ஈரோடு

ஈரோடு:

வேலை தேடி வரும் பெண்களுக்கு வேலை வாங்கி கொடுப்பதாக ஆசை வார்த்தை கூறி சிலர் அழைத்து செல்கிறார்கள். இவ்வாறு அழைத்து செல்லப்பட்ட இளம் பெண்கள் விபசாரத்தில் ஈடுபடுத்தப்படுவதாக போலீசாருக்கு ரகசிய தகவல் கிடைத்தது.

இதையொட்டி ஈரோடு சூரம்பட்டி ராஜாஜி வீதியில் உள்ள ஒரு வீட்டில் போலீசார் திடீர் என்று சோதனை நடத்தினர்.

அப்போது பெண்களை விபசாரத்தில் ஈடுபடுத்தியதாக மெகபூப் பாட்சா, (வயது 39), பிரேமா (27), பேபி (46) ஆகிய 3 பேரை போலீசார் கைது செய்தனர்.

ஈரோடு:

ஈரோடு அரசு ஆஸ்பத்திரி வளாகத்தில் சம்பவத்தன்று சுமார் 45 வயது மதிக்கத்தக்க ஆண் ஒருவர் மயங்கி கிடந்தார். அவரை மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். அந்த நபரை பரிசோதித்த டாக்டர்கள் அவர் ஏற்கனவே இறந்து விட்டதாக தெரிவித்தனர்.

இறந்தவர் யார்? எந்த ஊரை சேர்ந்தவர்? போன்ற விவரம் தெரியவில்லை.

இது குறித்து அரசு தலைமை மருத்துவமனை போலீசார் வழக்குபதிவு செய்து விசாரித்து வருகிறார்கள்.

கோபி:

கோபி அருகே உள்ள அரசூர் பகுதியை சேர்ந்தவர் ஜெய்ஸ்ரீ (வயது 27). இவர் சத்தியமங்கலம் பகுதியில் 108 ஆம்புலன்சில் ஊழியராக வேலை பார்த்து வருகிறார். இவரது அம்மா அரசூர் பகுதியில் மெஸ் வைத்து நடத்தி வருகிறார்.

இந்த நிலையில் அந்த மெஸ்சில் வாடிக்கையாளர்கள் சாப்பிட்டு கொண்டிருந்தனர். அப்போது அங்கு 2 மர்ம ஆசாமிகள் சாப்பிட வந்தனர். பிறகு சாப்பிட்டு விட்டு சென்று விட்டனர்.

அப்போது அங்கு சாப்பிட வந்தவரின் விலை உயர்ந்த செல்போன் ஒன்று காணாமல் போய் விட்டது. இந்த போனை சாப்பிட வந்த மர்ம ஆசாமிகள் 2 பேர் எடுத்து சென்றிருக்கலாம் என சந்தேகிக்கப்படுகிறது.

இது குறித்து ஜெயஸ்ரீ கடத்தூர் போலீசில் புகார் செய்தார்.சப்- இன்ஸ்பெக்டர் காந்திமதி வழக்குப்பதிவு செய்து விசாரணை நடத்தி வருகிறார்கள்.

ஈரோடு:

ஈரோடு, தென்றல் நகரை சேர்ந்தவர் அர்ஜுனன்(வயது31). இவருக்கு திருமணமாகி விட்டது.

அர்ஜுனன் சரியாக வேலைக்கு செல்ல வில்லை என கூறப்படுகிறது. இதனால் கணவன்- மனைவிக்கு இடையே அடிக்கடி தகராறு ஏற்பட்டு வந்தது.

இந்நிலையில் நேற்று மாலை இது தொடர்பாக மீண்டும் அர்ஜினனுக்கும் அவரது மனைவிக்கும் இடையே சண்டை ஏற்பட்டது. இதனால் விரக்தி அடைந்த அர்ஜினன் தற்கொலை செய்ய முடிவெடுத்து வீட்டில் இருந்த எலி மருந்தை(வி‌ஷம்) குடித்தார்.

