காஞ்சிபுரம்

ஆலந்தூர்:

சென்னை விமான நிலையத்தில் இன்று காலை டெல்லி புறப்பட வேண்டிய விமானம் வரவில்லை. இதனால் அதில் செல்ல இருந்த மத்திய மந்திரி பொன்.ராதாகிருஷ்ணன் உள்பட 162 பயணிகள் அவதி அடைந்தனர்.

சார்ஜாவில் இருந்து வர வேண்டிய அந்த விமானம் மோசமான வானிலை காரணமாக சென்னை வருவதில் தாமதம் ஏற்பட்டது. இதையடுத்து மத்திய மந்திரி பொன்ராதாகிருஷ்ணன் உள்பட 18 பயணிகள் மாற்று விமானத்தில் டெல்லி சென்றனர். மற்ற பயணிகள் இன்று மதியம் வேறு விமானத்தில் புறப்பட்டனர்.

காஞ்சீபுரம்:

500 மற்றும் 1000 ரூபாய் செல்லாது என கடந்த 8-ம் தேதி மத்திய அரசு அறிவித்திருந்த நிலையில் சில கட்டுப்பாடுகளுடன் பணத்தினை மாற்றவும், வங்கிகளில் டெபாசிட் செய்யவும் ஏற்பாடு செய்திருந்தனர்.

இதையடுத்து பொது மக்கள் பணத்தினை எடுக்க வங்கி வாயில்கள் மற்றும் ஏ.டி.எம் மையங்களில் கால் கடுக்க காத்திருக்கும் நிலை உள்ளது.

காஞ்சீபுரம் மற்றும் சுற்றுப்புறங்களில் 70 வங்கிகள், 136 ஏடிஎம் மையங்கள் உள்ளது.ஆனால் பெரும்பாலான ஏ.டி.எம் மையங்களில் பணம் இல்லை, செயல்படாது என்ற அறிவிப்பு பலகை தொங்குவதால் வாடிக்கையாளர்கள் ஏமாற்றத்துடன் திரும்புகின்றனர்.

காஞ்சீபுரம் நகரில் உள்ள பெரும்பாலான ஏ.டி.எம் மையங்கள் செயல்படாத நிலையில் திறந்திருக்கும் ஏடிஎம் மையங்களில் பொது மக்கள் நீண்ட வரிசையில் காத்துள்ளனர்.

ஏறத்தாழ 2 மணிநேரம் காத்திருந்தும் திடீரென பணம் காலி ஆகிவிட்டது என ஏ.டி.எம் மையங்கள் மூடப்படுவதால் பொது மக்கள் கடும் அவதிக்குள்ளாகின்றனர். சில ஏ.டி.எம் மையங்களில் பணம் டெபாசிட் மட்டுமே செய்ய முடியும், எடுக்க முடியாது என்ற அறிவிப்பு பலகை தொங்குகிறது. இந்நிலையில் காஞ்சீபுரம் இந்திரா காந்தி சாலையில் உள்ள பாரத ஸ்டேட் வங்கி வாயிலில் உள்ள ஏ.டி.எம். மையத்தில் இன்று அதிகாலை 6 மணி முதலே நூற்றுக்கும் மேற்பட்டோர் குவிந்தனர். காவல் துறையினர் அவர்களை வரிசையில் நிற்க வைத்து அதிகாலையிலேயே ஒழுங்குபடுத்தினர்.

பணம் எடுக்க வந்த பெண் மணி காஞ்சனா என்பவர் கூறுகையில், “ஏடிஎம் மையங்களில் பெண்களுக்கு தனி கியூ இருக்கும் என நம்பி இன்று கூலி வேலைக்கு செல்லாமல் இங்கு வந்தால் ஏற்கனவே 100 பேருக்கு மேல் உள்ளனர்.

பணம் எடுக்க முடியுமா முடியாதா என தெரியவில்லை” என வருத்தத்துடன் கூறினார். காஞ்சீபுரம் நகரில் பெரும்பாலும் ஒருவரை ஒருவர் சந்திப்பவர்கள் அனைவரும் எந்த ஏ.டி.எம். மையத்தில் பணம் எடுக்க முடியும் என்ற தகவல்களையே மற்றவர்களை கேட்டு வருகின்றனர்.

