து அதிர்ச்சி அடைந்த காவலாளி, போலீசுக்கும், தீயணைப்பு துறையினருக்கும் தகவல் தெரிவித்தார். மதுராந்தகம், அச்சரப்பாக்கம், செங்கல்பட்டு, மறைமலை நகர், உத்திரமேரூரில் இருந்து 5 தீயணைப்பு வண்டிகளில் தீயணைப்பு வீரர்கள் வந்தனர்.

தீ கொளுந்து விட்டு எரிந்ததால் தீயணைப்பு வீரர்களால் உடனடியாக தீயை கட்டுக்குள் கொண்டு வரமுடியவில்லை. விடிய, விடிய தீயை அணைக்க போராடினர்.

இன்று அதிகாலை தீ முழுவதும் அணைக்கப்பட்டது. எனினும் அங்கிருந்த பொருட்கள் அனைத்தும் எரிந்து நாசமானது. விற்பனைக்கு தயாராக இருந்த பஞ்சுகளும் கருகின. சேத மதிப்பு பல லட்சம் இருக்கும்.

மின்கசிவு காரணமாக தீ விபத்து ஏற்பட்டதாக தெரிகிறது. கம்பெனியில் தீப்பிடித்த போது ஊழியர்கள் யாரும் இல்லாததால் அதிர்ஷ்டவசமாக தப்பினர்.

இது குறித்து மதுராந்தகம் போலீசார் வழக்குபதிவு செய்து விசாரணை நடத்தி வருகிறார்கள்.

மாமல்லபுரம்:

மணலியை அடுத்த சாத்தாங்காடை சேர்ந்தவர் ஜெய்சர்பாய் (வயது 65). பிராட்வேயில் ஹார்டு வேர்ஸ் கடை வைத்து இருந்தார்.

இன்று காலை அவர் ராயபுரத்தை சேர்ந்த உறவினர் மைசீத் அத்திமுடன் (26) காரில் பாண்டிச்சேரி நோக்கி சென்றார்.

மாமல்லபுரம், கிழக்கு கடற்கரை சாலையில் உள்ள தனியார் கல்லூரி அருகே சென்றபோது பாண்டிச்சேரியில் இருந்து சென்னை நோக்கி வந்த கார் மீது கெய்சர்பாய் சென்ற கார் மோதியது.

இதில் 2 கார்களும் நொறுங்கின. இடிபாடுகளில் சிக்கிய கெய்சர்பாய் சம்பவ இடத்திலேயே பலியானார். மைசீத்பாய் மற்றும் மற்றொரு காரில் இருந்த 4 பேரும் பலத்த காயம் அடைந்தனர்.

அக்கம் பக்கத்தினர் அவற்றை மீட்டு சோழிங்கநல்லூரில் உள்ள தனியார் ஆஸ்பத்திரிக்கு கொண்டு சென்றனர். ஆனால் போகும் வழியிலேயே மைசீத்அத்தீம் பரிதாபமாக இறந்தார்.

மற்ற 4 பேருக்கும் சிகிச்சை அளிக்கப்பட்டு வருகிறது. அவர்களை பற்றிய விபரம் உடனடியாக தெரியவில்லை.

இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது. இதுகுறித்து மாமல்லபுரம் போலீசார் வழக்குப்பதிவு செய்து விசாரணை நடத்தி வருகிறார்கள்.

ஆலந்தூர்:

நாகர்கோவில் மற்றும் கேரளாவை சேர்ந்த 11 பேர் கடந்த 2015-ம் ஆண்டு குவைத்தை சேர்ந்த நிறுவனத்துக்காக மீன்பிடிக்க சென்றனர். சென்னையை சேர்ந்த ஏஜெண்டு மூலம் அவர்கள் குவைத் சென்றனர்.

குவைத் சென்றதும் அவர்களின் பாஸ்போர்ட்டுகளை அந்த நிறுவனம் வாங்கிக் கொண்டது. அதன்பிறகு மீன்பிடிக்க சென்ற மீனவர்களுக்கு 4 மாதமாக சம்பளம் வழங்கவில்லை.

இதனால் அவர்கள் வேலையில் இருந்து நின்று விட்டனர். இந்தியா திரும்ப முடிவு செய்த மீனவர்கள் குவைத் நிறுவனத்தினரிடம் தங்களின் பாஸ்போர்ட்டுகளை கேட்டனர்.

