பஜாஜ் ஆட்டோ நிறுவனம் தனது வாடிக்கையாளர்களுக்கு பண்டிகை கால சிறப்பு சலுகைகளை அறிவித்துள்ளது. புதிய சலுகை 5-5-5 என அழைக்கப்படுகிறது. இதில் ஐந்து இலவச சேவைகள், ஐந்து ஆண்டுகளுக்கு இன்சூரன்ஸ் மற்றும் ஐந்து ஆண்டு வாரண்டி உள்ளிட்டவை வழங்கப்படுகிறது.
பஜாஜ் அறிவித்து இருக்கும் 5-5-5 சலுகை பிளாட்டினா, டிஸ்கவர், பல்சர் மற்றும் வி மோட்டார்சைக்கிள் மாடல்களை வாங்குவோருக்கு வழங்கப்படுகிறது. இதுதவிர பல்சர் மோட்டார்சைக்கிளை வாங்கும் வாடிக்கையாளர்கள் ரூ.9,800, வி மாடலை வாங்கும் போது ரூ.5,200, பஜாஜ் டிஸ்கவர் மாடலுக்கு ரூ.4,800 மற்றும் பிளாட்டினா வாங்கும் போது ரூ.4,100 வரை சேமிக்க முடியும்.
பண்டிகை காலத்தில் வாகனங்களின் விற்பனையை அதிகரிக்கும் நோக்கில் புதிய சலுகை அறிவிக்கப்பட்டுள்ளது. ஐந்து ஆண்டுகள் இன்சூரன்ஸ் சலுகை மகாராஷ்டிரா, கர்நாடகா, குஜராத், மேற்கு வங்கம் மற்றும் அசாம் உள்ளிட்ட பகுதிகளில் பல்சர் மாடல்களுக்கு வழங்கப்படுகிறது.
மற்ற மாநிலங்களில் இன்சூரன்ஸ் சலுகை தேர்வு செய்யப்பட்ட பல்சர் மாடல்களுக்கு மட்டும் வழங்கப்படுகிறது. மூன்றாம் தரப்பு இன்சூரன்ஸ் ஐந்து ஆண்டுகளுக்கு கட்டாயம் என்ற விதிமுறை அமலான பின் இருசக்கர வாகனங்களின் விலை அதிகரித்து இருக்கிறது.
அந்த வகையில் பஜாஜ் நிறுவனம் வாடிக்கையாளர்களை கவர புதிய சலுகைகளை அறிவித்துள்ளது. இதுபோன்ற சலுகைகளை கொண்டு விற்பனையை அதிகரிக்க பஜாஜ் திட்டமிட்டுள்ளது.
இந்த ஆண்டு இறுதியில் அல்லது அடுத்த ஆண்டு துவக்கத்தில் பஜாஜ் ஆட்டோ மேம்படுத்தப்பட்ட மோட்டார்சைக்கிள்களை அறிமுகம் செய்யும். மேம்படுத்தப்பட்ட பஜாஜ் டாமினர் 400 பல்வேறு அப்டேட்களை கொண்டிருப்பது தெரியவந்துள்ளது. இத்துடன் பல்சர் 220 மற்றும் பல்சர் 150 மாடல்களுக்கு ஆன்டி-லாக் பிரேக்கிங் சிஸ்டம் (ஏ.பி.எஸ்.) வசதியுடன் சோதனை செய்யப்படுகிறது.
