அரியலூர்

அரியலூர்:

அரியலூர் அருகே கோயில் உண்டியலை உடைத்து அதில் இருந்த காணிக்கை பொருள்களை திருடிச் சென்ற மர்ம நபர்களை காவல் துறையினர் தேடி வருகின்றனர்.

அரியலூர் மாவட்டம் கடுகூர் அருகேயுள்ள பூமுடையான்பட்டி கிராமத்தில் பெரியநாயகி மற்றும் சந்தனத்தாய் அம்மன் கோயில் உள்ளது.

இந்நிலையில், இன்று காலை அப்பகுதி பொதுமக்கள் சுவாமி தரிசனம் செய்ய வந்தபோது, கோயிலின் கதவு மற்றும் உள்ளே இருந்த உண்டியல் ஆகியவை உடைக்கப்பட்டிருப்பதைக் கண்டு அதிர்ச்சியடைந்தனர்.

உண்டியலில் ரூ.5 ஆயிரம் காணிக்கைகள் இருந்திருக்கலாம் எனக் கூறப்படுகிறது. இது குறித்து தகவலறிந்து வந்த கயார்லாபாத் காவல் துறையினர், ஆய்வு செய்து, வழக்கு பதிந்து விசாரிக்கின்றனர்.

அரியலூர்:


அரியலூர் மாவட்டம் தா.பழூர் போலீசார்  இரவு கோடாலிகருப்பூர் பகுதியில் ரோந்துப் பணியில் ஈடுபட்டிருந்தனர். அப்போது அங்குள்ள கொள்ளிடம் ஆற்றுப்பாலம் அருகில் கடப்பாறை உள்ளிட்ட ஆயுதங்களுடன் நின்று கொண்டிருந்த 5 பேரை பார்த்தனர். உடனடியாக அவர்களை பிடித்து விசாரணை நடத்தினர்.

இதில் அவர்கள் கோடாலி கருப்பூர் தோப்பு தெருவைச் சேர்ந்த பாண்டித்துரை (வயது 40) வீரமணி (43) குடவாசல் தெருவைச் சேர்ந்த தங்கராசு (30) அவரது தம்பி முருகன் (25) குவாகம் வெற்றித் தெருவைச் சேர்ந்த அருள்மணி (31) ஆகியோர் என்பதும் ,

அன்று இரவு கோடாலிகருப்பூர் தொடக்க வேளாண்மை கூட்டுறவு வங்கியில் கொள்ளையடிக்க திட்டமிடப்பட்டிருந்ததும் தெரிய வந்தது. அவர்களை போலீசார் கைது செய்து கடப்பாறை உள்ளிட்ட பொருட்களை பறிமுதல் செய்து போலீஸ்நிலையத்திற்கு அழைத்து சென்று, வழக்கு பதிவு செய்து விசாரணை நடத்தி வருகின்றனர்.

அரியலூர்:



தேசிய நுகர்வோர் பாதுகாப்பு மற்றும் உலக நுகர்வோர் உரிமைகள் தின விழா அரியலூர் மாவட்ட ஆட்சியர் அலுவலக கூட்டரங்களில் நடைபெற்றது.

விழாவில் கலந்து கொண்ட கலெக்டர் ரமணசரஸ்வதி பேசிய போது, இந்தியாவிலேயே நுகர்வோர் பாதுகாப்பில் தமிழகம் முன்னோடி மாநிலமாக திகழ்ந்து வருகிறது.

நுகர்வோர் கடைகளில் ஒரு பொருளை வாங்கினால் மட்டும் போதாது, அதனுடைய தயாரிக்கப்பட்ட நாள், காலாவதியாகும் நாள் அதனுடைய தர முத்திரை ஆகியவற்றை பார்த்த பிறகே வாங்க வேண்டும். முக்கியமாக வாங்கும் பொருள்கள் அனைத்திற்கும் ரசீது பெறப்படவேண்டும்.

உணவுப் பொருள்களில் ஏதேனும் கலப்படம் மற்றும் குறைகள் இருந்தால் அது குறித்து சம்மந்தப்பட்ட அலுவலர்களுக்கு புகார் அளிக்க வேண்டும். அரியலூர் மாவட்டத்தை பொறுத்தவரை உணவுப்பொருள்கள் உள்ளிட்ட நுகர்வோரின் புகார் குறித்து உடனுக்குடன் நடவடிக்கை எடுக்கப்பட்டு வருகிறது.

இது குறித்து பொதுமக்களிடையே அதிக விழிப்புணர்வு ஏற்படுத்தும் வகையில் பள்ளி, கல்லூரி மாணவ, மாணவிகளிடையே விழிப்புணர்வு போட்டிகள் நடத்தப்பட்டு வருகிறது. இதன் பயனாக சம்மந்தப்பட்ட மாணவர்களின் குடும்பங்களும் விழிப்புணர்வு அடைய முடியும்.