ஆனால் அவர்கள் பாஸ்போர்ட்டுக்கு ரூ.1 லட்சம் பணம் தந்தால்தான் திருப்பி தருவோம் என்று கூறி விட்டனர். இந்த ஆண்டு தொடக்கத்தில் 6 மீனவர்கள் தலா ரூ.1 லட்சம் பணத்தை கொடுத்து பாஸ்போர்ட்டை பெற்று தமிழகம் திரும்பி விட்டனர். மீதமுள்ள 5 பேரும் குவைத்தில் தவித்தனர்.

பின்னர் அவர்கள் அங்குள்ள இந்திய தூதரகத்தின் உதவியை நாடினர். அவர்கள் சில மாதம் மட்டும் உணவு வழங்கி பராமரித்தனர். மேலும் இந்தியா செல்ல விமான டிக்கெட்டுக்கு வேண்டுமானால் ஏற்பாடு செய்வதாக தூதரக அதிகாரிகள் கூறினர்.

ஆனால் குவைத் நிறுவனத்திடம் இருந்து பாஸ்போர்ட்டை அவர்களால் வாங்கி கொடுக்க முடியவில்லை. பாஸ்போர்ட் இல்லாமல் சுற்றி திரிந்த மீனவர்கள் அங்குள்ள போலீசாரின் உதவியை நாடினர்.

பாஸ்போர்ட் இல்லாத குற்றத்துக்காக அவர்கள் அங்குள்ள சிறையில் அடைக்கப்பட்டனர். பின்னர் 1 மாதம் கழித்து 5 பேரும் சிறையில் இருந்து வெளியே வந்தனர். பின்னர் அவர்களில் குளச்சலை சேர்ந்த மீனவர்கள் ஜான்சீம்ஸ், சிபின், கேரளாவை சேர்ந்த அனிஷ் ஆகிய 3 பேரும் அங்குள்ள நண்பர்கள் மூலம் உறவினர்களை தொடர்பு கொண்டு பணம் வாங்கி குவைத் நிறுவனத்திடம் இருந்து பாஸ்போர்ட்டை பெற்றனர்.

பின்னர் அவர்கள் 3 பேரும் விமானம் மூலம் இன்று சென்னை திரும்பினர். பின்னர் அங்கிருந்து சொந்த ஊருக்கு புறப்பட்டு சென்றனர்.

குவைத்தில் உள்ள நிறுவனத்தினர் எங்களுக்கு 4 மாதமாக சம்பளம் தர வில்லை. இதனால் நாங்கள் வேலையில் இருந்து நின்று விட்டோம். அதன்பிறகு உணவுக்கு வழியில்லாமல் தவித்தோம். ஆதரவு இன்றி சுற்றித்திரிந்தோம்.

இந்திய தூதரக அதிகாரிகள் சில மாதங்கள் மட்டுமே எங்களுக்கு உதவி செய்தனர். ஒரு வழியாக உறவினர்களின்உதவியால் தமிழகம் திரும்பி விட்டோம். இன்னும் 2 மீனவர்கள் குவைத்தில் தவிக்கிறார்கள்.

இவ்வாறு அவர்கள் கூறினார்கள்.

மதுராந்தகம்:

மதுராந்தம் நகராட்சிக்குட்பட்ட மோச்சேரி பகுதியில் கடந்த சில நாட்களாக மர்ம காய்ச்சல் பாதிப்பு அதிகமாக உள்ளது.

சிறுவர்கள் உள்பட 15-க்கும் மேற்பட்டோர் பாதிக்கப்பட்டு உள்ளனர். அருகில் உள்ள ஆஸ்பத்திரிகளில் சிகிச்சை பெற்றும் நோய் குணமாகவில்லை.

இந்த நிலையில் உடல் நிலை பாதிக்கப்பட்ட 15 பேர் மதுராந்தகம் அரசு ஆஸ்பத்திரியில் அனுமதிக்கப்பட்டு உள்ளனர். அவர்களுக்கு சிகிச்சை அளிக்கப்படுகிறது.

அப்பகுதியில் குடிநீர் குழாயில் உடைப்பு ஏற்பட்டு கழிவுநீர் கலந்ததால் நோய் தொற்று ஏற்பட்டதாக தெரிகிறது. இதையடுத்து நகராட்சி ஆணையர் மாரிச்செல்வி தலைமையில் சுகாதாரப்பணிகள் நடந்து வருகிறது.

மருத்துவ குழுவினர் பொது மக்களுக்கு சிகிச்சை அளித்து வருகிறார்கள். சுற்றுப்புறத்தை தூய்மையாக வைக்கவும் அறிவுறுத்தப்பட்டது.