கடலூர்

சிதம்பரம் அருகே உள்ள கோவிலாம்பூண்டியை சேர்ந்தவர் சந்திரசேகரன். இவரது மனைவி பானுமதி(வயது 34).

சந்திரசேகரன் வெளிநாட்டில் வேலை செய்து வருகிறார். பானுமதி தன் குழந்தைகளுடன் கோவிலாம்பூண்டியில் தனியாக வசித்து வருகிறார். இந்நிலையில் பானுமதியிடம் சந்திரசேகரனின் தம்பி சதீஷ் குமார் ஆபாசமாக பேசி உல்லாசத்துக்கு அழைத்தார்.

இதில கோபமடைந்த பானுமதி அவரை திட்டினார். இதையடுத்து சதீஷ்குமார் அவரது தம்பி நாகராஜ், உறவினர் ரத்தினசாமி ஆகியோர் சேர்ந்து பானுமதியை தாக்கி கொலைமிரட்டல் விடுத்தனர்.

இதுகுறித்து கிள்ளை போலீசில் பானுமதி புகார் செய்தார். இதையொட்டி போலீசார் வழக்குபதிவு செய்து சதீஷ்குமாரை கைது செய்தனர். நாகராஜ், ரத்தினசாமி ஆகியோரை தேடி வருகின்றனர்.

குறிஞ்சிப்பாடி:

குறிஞ்சிப்பாடி ரெட்டித்தெருவில் அரசு ஆண்கள் மேல்நிலைப்பள்ளி உள்ளது. இங்கு ஏராளமான மாணவர்கள் படித்து வருகின்றனர். இந்த பள்ளி கட்டிடத்தின் அருகே 6 அடி உயரத்தில் காம்பவுண்டு சுவர் உள்ளது. கடந்த 2 ஆண்டுகளாக இந்த சுவர் சேதமடைந்து காணப்பட்டது. அதை சீரமைக்க பள்ளி நிர்வாகம் சார்பில் எந்த நடவடிக்கையும் எடுக்கப்படவில்லை.

இந்நிலையில் நேற்று இரவு திடீரென்று காம்பவுண்டு சுவர் இடிந்து விழுந்தது. அந்த பகுதி முழுவதும் கற்கள் சிதறிக்கிடந்தன. இன்று காலை பள்ளிக்கு வந்த ஆசிரியர்கள் மற்றும் மாணவர்கள் இதைப்பார்த்து அதிர்ச்சி அடைந்தனர். காம்பவுண்டு சுவர் நள்ளிரவில் இடிந்து விழுந்ததால் பெரும் பாதிப்பு தவிர்க்கப்பட்டது.

காலையில் விழுந்திருந்தால் மாணவர்களுக்கு அதிக பாதிப்பு ஏற்பட்டிருக்கும்.

ஸ்ரீமுஷ்ணம்:

கடலூர் மாவட்டம் ஸ்ரீமுஷ்ணம் நகரில் முதியவர் ஒருவர் 2 கழுதைகளை வீதிகள் வழியாக ஓட்டி வந்தார். அவர் கழுதைப்பால் வேண்டுமா? கழுதைப்பால் என குரல் எழுப்பினார்.

இந்த குரலை கேட்டவுடன் கழுதைப்பாலா? என பொதுமக்கள் ஆச்சரியத்துடன் வீட்டை விட்டு வெளியே வந்தனர். சிறிது நேரத்தில் கழுதைப்பால் விற்பனை செய்யும் முதியவர் முன்பு கூட்டம் கூடியது.

அப்போது பொதுமக்கள் அந்த முதியவரிடம் நீங்கள் யார்? இந்த காலத்தில் வித்தியாசமாக கழுதைப்பால் விற்பனை செய்கிறீர்களே என்று கேட்டனர். அதற்கு அந்த முதியவர் என் பெயர் ராமசாமி (வயது 62). திட்டக்குடியை சேர்ந்தவன் என்றார். நான் பல வருடங்களாக கழுதைப்பால் விற்பனை செய்து வருகிறேன்.

கழுதைப்பால் குடித்தால் குழந்தைகள், முதியவர்கள் உடல் நலனுக்கு உகந்தது. மஞ்சள்காமாலை, வயிற்றுப்புண், வயிற்று எரிச்சல் போன்ற நோய்கள் வராமல் தடுக்கும். ஜீரணசக்தி அதிகரிக்கும் என்றார்.

மாட்டுப்பால் போன்று கறந்துவைத்து விற்பனை செய்ய முடியாது. கழுதைப்பாலில் நோய் தடுப்பு சக்தி அதிகம் உள்ளது. கழுதைப்பாலை கறந்தஉடனே பருகவேண்டும் என்றார். இதைக்கேட்ட பொதுமக்கள் கழுதைப்பாலை போட்டி போட்டு வாங்கிச் சென்றனர்.

ஒரு பாலாடை (1 அவுன்ஸ்)-ரூ.40 க்கு விற்பனையானது. கழுதைபாலில் இவ்வளவு நன்மை இருக்கிறது என்பது எங்களுக்கு தெரியாமல் போய்விட்டதே என்று கூறிக்கொண்டே கழுதைப்பாலை வாங்கிச்சென்றனர்.

கடலூர்:

கடலூர் அருகே தொத்திக்குப்பம் மீனவர் கிராமம் உள்ளது. இன்று காலை அந்த பகுதியில் கடற்கரையோரத்தில் டால்பின் மீன் இறந்து கிடந்தது. அது 12 அடி நீளமும், 300 கிலோ எடையும் இருந்தது.