திருவள்ளூர் பகுதியில் உள்ள வங்கிகளில் இன்று கூட்டம் குறைவாக காணப்பட்டது. பெரும்பாலான ஏ.டி.எம்.கள் செயல்பட்டன. ஆனால் ஒரு மணி நேரத்திலேயே ஏ.டி.எம். எந்திரத்தில் உள்ள பணம் காலியானது.

இதையடுத்து பணம் எடுக்க அடுத்த ஏ.டி.எம். மையத்தை தேடி பொது மக்கள் அலைந்தனர். இதனால் ஏ.டி.எம். மையங்களில் நீண்ட வரிசையில் பொதுமக்கள் காத்து இருந்து பணம் எடுத்து சென்றனர்.

காஞ்சீபுரம்:

காஞ்சீபுரம் மாவட்டத்தில் அனைத்து ரேசன் கார்டுகளுக்கும் முறையாக பொருட்களை வழங்க வலியுறுத்தி இந்திய ஜனநாயக மாதர் சங்கம் மற்றும் வாலிபர் சங்கத்தினர் முற்றுகை போராட்டத்தில் ஈடுபட்டனர்.

ஒலிமுகம்மது பேட்டை, பல்லவர்மேடு, ஓரிக்கை ஆகிய இடங்களில் உள்ள ரே‌ஷன் கடைகளை முற்றுகையிட்டு ஆர்ப்பாட்டம் செய்தனர். அப்போது வினியோக திட்ட மானியத்தை சுருக்க கூடாது, அனைத்து ரேசன் கார்டுகளுக்கும் உளுந்து, துவரம்பருப்பு, சர்க்கரை, பாமாயில் போன்றவற்றை முறையாக வழங்க வேண்டும். பகுதி நேர ரே‌ஷன் கடைகளை முழுநேர கடைகளாக மாற்ற வேண்டும். தேவையற்ற பொருட்களை வாங்க சொல்லி மக்களை கட்டாயபடுத்த கூடாது என்பன உள்ளிட்ட கோரிக்கைகளை வலியுறுத்தி கோ‌ஷங்களை எழுப்பினர்.

மதுராந்தகம்:

அச்சரப்பாக்கத்தை அடுத்த மின்னல் சித்தா மூரில் அரசு மதுபான கடை உள்ளது. சூப்பர் வைசராக முருகன் உள்ளார். நேற்று இரவு அவர் விற்பனை முடிந்து மதுக் கடையை பூட்டி சென்றார்.

இந்த நிலையில் இன்று காலை மதுக்கடை ‌ஷட்டர் பூட்டு உடைந்து கிடந்தது. மதுபாட்டில்களும் கடைக்குள் சிதறிக் கிடந்தன. இதனை பார்த்து அதிர்ச்சி அடைந்த அப்பகுதி மக்கள் ஒரத்தி போலீசுக்கு தகவல் தெரிவித்தனர்.

இன்ஸ்பெக்டர் தமிழ்வாணன் மற்றும் போலீசார் விரைந்து வந்து விசாரணை நடத்தினர். அப்போது 60 பெட்டி மதுபாட்டில்கள் கொள்ளை போய் இருப்பது தெரிந்தது. இதன் மதிப்பு சுமார் ரூ. 3 லட்சம் இருக்கும். விற்பனை பணத்தை ஊழியர்கள் எடுத்துச் சென்றதால் அவை தப்பியது. மதுபாட்டில் பெட்டிகளை கொள்ளை கும்பல் எடுத்த போது பல பெட்டிகள் சரிந்துள்ளன. இதில் ஏராளமான மதுபாட்டில்கள் சேதம் அடைந்ததாக தெரிகிறது.

இது குறித்து மதுக்கடை ஊழியர்கள் கூறும்போது, ரூ. 500, 1000 நோட்டுகளை நாங்கள் வாங்கவில்லை. இதனால் குடிமகன்கள் சிலர் எங்களிடம் தகராறில் ஈடுபட்டனர். இந்த முன்விரோதத்தில் அதே பகுதியை சேர்ந்தவர்கள் மதுபாட்டில்களை கொள்ளையடித்து இருக்கலாம் என்றனர்.

கொள்ளை கும்பல் வாகனத்தில் வந்து மதுபாட்டில் பெட்டிகளை எடுத்து சென்று இருப்பது விசாரணையில் தெரியவந்துள்ளது. இதுபற்றி தீவிரமாக விசாரணை நடந்து வருகிறது.