கடலூர்

கடலூர்:

கடலூர் நகராட்சி 10–வது வார்டு பகுதியான சுதர்சனம் தெரு, வேணுகோபாலபுரம், உப்பலவாடிமெயின்ரோடு உள்ளிட்ட சில தெருக்களில் கடந்த சில நாட்களாக மின் விளக்குகள் எரியவில்லை.

இது குறித்து அந்த வார்டு கவுன்சிலரும், பா.ம.க. மாநில செயற்குழு உறுப்பினருமான போஸ்ராமச் சந்திரன் சம்பந்தப்பட்ட அதிகாரிகளிடம் பல முறை வலியுறுத்தியும், மின் விளக்குகள் சரி செய்யப்படவில்லை.

இதனால் கவுன்சிலர் போஸ் ராமச்சந்திரன் நேற்று இரவு 7 மணி அளவில் மின் விளக்கு எரியாமல் இருந்த சுதர்சனம் தெருவில் தீப்பந்தத்தை ஏந்தி போராட்டம் நடத்தினார். பின்னர் அங்கிருந்த மின்கம்பத்தில் தீப்பந்தத்தை கட்டி வைத்தார்.

பின்னர் இது பற்றி அவர் கூறுகையில், எனது வார்டில் 102 தெரு மின்விளக்குகள் உள்ளன. அதில் 22 தெரு மின்விளக்குகள் கடந்த சில நாட்களாக எரியவில்லை. இது பற்றி நகரசபை கூட்டத்திலும் பலமுறை வலியுறுத்தி விட்டேன். தலைவர், ஆணையாளர், பொறியாளரிடமும் பலமுறை எழுத்து பூர்வமாக கொடுத்து விட்டேன்.

ஆனால் இது வரை மின் விளக்குகளை சரி செய்து தரவில்லை. இதனால் எனது வா ர்டில் திருட்டு, வழிப்பறி போன்ற சம்பவங்கள் நடந்து வருகிறது. ஆகவே இதை தடுக்க மின்விளக்குகளை சரி செய்து தர வேண்டும் என்றார்

பண்ருட்டி:

பண்ருட்டி அருகே உள்ள அக்கடவள்ளி கிராமத்தை சேர்ந்தவர் பாலசுப்ரமணியன் விவசாயி. இவரது மகன் பரணி (வயது 19). கடலூரில் உள்ள தனியார் கல்லூரியில் பி.எஸ்.சி. படித்து வந்தார். தினமும் கல்லூரிக்கு பஸ்சில் சென்று வந்தார்.

கடந்த 19–ந் தேதி பரணி கல்லூரிக்கு சென்றார். பின்னர் அவர் வீடு திரும்பவில்லை. பல இடங்களில் தேடியும் காணவில்லை. இதுகுறித்து புதுப்பேட்டை போலீசில் புகார் செய்யப்பட்டது. போலீசார் வழக்குபதிவு செய்து மாயமான மாணவர் பரணியை தேடி வருகின்றனர்.

கடலூர்:

கடலூர் பஸ் நிலையத்தில் இருந்து இன்று காலை விருத்தாசலத்திற்கு அரசு பஸ் 50 பயணிகளை ஏற்றிக் கொண்டு புறப்பட்டது. பஸ்சை சித்திரைச்செல்வன் ஓட்டினார். பஸ் கடலூர் முதுநகர் பச்சாங்குப்பம் அருகே சென்று கொண்டிருந்த போது எதிரே மற்றொரு அரசு பஸ் வந்தது.

எதிரே வந்த பஸ் மீது மோதாமல் இருப்பதற்காக சித்திரை செல்வன் பிரேக் பிடித்து திருப்பினார். அப்போது பஸ் எதிர்பாராதவிதமாக அவரின் கட்டுப்பாட்டை இழந்து அருகில் இருந்த மின் கம்பம் மீது மோதியது.

