அரியலூர்

ஜெயங்கொண்டம்:

ஜெயங்கொண்டம் அருகேயுள்ள அணைக்குடம் கிராமத்தைச் சேர்ந்தவர் செல்வராஜன் ( வயது 45) விவசாயி. இவருக்கு சொந்தமான தைலமரத்தோப்பின் வழியாக மின் கம்பிகள் செல்கின்றன. மின்கம்பிகள் தாழ்வாகவும், தைலமரத்தின் மீது உரசி கொண்டு செல்வதால் எந்த நேரத்திலும் தீப்பற்றி எரிய வாய்ப்பு இருப்பதாக அப்பகுதி பொதுமக்கள் மின்வாரிய ஊழியர்கள் தெரிவித்தனர். ஆனால் ஊழியர்கள் அதனை கண்டுகொள்ளவில்லை என்று கூறப்படுகிறது.

இந்நிலையில் இன்று அதிகாலை மின்கம்பத்தில் உள்ள பீங்கான் வெடித்து அதன்வழியே ஏற்பட்ட தீ தைலமரத் தோப்பில் பற்றியது. தீ மளமளவென பற்றியதில் அங்கிருந்த மரங்கள் எரிந்தன.

இது குறித்து ஜெயங்கொண்டம் தீயணைப்பு நிலையத்திற்கு தகவல்கொடுத்ததின் பேரில் நிலைய அலுவலர் சங்கரன் தலைமையில் வீரர்கள் வந்து தீயை அணைத்தனர். இதனால் பெரும் தீ விபத்து தவிர்க்கப்பட்டது. இருப்பினும் ஒரு ஏக்கரில் பயிரிடப்பட்ட தைலமரங்கள் எரிந்து நாசமானது.

அரியலூர்:

அரியலூர் மாவட்ட கலெக்டர் சரவணவேல் ராஜ் வெளியிட்டுள்ள அறிக்கையில் கூறியதாவது:

அரசு உதவிபெறும் கல்வி நிறுவனங்கள் மற்றும் தனியார் தொழிற் கல்லூரிகளில் அரசு ஒதுக்கீட்டின் கீழ் பயிலும் பிற்படுத்தப்பட்ட, மிகப் பிற்படுத்தப்பட்ட மற்றும் சீர்மரபினர் (பி.சி, எம்.பி.சி, டி.என்.சி) மாணவ, மாணவியர்களுக்கு தமிழக அரசு பல்வேறு திட்டங்களின் கீழ் கல்வி உதவித் தொகை வழங்கி வருகிறது.

அரசு மற்றும் அரசு உதவி பெறும் கலை மற்றும் அறிவியல் கல்லூரிகளில் இளங்கலை பட்டப் படிப்பு பயிலும் மாணவ, மாணவியருக்கு எவ்வித நிபந்தனையுமின்றி கல்வி உதவித் தொகை வழங்கப்படுகிறது.

முதுகலை, பாலிடெக்னிக், தொழிற்படிப்பு போன்ற பிற படிப்புகளுக்கு பெற்றோரது ஆண்டு வருமானம் ரூ.2,00,000–க்கு மிகாமல் இருத்தல் வெண்டும்.

உதவித்தொகைக்கான விண்ணப்ப படிவங்களை மாணவர்கள் அவர்கள் பயிலும் கல்வி நிறுவனங்களிலேயே பெற்று பூர்த்தி செய்து உரிய சான்றுகளுடன் கல்வி நிலையங்களில் சமர்ப்பிக்க வேண்டும். மாணவ, மாணவியர்கள் தங்களின் வங்கி கணக்கு எண் மற்றும் ஆதார் எண் விவரங்களை தவறாது குறிப்பிட வேண்டும்.

மேலும் விவரங்களுக்கு மாவட்ட கலெக்டர் அலுவலகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தை அணுகலாம்.

இவ்வாறு இந்த அறிக்கையில் கூறப்பட்டுள்ளது.

ஜெயங்கொண்டம்:

ஜெயங்கொண்டம் அருகே உள்ள சிலம்பூர் கிராமத்தைச் சேர்ந்தவர் முத்துராமலிங்கம், இவர் விழுப்புரம் மாவட்டத்தில் சப்-இன்ஸ்பெக்டராக பணிபுரிந்து வருகிறார்.

