ஈரோடு

ஈரோடு:

மாநில அளவிலான கராத்தே போட்டி ஈரோடு கருங்கல்பாளையம் காந்தி சிலை அருகே உள்ள அரசு பள்ளியில் இன்று நடந்தது.

இதில் பல்வேறு மாவட்டங்களை சேர்ந்த சுமார் 500க்கும் மேற்பட்ட பள்ளி மாணவ-மாணவிகள் கலந்து கொண்டனர்.

பல்வேறு பிரிவுகளின் கீழ் நடந்த இந்த போட்டியில் ஒற்றை கட்டா, குரூப்கட்டா மற்றும் குமித்தே போன்ற போட்டிகள் நடந்தன.

இந்த போட்டியை தென்னரசு எம்.எல்.ஏ தொடங்கி வைத்து போட்டியில் வெற்றி பெற்றவர்களுக்கு சான்றிதழ் வழங்கினார். கராத்தே மாஸ்டர் திருமலை வரவேற்றார்.

இந்த நிகழ்ச்சியில் பகுதி செயலாளர் முருகுசேகர், ஈரோடு நகர எம்.ஜி ஆர் மன்ற செயலாளர் குப்புசாமி, அண்ணா தொழிற்சங்க மாவட்ட செயலாளர் தெய்வநாயகம் உள்பட பலர் கலந்து கொண்டனர்.

ஈரோடு:

ஈரோடு பஸ் நிலையத்தில் நேற்று இரவு பஸ்சுக்காக நின்று கொண்டிருந்த பயணி ஒருவரிடம் இருந்து அவரது செல்போன் வாலிபர் ஒருவர் திருடி கொண்டு ஓடினார். இதனால் அதிர்ச்சி அடைந்த அந்த நபர் திருடன்...திருடன்...என குச்சலிட்டார். அருகில் இருந்த மற்ற பயணிகள் அந்த வாலிபரை விரட்டி சென்று மடக்கி பிடித்தனர்.

இது குறித்து ஈரோடு டவுன் போலீசாருக்கு தகவல் கொடுக்கப்பட்டது. அவர்கள் சம்பவ இடத்துக்கு விரைந்து வந்து பயணிகள் பிடித்து வைத்திருந்த வாலிபரிடம் விசாரணை மேற்கொண்டனர்.

அதில் அவன் தஞ்சாவூர் மாவட்டம் முனியப்ப ஆண்டவர் காலனியை சேர்ந்த சிவகுமார்(வயது24) என தெரியவந்தது. ஈரோட்டில் தங்கி பெயிண்டர் வேலை பார்த்து வந்ததும் தெரியவந்தது.

இது குறித்து டவுன் போலீசார் வழக்கு பதிவு செய்து அந்த வாலிபரை கைது செய்து அவனிடம் தொடர்ந்து விசாரணை நடத்தி வருகிறார்கள்.

ஈரோடு:

பெருந்துறை அருகே உள்ள காஞ்சிகோவில் நரிப்பாளையத்தை சேர்நதவர் சங்கர் (வயது 29). இவருக்கு குடிபழக்கம் இருந்து வந்ததாக கூறப்படுகிறது.

சங்கர் பெருந்துறை ஈரோடு ரோட்டில் ஒர்க்ஷாப் நடத்தி வந்தார். இவர் வாழ்க்கையில் வெறுப்படைந்து அவ்வப்போது தற்கொலை செய்ய முயற்சி செய்த வந்தாராம். இந்த நிலையில் கடந்த 19-ந் தேதி ஒர்க்ஷாப்புக்கு வந்த சங்கர் அங்குள்ள மின் விசிறியில் தூக்குபோட்டு தற்கொலை செய்து கொண்டார்.

இது குறித்து அவரது மனைவி ரம்மியா (27) பெருந்துறை போலீசில் புகார் செய்தார். இன்ஸ்பெக்டர் சிவகுமார் வழக்குபதிவு செய்து விசாரணை நடத்தி வருகிறார்.

பவானி:

பவானி தேவபுரத்தில் இருந்து மேட்டுப்பாளையத்துக்கு நேற்று ஒரு வேன் புறப்பட்டு சென்றது. அங்கு நடக்கும் திருமணத்துக்காக 15 பேர் அந்த வேனில் சென்றனர்.