நுகர்வோர் பாதுகாப்பிற்கான உரிமை, தகவல்பெறும் உரிமை, விருப்பத்தின் அடிப்படையில் தேர்வு செய்யும் உரிமை, பிரதிநிதித்துவத்திற்கான உரிமை, குறை தீர்க்கப்படுவதற்கான உரிமை, நுகர்வோர் கல்விக்கான உரிமை, சுகாதாரமான சுற்றுச்சூழலுக்கான உரிமை, அடிப்படை தேவைகளுக்கான உரிமை உள்ளிட்ட அடிப்படை

உரிமைகளும், விழிப்புணர்வோடு இருத்தல், ஈடுபாட்டுடன் இருத்தல், தேவைக்கு அதிகமான நுகர்வைத் தவிர்த்தல், தவறுசெய்யும் உற்பத்தியாளர்கள், வணிகர்கள் பற்றி புகார் செய்தல், பொருள்களையும் சேவைகளையும் முறையாகப் பயன்படுத்தல், சுற்றுச்சூழல் குறித்து பொறுப்புணர்ச்சி கூட்டு முயற்சி உள்ளிட்ட கடமைகள் குறித்தும் விளக்கமாக தெரிந்து வைத்திருக்க வேண்டும் என்றார்.

பின்னர்விழிப்புணர்வு போட்டிகளில் வெற்றிப் பெற்ற மாணவ, மாணவிகளுக்கும், தன்னார்வ நுகர்வோர் அமைப்புகளுக்கும் ஊக்கப் பரிசு மற்றும் பாராட்டுச் சான்றிதழ்களை கலெக்டர் வழங்கினார்.

அரியலூர்:

அரியலூர் மாவட்டம் கடாரம்கொண்டான் கிராமத்தை சேர்ந்வர்கள் ஜெயக்குமார் (வயது28). சஞ்சிதா (25) இவர்கள் இருவரும் அண்ணன் தங்கை களாவார்கள்.

இவர்கள் இருசக்கர வாகன த்தில் கடாரங்கொண்டான் கிராமத்திலிருந்து ஜெயங் கொண்டம் நோக்கி வந்து கொண்டிருந்தனர்.

ஜெயங்கொண்டம் அருகே உள்ள சலுப்பை கிராமத்தை சேர்ந்த ரஞ்சித்குமார் (22) ஆலத்திபள்ளம் கிராமத்தை சேர்ந்த கௌதம் (23) ஆகியோர் இருசக்கர வாகனத்தில் ஜெயங்கொண்டத்தில் இருந்து தங்கள் கிராமத்திற்கு இருசக்கர வாகனத்தில் சென்று கொண்டிருந்தனர்.

அப்போது புதுச்சாவடி அருகே வந்த போது இருசக்கர வாகனம் இரண்டும் நேருக்கு நேர் மோதிக் கொண்டது. இதில் ஜெயக்குமார், கௌதம் ஆகியோர் சம்பவ இடத்திலேயே உயிரிழந்தனர்.

படுகாயம் அடைந்த ரஞ்சித்குமார் மற்றும் சஞ்சிதாவை அப்பகுதியினர் மீட்டு, ஜெயங்கொண்டம் அரசு மருத்துவமனையில் சிகிச்சைக்காக அனுப்பிவைத்தனர்.
 
தகவல் அறிந்து சம்பவ இடத்திற்கு வந்த ஜெயங்கொண்டம் போலீசார், உயிரிழந்த ஜெயக்குமார் மற்றும் கவுதம் உடலை கைப்பற்றி பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்து, வழக்குப்பதிந்து விசாரணை செய்து வருகின்றனர்.

அரியலூர்:


அரியலூர் மாவட்டம் ஈச்சங்காடு ரெயில் நிலையம் அருகேயுள்ள தண்டவாளத்தின் ஓரத்தில் ஒருவர் சடலமாகக் கிடப்பதாக விருத்தாசலம் ரெயில்வே காவல் நிலையத்துக்கு தகவல் கிடைத்தது.

இதையடுத்து சம்பவ இடத்துக்கு வந்த காவல் துறையினர்,  உடலை மீட்டு விருத்தாசலம் அரசு மருத்துவமனைக்கு அனுப்பி வைத்து வழக்கு பதிந்து விசாரிக்கின்றனர்.

அதிகாலை சென்ற ரெயிலிலிருந்து தவறி விழுந்து வாலிபர் உயிரிழந்திருக்கலாமா? அல்லது தற்கொலை செய்திருப்பாரா? அல்லது யாரேனும் ஒடும் ரெயிலில் இருந்து தள்ளிவிட்டிருப்பார்களா என்ற கோணங்களில் விசாரணையை தீவிரப்படுத்தி உள்ளனர்.

இறந்த வாலிபர் ரோஸ் கலர் அரைக்கை சட்டை, நீல ஜீன்ஸ் பேண்ட் அணிந்திருந்திருப்பதாக காவல் துறையினர் தெரிவித்தனர்."