அரியலூர்

ஜெயங்கொண்டம:

ஜெயங்கொண்டம் அருகே உள்ள உடையார்பாளையம் வெள்ளாளர் தெருவைச் சேர்ந்தவர் வேதநாயகம் (வயது 40) இவர் சென்னை மகாதானபுரத்தில் வசித்து வருகிறார். இவரது தாய் வைரம் உடையார் பாளையத்தில் தனியாக வசித்து வருகிறார்.

சம்பவத்தன்று வைரம் வீட்டில் தூங்கி கொண்டிருந்தார். அப்போது மர்ம நபர்கள் சிலர் வீட்டில் புகுந்து வைரத்தின் கழுத்தை கையால் நெரித்து சத்தம் போட்டால் கொலை செய்து விடுவோம் என மிரட்டினர். பின்னர் அவர் கழுத்தில் கிடந்த 4 பவுன் தங்க செயினை பறித்து கொண்டு தப்பி சென்றனர்.

இது குறித்து அவரது மகன் வேதநாயகம் ஜெயங்கொண்டம் போலீசில் புகார் செய்தார். அதன் பேரில் போலீசார் வழக்குபதிவு செய்து விசாரணை நடத்தி வருகின்றனர்.

ஜெயங்கொண்டம்:

ஜெயங்கொண்டம் தூத்தூர் அருகேயுள்ள கே.மாத்தூர் கிராமம் வடக்குத் தெருவைச் சேர்ந்தவர் பழனிவேல் ( வயது 48). விவசாயி. இவர் கடந்த 2-ம் தேதி மதியம் தனது மனைவி மாலாவிடம் குடிப்பதற்கு பணம் கேட்டுள்ளதாக தெரிகிறது. அதற்கு மாலா மறுத்துள்ளார்.

இதனால் பழனிவேல் கோபித்துக் கொண்டு வீட்டின் பின்புறம் பருத்தி செடிக்கு அடிக்க வைத்திருந்த பூச்சி மருந்தை எடுத்து குடித்து விட்டார். இதனால் அவர் வீட்டிற்கு மயங்கி விழுந்தார். அக்கம் பக்கத்தினர் அவரை மீட்டு திருவையாறு அரசு மருத்துவ மனையில் சேர்த்தனர். அங்கு அவருக்கு முதல் உதவி சிகிச்சை அளிக்கப்பட்ட பின்னர் மேல்சிகிச்சைக்காக தஞ்சாவூர் மருத்துவக்கல்லூரி மருத்துவமனையில் சிகிச்சை பெற்று வந்தார்.

இந்த நிலையில் சிகிச்சை பலனின்றி நேற்று காலை பரிதாபமாக பழனிவேல் இறந்தார். இது குறித்து அவரது மகன் ஐயப்பன் தூத்தூர் போலீசில் புகார் செய்தார். அதன் பேரில் போலீஸ் சிறப்பு சப் இன்ஸ்பெக்டர் செல்வம் வழக்கு பதிவு செய்து விசாரணை நடத்தி வருகிறார்.

அரியலூர்:

அரியலூர் மாவட்டத்தில் 2016 ஊரக மற்றும் நகர்புற உள்ளாட்சி தேர்தல்கள் 17.10.2016 மற்றும் 19.10.2016 ஆகிய தேதிகளில் இரண்டு கட்டமாக நடைபெறவுள்ளது.

இதற்காக அரியலூர் மற்றும் பெரம்பலூர் மாவட்டத்திற்கு பொதுத் தேர்தல் பார்வையாளாராக ஆர்.லால்வீணாவை தமிழ்நாடு தேர்தல் ஆணையம் நியமித்துள்ளது. பொதுத்தேர்தல் பார்வையாளர் பெரம்பலூர் மாவட்ட சுற்றுலா மாளிகை அறை எண்.01-ல் தங்கியுள்ளார். பொதுமக்கள் உள்ளாட்சித் தேர்தல் தொடர்பாக பொதுப்பார்வையாளரை 9436960360 என்ற கைபேசி எண்ணிலும் தொடர்பு கொள்ளலாம் என மாவட்ட தேர்தல் அலுவலர் எ.சரவணவேல்ராஜ், தெரிவித்துள்ளார்.