இந்த வேன் சித்தோடு அருகே செல்லும் போது ரோட்டின் குறுக்கே ஒரு இரு சக்கர வாகனம் சென்றது. இதன் மீது மோதாமல் இருப்பதற்காக டிரைவர் வேனை திருப்பினார்.

அப்போது டிரைவரின் கட்டுப்பாட்டை இழந்த வேன் தாறுமாறாக ஓடி ரோட்டின் ஓரத்தில் கவிழ்ந்தது.

இதில் வேனில் இருந்த 10 பேர் படுகாயம் அடைந்தனர். இவர்கள் ஆஸ்பத்திரியில் சேர்க்கப்பட்டு சிகிச்சை பெற்றனர்.

இந்த விபத்தால் அந்த பகுதியில் பெரும் பரபரப்பு ஏற்பட்டது. அக்கம் பக்கத்தினர் ஓடி சென்று வேனில் வந்தவர்களை மீட்கும் பணியில் ஈடுபட்டனர்.

இதுகுறித்து சித்தோடு போலீசார் வழக்குப்பதிவு செய்து விசாரணை நடத்தி வருகிறார்கள்.

ஈரோடு:

ஈரோடு மாவட்டத்தில் கடந்த சில நாட்களாகவே வெயிலின் தாக்கம் அதிகமாக காணப்பட்டது. இந்த நிலையில் நேற்று இரவு ஈரோடு மாவட்டத்தில் சில இடங்களில் மட்டும் பரவலாக மழை பெய்தது.மழை பெய்யாத பகுதியில் குளிர் காற்று வீசியது.

ஈரோடு கோபி, பெருந்துறை ஆகிய பகுதியில் பரவலாக மழை பெய்தது. அப்பகுதியில் இன்று காலையும் குளிர்ச்சி நிலவுகிறது.

பெருந்துறை:

பெருந்துறையை அடுத்துள்ள பெத்தாம்பாளையம், நரிப்பாளையம் பகுதியை சேர்ந்தவர். அப்பாச்சி இவரது மகன் சங்கர்(29). இவர் பெருந்துறை- ஈரோடு ரோட்டில் இரு சக்கர வாகனம் பழுது பார்க்கும் ஒர்க்ஷாப் வைத்து நடத்தி வந்தார்.

இவருக்கு திருமணமாகி ரம்யா(27) என்ற மனைவியும் ராகுல்(4) என்ற மகனும் உள்ளனர். . தற்பொழுது இவர் ஈரோடு, வில்லரசம் பட்டி பகுதியில் வசித்து வந்தார். நேற்று காலை வழக்கம் போல் வீட்டில் இருந்து ஒர்க்ஷாப்புக்கு சென்றார். ஆனால் இரவு வெகு நேரமாகியும் சங்கர் வீடு திரும்பவில்லை.இதனால் அவரது மனைவி ரம்யா அவரை தேடினார்.

இந்த நிலையில் ஒர்க்ஷாப் பின் உள்புறமுள்ள ரூமின் மேற்கூரையில் இருந்த பேனில் அவர் தூக்கு போட்டு தற்கொலை செய்து கொண்டார்.

இது பற்றி தகவல் கிடைத்ததும் சம்பவ இடத்திற்கு பெருந்துறை போலீசார் சென்று விசாரித்தனர்.

இதன்பிறகு சங்கரின் உடலை கைப்பற்றிய போலீசார் பிரேத பரிசோதனைக்கு பெருந்துறை அரசு மருத்துவமனைக்கு அனுப்பி வைத்தனர்.

இது குறித்து பெருந்துறை போலீஸ் சப்-இன்ஸ்பெக்டர் விஸ்வநாதன் வழக்கு பதிவு செய்து சங்கர் தற்கொலை செய்து கொண்டதற்கான காரணம் குறித்து விசாரணை நடத்தி வருகிறார்.

ஈரோடு:

ஈரோடு அருகே உள்ள மூலக்கரை சுள்ளிக்காடு என்ற இடத்தை சேர்ந்தவர் நடராஜன. இவரது மகன் தீபக் குமார் (வயது 19). ஈரோடு குமலன் குட்டையைசேர்ந்த காஜா என்பவரின் மகன் அமீர்கான் (19).