இந்நிலையில்கடந்த 18-ம் தேதி இவரின் 2-வது மகன் செந்தமிழ்ச்செல்வன் மற்றும் நான்காவது மகன் செல்வமுருகன் இருவரும் குடிபோதையில் வீட்டில் சண்டைபோட்டுள்ளனர்.

இதில் கோபமடைந்த செந்தமிழ்ச் செல்வன் தனது தம்பியை பலமாக தாக்கியுள்ளார். இதில் பலத்த காயம் அடைந்த அவர் சம்பவ இடத்திலேயே உயிரிழந்தார். இதனால் அதிர்ச்சியடைந்த செந்தமிழ்ச் செல்வன் வி‌ஷம் குடித்துவிட்டு ஜெயங்கொண்டம் அரசு ஆஸ்பத்திரியில் சிகிச்சை பெற்று நேற்று வீடு திரும்பினார்.

தம்பியை கொலை செய்த குற்றத்திற்காக ஆண்டிமடம் போலீசார் செந்தமிழ்ச் செல்வனை கைது செய்து விசாரித்து வருகின்றனர்.

அரியலூர்:

அரியலூர் மாவட்ட கலெக்டர் அலுவலகத்தில் கலெக்டர் சரவணவேல்ராஜ் தலைமையில் கடந்த 13–ந்தேதி மக்கள் குறை தீர்க்கும் கூட்டம் நடைபெற்றது.

கூட்டத்துக்கு பத்திர பதிவுத்துறை உயர் அதிகாரிகள் வரவில்லை என கூறப்படுகிறது. இதையடுத்து அரியலூர் மாவட்ட பதிவாளர் நிர்வாக பிரிவு அலுவலகத்தை பூட்ட கலெக்டர் உத்தரவிட்டார். கடந்த 13–ந்தேதி மதியத்தில் இருந்து 14–ந்தேதி மதியம் வரை அந்த அலுவலகம் பூட்டப்பட்டிருந்தது.

பணி செய்து கொண்டிருந்த பணியாளர்களையும் சேவை பெற வந்த பொதுமக்களையும் வெளியேற்றி விட்டு, அலுவலகத்தை பூட்டியதால் பதிவுத்துறை பணியாளர்கள் அதிர்ச்சியடைந்தனர்.

அரியலூர் மாவட்ட பதிவாளர் 14–ந்தேதி அன்று கலெக்டரிடம் மன்னிப்பு கோரிய பின்னர், அந்த அலுவலகம் மீண்டும் திறக்கப்பட்டது. இந்த சம்பவம் பதிவுத்துறை அலுவலர்கள் மத்தியில் சலசலப்பை ஏற்படுத்தியது.

இதையடுத்து அரியலூர் கலெக்டரை கண்டித்து போராட்டம் நடத்த பதிவுத்துறையை சேர்ந்த 3 சங்கங்கள் இணைந்து கூட்டு நடவடிக்கை குழுவை உருவாக்கின.

இந்த குழு எடுத்த முடிவின்படி இன்று தமிழகத்தில் உள்ள சுமார் 65000 பதிவுத்துறை பணியாளர்கள் கருப்பு பேட்ஜ் அணிந்து பணி செய்வது எனவும், ஜூலை 16–ல் திருச்சியில் கூடி அடுத்தகட்ட நடவடிக்கை குறித்து ஆலோசித்து முடிவு செய்வது எனவும் தீர்மானித்தனர்.

அதன்படி தமிழகம் முழுவதும் உள்ள 574 சார்பதிவாளர் அலுவலகங்கள், 50 மாவட்ட பதிவாளர் அலுவலகங்கள், 9மண்டல அலுவலகங்களில் பணிபுரியும் ஊழியர்கள் அனைவரும் இன்று கருப்பு பேட்ஜ் அணிந்து பணியாற்றினர். அரியலூரில் மாவட்ட பதிவாளர் அலுவலகம் மற்றும் 20 சார்பதிவாளர் அலுவலகங்களில் பணிபுரியும் 60 ஊழியர்கள் கருப்பு பேட்ஜ் அணிந்து பணியாற்றினர்.