அந்த மீன் அருகில் மற்றொரு டால்பின் மீனும் இறந்து கிடந்தது. இதைப்பார்த்த பொதுமக்கள் அதிர்ச்சி அடைந்தனர்.

இதுகுறித்து கடலோர காவல்படைக்கு தகவல் தெரிவிக்கப்பட்டது. கடலோர காவல்படை போலீசார், வனத்துறை அதிகாரிகள் மற்றும் வன ஆர்வலர் பூனம் சந்த் ஆகியோர் அங்கு விரைந்து வந்தனர்.

இறந்து கிடந்த டால்பின் மீன்களை பார்வையிட்டனர். அவைகள் எப்படி? இறந்தன என்று விசாரணை நடத்தி வருகின்றனர்.

இந்த சம்பவம் அந்த பகுதியில் பரபரப்பை ஏற்படுத்தியுள்ளது.

பெண்ணாடம்:

கடலூர் மாவட்டம் பெண்ணாடத்தில் விடுதலை சிறுத்தைகள் தலைவர் திருமாவளவன் இன்று நிருபர்களிடம் கூறியதாவது:-

தமிழ்நாட்டில் கடந்த சில நாட்களாக அரசியல் நிலவரம் பரபரப்பாக காணப்படுகிறது. தமிழகத்தில் தற்போது பொறுப்பு கவர்னர்தான் உள்ளார். உடனே தமிழகத்துக்கு நிரந்தர கவர்னரை நியமிக்கவேண்டும். தற்போது நடைபெறும் அரசியல் சூழ்நிலையில் கவர்னர் முடிவு ஏதும் தெரிவிக்காமல் தாமதப்படுத்துகிறார்.

எம்.எல்.ஏ.க்களை கவர்னர் தனித்தனியாக அழைத்து விசாரிக்கக்கூடாது. அது ஜனநாயக விதி முறைக்கு உட்பட்டது கிடையாது. யாருக்கு பெரும்பான்மை உள்ளதோ அவரை உடனே ஆட்சி அமைக்க கவர்னர் அழைக்க வேண்டும். தாமதப்படுத்தக்கூடாது.

கடந்த சில மாதங்களாக அரியலூர் மாவட்டம் சிறுகடம்பூர், கடலூர் மாவட்டம் மா.புடையூர் ஆகிய பகுதிகளில் தலித் சிறுமிகளை பாலியல் பலாத்காரம் செய்த இளைஞர்கள் மீது வழக்கு மட்டும் பதிவு செய்யப்பட்டது. அந்த வழக்கை வன்கொடுமை தடுப்பு சட்டத்தின் கீழ் பதிவு செய்ய வேண்டும்.

சிறுகடம்பூரில் நந்தினி என்ற தலித் சிறுமியை பாலியல் பலாத்காரம் செய்து கொலை செய்தனர். அப்போது நந்தினி கர்ப்பிணியாக இருந்துள்ளார். அந்த வழக்கை இரட்டை கொலை வழக்காக பதிவு செய்ய வேண்டும். உடனே சி.பி.சி.ஐ.டி. விசாரணைக்கு மாற்றவேண்டும்.

இதேபோல் தமிழகம் முழுவதும் தலித் சிறுமிகளை பாலியல் பலாத்காரம் செய்யும் சம்பவங்கள் தொடர்ந்து நடக்கிறது. இதுபற்றி போலீசில் புகார் செய்பவர்களை அழைத்து சமாதானப் படுத்தி போலீசார் அனுப்பிவைக்கின்றனர். இதை விடுதலை சிறுத்தை கட்சி வன்மையாக கண்டிக்கிறது.

இவ்வாறு திருமாவளவன் கூறினார்.

பண்ருட்டி:

இந்து மக்கள் கட்சியின் தலைவர் அர்ஜூன் சம்பத், கடலூர் மாவட்டம், பண்ருட்டி திருவதிகை வீரட்டானேஸ்வரர் கோவிலில் சாமி தரிசனம் செய்ய வந்தார். பின்னர் அவர் நிருபர்களுக்கு பேட்டி அளித்தார்.

தமிழக அரசியல் நிலவரம் தெரிந்த ஒருவரையே மத்திய அரசு, தமிழகத்துக்கு நிரந்தர கவர்னராக உடனடியாக நியமிக்க வேண்டும்.

தமிழக மக்கள் திராவிட கட்சிகளை புறக்கணிக்க வேண்டும். ஓ.பன்னீர்செல்வம், சசிகலா, தீபா, மு.க.ஸ்டாலின் எல்லோருமே ஒரே குட்டையில் ஊறிய மட்டைகள்தான். இவர்களால் தமிழ்நாட்டு மக்களுக்கு எந்த நன்மையும் கிடைக்கப் போவதில்லை. எம்.எல்.ஏ.க் களை கடத்துவது என்பது தமிழகத்துக்கு புதிதல்ல. இவை திராவிட கட்சிகளின் கலாச்சாரம்.

உயர் மதிப்புள்ள பண ஒழிப்பு நடவடிக்கையால் மோடி உலக தலைவராக உயர்ந்துள்ளார். இதில் மக்களுக்கு இப்போது எந்த பிரச்சினையும் இல்லை. தமிழ்நாட்டில் தீவிரவாதிகள் உள்ளனர். இதை தடுக்க கோவை, நெல்லை, மதுரை ஆகிய இடங்களில் மத்திய புலனாய்வு துறை அலுவலகங்கள் அமைக்க வேண்டும்.

இவ்வாறு அவர் கூறினார்.