இதில் உயிருக்கு போராடிய அர்ஜுனனை அருகில் இருந்தவர்கள் மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். எனினும் சிகிச்சை பலனின்றி அர்ஜினன் இன்று காலை பரிதாபமாக இறந்தார்.

இது குறித்து வீரப்பன் சத்திரம் போலீசார் வழக்கு பதிவு செய்து விசாரித்து வருகிறார்கள்.

மொடக்குறிச்சி:

மொடக்குறிச்சி தொகுதி விடுதலை சிறுத்தைகள் கட்சியின் சார்பில் மொடக்குறிச்சி நால்ரோட்டில் கண்டன ஆர்ப்பாட்டம் நடைபெற்றது.

ஆர்ப்பாட்டத்திற்கு இளஞ்சிறுத்தைகள் எழுச்சி பாசறை ஈரோடு மாவட்ட அமைப்பாளர் தனவிஜயன் தலைமை தாங்கினார். மொடக்குறிச்சி தொகுதி துணை செயலாளர் கமலநாதன் வரவேற்றார். மண்டல செயலாளர் விநாயகமூர்த்தி, மாநில துணை பொது செயலாளர் கனிஅமுதன் ஆகியோர் வாழ்த்தி பேசினர்.

மொடக்குறிச்சி பேரூராட்சி தலைவர் பதவி சுழற்சி முறையில் தலித்துகளுக்கு ஒதுக்கப்பட வேண்டும், மொடக்குறிச்சி நால் ரோட்டில் பயணிகள் நிழற் குடை அமைக்க வேண்டும், மொடக்குறிச்சி திருவள்ளுவர் வீதி மயானத்திற்கு சுற்றுச் சுவர் மற்றும் எரிமேடை அமைத்து தரவேண்டும்.

களத்துமின்னப்பாளையம் காலனியில் உள்ள பிரச்சினைகளான குடிநீர் வசதி, பொதுக்கழிப்பிடம், சமுதாயகூடம் உள்பட கோரிக்கைகளை உடனடி யாக நிறைவேற்ற வேண்டும் உள்பட பல்வேறு கோரிக்கை களை வலியுறுத்தி கண்டன ஆர்ப்பாட்டம் நடத்தினர்.

முன்னதாக மொடக்குறிச்சி, களத்து மின்னப் பாளையம் உள்பட பல்வேறு இடங்களில் விடுதலை சிறுத்தைகள் கட்சி சார்பில் கொடியேற்று விழா நடைபெற்றது.

அரச்சலூர்:

அரச்சலூர் அருகே உள்ள பூந்துறை பூவாண்டி வலசு பகுதியை சேர்ந்தவர் முனிராஜ்(வயது33). இவர் கோவை அருகே கருமத்தம்பட்டியில் உள்ள ஒரு தனியார் மில்லில் மேலாளர் ஆக பணி புரிந்து வந்தார்.

இவரது மனைவி அனிதா(32) கர்நாடக மாநிலம் கொள்னே காலை சேர்ந்தவர். 2 பெண் குழந்தைகள் உள்ளனர்.

கணவர்-மனைவி இடையே ஏற்பட்ட கருத்து வேறுபாட்டால் மனைவி அனிதா கணவரை விட்டு பிரிந்து சென்றுவிட்டார். மனைவி சென்றதிலிருந்து முனிராஜ் வருத்தத்துடன் காணப்பட்டார்.

இந்நிலையில் வீட்டில் இருந்த முனிராஜ் வி‌ஷம் குடித்ததாக கூறப்படுகிறது.இதனால் வாந்தி எடுத்த அவரை தாயார் பாவாயி மற்றும் உறவினர்கள் ஈரோட்டில் உள்ள ஒரு தனியார் ஆஸ்பத்திரியில் சேர்த்தனர்.

பிறகு ஈரோடு அரசு ஆஸ்பத்திரியில் சேர்த்தனர்.ஆனால் அங்கு சிகிச்சை பலனின்றி முனிராஜ் பரிதாபமாக இறந்தார்.

இது குறித்து அரச்சலூர் போலீசார் வழக்கு பதிவு செய்து விசாரித்து வருகிறார்கள்.