மேலும் அனைத்து பதிவுத்துறை அலுவலகங்கள் முன்பு, போராட்ட காரணம் குறித்து பதாகைகள் வைத்திருந்தனர்.

ஜெயங்கொண்டம்:

அரியலூர் மாவட்டம் ஜெயங்கொண்டத்தை அடுத்த ஆண்டிமடம் அருகே உள்ள சிலம்பூர் கிராமத்தைச் சேர்ந்தவர் முத்துராமலிங்கம். இவர் விழுப்புரம் மாவட்டம் இளவரசன்கோட்டையில் சப்-இன்ஸ்பெக்டராக பணி புரிந்து வருகிறார்.

இவரது மனைவி செல்லம்மாள். இவர்களுக்கு 4 மகன்கள் உள்ளனர். முதல் மகன் அறிவுசெல்வன் தனது மனைவியுடன் வடலூரிலும், மூன்றாவது மகன் வெற்றிச்செல்வன் தனது மனைவியுடன் திருப்பூரில் வசித்து வருகிறார்கள்.

இரண்டாவது மகன் செந்தமிழ்ச்செல்வன் (26) மற்றும் 4-வது மகன் செல்வமுருகன் (23) இருவரும் டிப்ளமோ படிப்பை பாதியில் நிறுத்தி விட்டு வீட்டில் இருந்து வருகின்றனர்.

செந்தமிழ்ச்செல்வன், செல்வமுருகன் இருவரும் குடிப்பழக்கத்திற்கு அடிமையாகி தினமும் குடித்து விட்டு வீட்டில் சண்டை போட்டுக் கொள்வதை வழக்கமாக கொண்டிருந்தனர்.

கடந்த சில தினங்களாக செல்வமுருகன் சொத்தில் பங்கு கேட்டும், தனக்கு திருமணம் செய்துவைக்ககோரியும் அவரது தாயார் செல்லம்மாளிடம் சண்டை போட்டு வந்துள்ளார். இந்தநிலையில் நேற்று செந்தமிழ்ச்செல்வன், செல்வமுருகன் இருவரும் இடையக்குறிச்சியில் உள்ள டாஸ்மாக்கில் மது அருந்தி விட்டு வீட்டிற்கு வந்துள்ளனர்.

செல்வமுருகன் தனது தாயிடம் சண்டை போட்டுள்ளார். இதைபார்த்த வெற்றிச்செல்வன் தனது தம்பியை தடுத்து தாக்கியுள்ளார். இதனால் அண்ணன், தம்பி இருவரும் சண்டை போட்டுக்கொண்டனர். இதில் எதிர்பாராதவிதமாக கீழே விழுந்த செல்வமுருகன் அருகில் உள்ள கருங்கல் உரலில் தலை அடிபட்டு சம்பவ இடத்திலேயே பலியானார்.

இதுகுறித்து தகவல் அறிந்ததும் ஆண்டிமடம் (பொறுப்பு) இன்ஸ்பெக்டர் வேலுச்சாமி சம்பவ இடத்திற்கு விரைந்து சென்று பலியான செல்வமுருகன் உடலை கைப்பற்றி அவரது அண்ணன் செந்தமிழ்ச் செல்வனை தேடி வந்தார்.

இதற்கிடையே செந்தமிழ்ச் செல்வன் தம்பியை கொன்று விட்டோமே என்று மன வேதனையில் வீட்டில் இருந்த பூச்சி மருந்தை குடித்து விட்டு வீட்டுக்கு அருகில் மயங்கி கிடந்துள்ளார். அக்கம் பக்கத்தினர் அவரை மீட்டு ஜெயங்கொண்டம் அரசு மருத்துவமனையில் சிகிச்சைக்காக சேர்த்தனர்.

குடிபோதையில் சப்- இன்ஸ்பெக்டரின் இரண்டு மகன்களும் அடித்துக் கொண்டு ஒருவர் இறந்தும், மற்றொருவர் ஆபத்தான நிலையில் சிகிச்சை பெற்று வருவது ஆண்டிமடம் பகுதியில் பரபரப்பை ஏற்படுத்தியுள்ளது.