ஜெயங்கொண்டம்:

அரியலூர் மாவட்டம் ஜெயங்கொண்டம் அடுத்த அணைக்குடம் கிராமத்தில் வடக்குவெளியிலுள்ள முந்திரிகாட்டில் சுமார் 30 வயதுமிக்க வாலிபர் ஒருவர், அங்குள்ள முந்திரி மரத்தில் சேலையில் தூக்கிலிட்டு உடல் சிதைந்த நிலையில் இறந்து கிடந்தார்.

இந்தநிலையில் அந்த வழியே சென்ற பொதுமக்களுக்கு கடுமையான துர்நாற்றம் வீசியது. இதில் சந்தேகமடைந்த பொதுமக்கள் முந்திரிகாட்டில் சென்று பார்த்தபோது வாலிபரின் பிணத்தை கண்டு அதிர்ச்சி அடைந்தனர். பின்னர் இதுகுறித்து தகவலறிந்து வந்த கிராம நிர்வாக அலுவலர் சிவக்குமார் தா.பழூர் போலீசுக்கு தகவல் கொடுத்ததின் பேரில் இன்ஸ்பெக்டர் ராதாகி ருஷ்ணன் மற்றும் போலீசார் சம்பவ இடத்திற்கு விரைந்து வந்து இறந்த வாலிபரின் உடலை கைப்பற்றி ஜெயங்கொண்டம் அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

பின்னர் வழக்கு பதிந்து, இறந்த வாலிபர் யார் என்றும், அவர் தற்கொலை செய்து கொண்டாரா? அல்லது யாரேனும் அடித்து கொலை செய்தார்களா? என்பது பற்றி பல்வேறு கோணங்களில் விசாரணை நடத்தி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியது.

ஜெயங்கொண்டம்:

ஜெயங்கொண்டம் அருகேயுள்ள மணக்கொல்லை கிராமத்தைச் சேர்ந்தவர் சின்னப்பன் மகன் அந்தோணி ஜோசப் (வயது 39). இவர் நேற்று மதியம் தனது மோட்டார் சைக்கிளில் மனைவி ஆரோக்கிய மேரியை அழைத்துக் கொண்டு ஜெயங்கொண்டம் கோர்ட்டுக்கு வந்துள்ளார்.

பின்னர் மீண்டும் வீட்டிற்கு செல்வதற்காக கீழக்குடியிருப்பு கிராமம் அருகே சென்றுகொண்டிருந்தபோது எதிரே வந்த மினி சரக்கு வேன் மோதியது. இதில் பின்னால் உட்கார்ந்து வந்த ஆரோக்கிய மேரி தூக்கி எறியப்பட்டார். பலத்த காயமடைந்தவரை காப்பாற்றி ஜெயங்கொண்டம் அரசு மருத்துவமனையில் சிகிச்சைக்காக சேர்த்தார்.

இது குறித்து அந்தோணி ஜோசப் ஜெயங்கொண்டம் போலீசில் புகார் கொடுத்தார். அதன் பேரில் சிறப்பு சப் - இன்ஸ்பெக்டர் செல்வம் வழக்கு பதிவு செய்து மினி சரக்கு வேன் ஓட்டி வந்து விபத்து ஏற்படுத்திய கல்லாத்தூர் அண்ணாநகரைச் சேர்ந்த அண்ணாமலை மகன் பழனிசாமி (34) என்பவரை கைது செய்து விசாரித்து வருகின்றார்.

அரியலூர்:

அரியலூர் மாவட்டத்தில், மாவட்ட நிர்வாகத்தின் அறிவுரையின்படி அரியலூர் நகராட்சிக்குட்பட்ட செட்டி ஏரி மெயின் வரத்து வாய்க்கால், சித்தேரி வாய்க்கால் சுத்தம் செய்யும் பணி நடைபெற்று வருகிறது.

நகராட்சிக்குட்ப்பட்ட பகுதிகளில் உள்ள கருவேல மரங்கள் அகற்றப்பட்டு வருகின்றது. மேலும், மழைகால முன்னெச்சரிக்கை நடவடிக்கையாக போர்க்கால அடிப்படையில் மழைநீர் வடிகால் அமைப்புகளை தூர்வாரும் பணிகள் மேற் கொள்ளப்பட்டு வருகிறது என அரியலூர் ஆணையர் (பொறுப்பு) சரஸ்வதி தெரிவித்துள்ளார்.