இவர்கள் இருவரும் பெருந்துறையில் உள்ள ஒரு தனியார் என்ஜினீயரிங் கல்லூரியில் ஈசி.ஈ படித்து வந்தனர்.

நண்பர்களான இவர்கள் நேற்று ஈரோடு-பெருந்துறை ரோட்டில் உள்ள எளையாகவுண்டன் பாளையம் பிரிவு அருகே மோட்டார் சைக்கிளில் வந்து கொண்டு இருந்தனர்.

மோட்டார் சைக்கிளை தீபக் குமார் ஓட்டினார். அமீர் கான் பின்னால் உட்கார்ந்து இருந்தார்.

அப்போது பின்னால் வந்த ஒருவேன் இவர்கள் சென்ற மோட்டார் சைக்கிளின் பின்புறம் மோதியது.

இதில் மோட்டார் சைக்கிள் கட்டுப்பாட்டை இழந்து தாறுமாறாக ஓடி ரோட்டின் நடுவே போடப்பட்டு உள்ள தடுப்பு சுவர் மீது மோதியது.

இதில் தீபக் குமார், அமீர் கான் ஆகிய இருவரும் தூக்கி வீசப்பட்டு படுகாயம் அடைந்தனர். ரத்த வெள்ளத்தில் கிடந்த அவர்களை ஈரோடு அரசு ஆஸ்பத்திரியில் சேர்த்தனர். இதில் ஆபத்தான நிலையில் இருந்த தீபக் குமார் ஈரோடு அரசு ஆஸ்பத்திரிக்கு கொண்டு செல்லப்பட்டார்.ஆனால் வழியிலேயே அவர் பரிதாபமாக இறந்தார்.

அமீர்கான் ஈரோடு அரசு ஆஸ்பத்திரியில் சேர்க்கப்பட்டு சிகிச்சை பெற்று வந்தார். ஆனால் அவரும் சிகிச்சை பலன் இல்லாமல் இன்று அதிகாலை 3 மணிக்கு இறந்தார்.

இது குறித்து ஈரோடு தாலுகா போலீசார் வழக்குப் பதிவு செய்து விசாரணை நடத்தி வருகிறார்கள்.

விபத்தில் இறந்த 2 மாணவர்களின் உடலை பார்த்து அவரது பெற்றோர் மற்றும் உறவினர்கள் மற்றும் சக மாணவர்கள் கதறி அழுதது காட்சி மிகவும் உருக்கமாக இருந்தது.

கோபி:

தமிழக சட்டசபையில் நேற்று தி.மு.க. எம்.எல்.ஏ.க்கள் வெளியேற்றப்பட்டனர். எதிர் கட்சி தலைவர் மு.க.ஸ்டாலின் உள்பட தி.மு.க. எம்.எல்.ஏ.க்கள் வெளியேற்றப்பட்டனர்.

மேலும் தி.மு.க. எம்.எல்.ஏ.க்கள் ஒரு வாரம் சஸ்பெண்டும் செய்யப்பட்டனர். இதையொட்டி தமிழக சபாநாயகரை கண்டித்து தி.மு.க.வினர் போராட்டம் நடத்தி வருகின்றனர்.

கோபி பஸ் நிலையம் அருகே இன்று தி.மு.க.வினர் சபாநாயகரை கண்டித்து ஆர்ப்பாட்டம் நடத்தினர். ஆர்ப்பாட்டத்துக்கு வடக்கு மாவட்ட தலைவர் நல்லசிவம் தலைமை தாங்கினார்.

முன்னாள் எம்.எல்.ஏ.க்கள்., ஜி.வி.வெங்கிடு சுப்பிரமணியம், ராஜேந்திரன், ஒன்றிய செயலாளர்கள் சிறுவலூர் முருகன், (கோபி) சென்னிமலை (நம்பியூர்) மற்றும் கோபி நகர செயலாளர் நாகராஜன், கள்ளிப்பட்டி மணி உள்பட பலர் கலந்து கொண்டனர்.

ஆர்ப்பாட்டத்தில் ஈடுபட்ட 300 பேரை போலீசார் கைது செய்து பஸ்களில் அழைத்து சென்றனர். தி.மு.க.வினரின் போராட்டத்தால் கோபியில் இன்று பரபரப்பான சூழ்நிலை நிலவியது.