அரியலூர்:

அரியலூர் மாவட்டம், வெள்ளுர் அரசு உயர் நிலைப்பள்ளியில் நடைபெற்று வரும் பள்ளி புதிய கட்டடப் பணிகளை மாவட்ட கலெக்டர் எ.சரவண வேல்ராஜ் பார்வையிட்டு கட்டுமான பணிகளை உரிய காலத்திற்குள் விரைந்து முடித்திட அலுவலர்களுக்கு உரிய ஆலோசனைகளை வழங்கினார்கள்.

இந்த ஆய்வின்போது, மாவட்ட கலெக்டர் செய்தியாளர்களிடம் தெரிவித்ததாவது :–

தமிழக முதல்வர் கல்விக்காக மொத்த வரவு செலவுத்திட்டத்தில் 6–ல் ஒரு பகுதியை கல்விக்காக ஆண்டுதோறும் ஒதுக்கீடுசெய்து, விலையில்லா பாடப்புத்தகம், மிதிவண்டி, மடிக்கணினி, சீருடை என பல்வேறு நலத்திட்ட உதவிகளை செய்து, தேர்ச்சிலும், மதிப்பெண் விழிக்காட்டிலும் மற்ற மாநிலங்களை காட்டிலும் முதன்மை மாநிலமாக கொண்டு செல்வதோடு மட்டுமல்லாமல் பள்ளிகளுக்கு தேவையான கட்டமைப்பு வசதிகளையும், தேவையான அளவிற்கு உரிய காலத்தில் நிறைவேற்றி வருகிறார்கள்.

இந்நிலையில், அனைவருக்கும் இடை நிலைக்கல்வித் திட்டம் மூலமாக 2010–11ம் ஆண்டில் தாமரைக்குளம் மற்றும் சாத்தம்பாடி ஆகிய இரண்டு பள்ளிகளும், 2011–12ம் ஆண்டில் வாரணவாசி, வெள்ளுர், ரெட்டிப்பாளையம், தென்கச்சிபெருமாள் நத்தம், கொல்லாபுரம், நாகம்பந்தல், உல்லியக்குடி மற்றும் தூத்தூர் ஆகிய 8 பள்ளிகளும், உயர் நிலைப்பள்ளிகளாக தரம் உயர்த்தப்பட்டுள்ளன. இதில் தூத்தூர் உயர்நிலைப் பள்ளிக்கு இடம் தேர்வு நிலையில் உள்ளது.

இப்பள்ளியை தவிர மற்ற பள்ளிகளுக்கு 2015–16 ஆம் கல்வியாண்டில் ஒரு பள்ளிக்கு ரூ.168.81 இலட்சம் வீதம் தாமரைக்குளம் மற்றும் சாத்தம்பாடி இரண்டுப் பள்ளிகளுக்கு ரூ.337.62 இலட்சம் நிதி ஒதுக்கீடும், மீதமுள்ள எட்டுப் பள்ளிகளுக்கு ரூ.144 இலட்சம் நிதியை முதல் தவணையாக நிதி ஒதுக்கீடு பெறப்பட்டு பொதுப்பணித் துறையின் மூலமாக 10 பள்ளிகளுக்கான புதிய கட்டட கட்டுமானப் பணிகள் நடைபெற்றுவருகிறது. இப்பணிகளில் வெள்ளுரில் நடைபெற்றுவரும் புதிய பள்ளி கட்டடப் பணிகளை பார்வையிட்டு, ஆய்வு செய்யப்பட்டுள்ளது.

அனைத்து கட்டுமான பணிகளும் உரிய காலத்திற்குள் விரைந்து முடிக்க அலுவலர்களுக்கு உத்தரவிடப்பட்டுள்ளது. நடப்பு கல்வி ஆண்டிலேயே புதிய கட்டடங்கள் பயன் பாட்டிற்கு விடப்படும் என மாவட்ட கலெக்டர் எ.சரவணவேல்ராஜ் தெரிவித்தார்.

ஆய்வின் போது, மாவட்ட முதன்மை கல்வி அலுவலர் மாரிமுத்து, செய்தி மக்கள் தொடர்பு அலுவலர் அ.செந்தில் உள்ளிட்ட பலர் உடன் சென்றனர்.