இதில் பஸ்சில் பயணம் செய்த பெண் போலீஸ் உள்பட 15 பேர் காயம் அடைந்தனர். பஸ்சின் முன்பக்க கண்ணாடி முற்றிலும் உடைந்து சேதமானது.

மின் கம்பத்தின் மீது பஸ் மோதியதும் மின் இணைப்பு துண்டிக்கப்பட்டது. இதனால் 50 பயணிகளும் உயிர் தப்பினர்.

இது குறித்து கடலூர் முதுநகர் போலீசுக்கு தகவல் தெரிவிக்கப்பட்டது. போலீசார் சம்பவ இடத்திற்கு விரைந்து வந்து காயம் அடைந்தவர்களை மீட்டு சிகிச்சைக்காக கடலூர் அரசு ஆஸ்பத்திரிக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்படுகிறது.

கடலூர்:

கடலூர் செம்மண்டலத்தில் அபய்குமார் என்பவர் அடகுகடை நடத்தி வந்தார். இவரது கடையில் செம்மண்டலம் மற்றும் அதை சுற்றியுள்ள 250–க்கும் மேற்பட்டவர்கள் நகை அடகு வைத்தார்கள். கடந்த 10 ஆண்டுகளாக இந்த வட்டிக்கடை செயல்பட்டு வந்தது.

இந்தநிலையில் கடந்த 6 மாதத்திற்கு முன்பு அபய்குமாரை திடீரென்று காணவில்லை. அடகுகடை தொடர்ந்து பூட்டிக்கிடந்தது. இதனால் பொதுமக்கள் அதிர்ச்சி அடைந்தனர். கடலூர் புதுநகர் போலீசில் புகார் செய்தனர்.

அபய்குமார் நடத்திவந்த அடகுகடையில் 100 பவுனுக்குமேல் அடகு வைத் திருந்தோம். திடீரென்று அவரை காணவில்லை. அவர் மோசடி செய்துவிட்டு தலைமறைவாகி விட்டார் என்று குறிப்பிட்டிருந்தனர். இதையொட்டி போலீசார் வழக்குப்பதிவு செய்து அபய்குமாரை தேடி வந்தனர்.

இந்தநிலையில் அபயக்குமாருக்கு கடையை வாடகைக்கு கொடுத்தவர் இன்று காலை அந்த கடைக்கு வந்தார். கடையின் பூட்டை உடைத்து உள்ளே செல்ல முயன்றார். இதையறிந்த செம்மண்டலத்தை சேர்ந்த ஆண்களும், பெண்களும் அங்கு திரண்டு வந்தனர். அடகுக்கடையை முற்றுகையிட்டனர்.

நகைமோசடி தொடர்பாக போலீசில் புகார் கொடுத்துள்ளோம். இந்தநிலையில் எப்படி கடையை திறக்கலாம் என்று கேட்டு வாக்குவாதம் செய்தனர். இதனால் அங்கு பரபரப்பு ஏற்பட்டது.

தகவல் அறிந்ததும் புதுநகர் போலீஸ் இன்ஸ் பெக்டர் வெற்றிச்செல்வன் மற்றும் போலீசார் அங்கு விரைந்து வந்தனர். முற்றுகை போராட்டத்தில் ஈடுபட்ட பொதுமக்களிடம் சமரச பேச்சுவார்த்தை நடத்தினார்கள்.

தலைமறைவாகிவிட்ட அடகு கடைக்காரரை பிடிப்பதற்கு நடவடிக்கை எடுக்கப்படும் என்று உறுதி அளித்தனர்.

மேலும் அடகுக்கடையை திறக்க முயன்றவரிடம் நகை மோசடி தொடர்பாக போலீஸ் நிலையத்தில் வழக்கு இருக்கும்போது கடையை திறக்கக்கூடாது என்று எச்சரிக்கை விடுத் தனர்.

பின்னர் பொதுமக்கள் அங்கிருந்த கலைந்து சென்றனர். இந்த திடீர் போராட்டத்தால் அந்த பகுதியில் பெரும் பரபரப்பு ஏற்பட்டது.