டாடா மோட்டார்ஸ் நிறுவனம் விரைவில் தனது பிரீமியம் ஹேட்ச்பேக் கார் மாடலான டாடா 45X-ஐ இந்தியாவில் அறிமுகம் செய்ய இருக்கிறது. புதிய ஹேட்ச்பேக் கார் இந்தியாவில் 2019 ஆம் ஆண்டின் அரையாண்டு காலக்கட்டத்தில் அறிமுகம் செய்யப்படலாம் என அதிகம் எதிர்பார்க்கப்படுகிறது. இந்தியாவில் இந்த கார் சோதனை செய்யப்படும் புகைப்படங்கள் அவ்வப்போது இணையத்தில் வெளியாகி வந்தது.
இந்தியாவில் 2018 ஆட்டோ எக்ஸ்போ விழாவில் டாடா 45X கான்செப்ட் கார் வடிவில் அறிமுகம் செய்யப்பட்டது. இத்துடன் டாடா மோட்டார்ஸ் தனது ஹேரியர் H5X கார் மாடலையும் அறிமுகம் செய்தது. டாடா ஹேரியர் H5X அடுத்த மாதம் அறிமுகம் செய்யப்படலாம் என கூறப்படுகிறது.
டாடா 45X ஹேட்ச்பேக் கார் அந்நிறுவனத்தின் 2.0 வடிவமைப்பை தழுவி உருவாக்கப்பட்டுள்ளது. அவ்வாறு டாடா 45X கார் சோதனை செய்யப்படும் புதிய புகைப்படங்கள் இணையத்தில் வெளியாகி இருக்கிறது. ரஷ்லேன் வெளியிட்டிருக்கும் புதிய ஸ்பை படங்களில் காரின் விவரங்கள் தெரியவந்துள்ளது.
புதிய ஸ்பை படங்களில் காரின் முன்பக்க கிரில் மற்றும் பெரிய ஏர் டேம், மெல்லிய ஹெட்லேம்ப்கள் மற்றும் கனெக்ட்டெட் டெயில் லைட்கள் இடம்பெற்றுள்ளன. காரின் உள்புறத்தில் ஸ்டீரிங் வீல், இன்ஸ்ட்ரூமென்ட் கிளஸ்டர் மற்றும் டேஷ்போர்டு விவரங்கள் தெரிகிறது. இத்துடன் பெரிய மிதக்கும் படியான டச் ஸ்கிரீன் இன்ஃபோடெயின்மென்ட் சிஸ்டம் வழங்கப்பட்டிருக்கிறது.
இது டாடா நெக்சன் மாடலில் உள்ளதை போன்றே காட்சியளிக்கிறது. டாடா 45X மாடலின் இன்ஸ்ருமென்ட் கிளஸ்டரில் அனலாக் டையல்கள் இடம்பெற்றிருக்கிறது. இதன் ஏ.சி. வென்ட்கள் டேஷ்போர்டின் இருபுறம் மற்றும் டச்ஸ்கிரீன் இன்ஃபோடெயின்மென்ட் கீழே வைக்கப்பட்டுள்ளது. இதன் சென்டர் கன்சோலில் கிளைமேட் கன்ட்ரோல் ஆப்ஷன் மற்றும் டேஷ்போர்டு முழுக்க கருப்பு நிற தீம் செய்யப்பட்டுள்ளது.
வெளிப்புறத்தில் டாடா 45X மாடல் முழுமையாக மறைக்கப்பட்டிருக்கும் நிலையில், இது இம்பேக்ட் டிசைன் 2.0-வை தழுவி உருவாக்கப்பட்டிருக்கிறது. மேலும் புதிய ஹேட்ச்பேக் மாடலில் ஸ்போர்ட் தோற்றத்தில் பெரிய சக்கரங்கள் மற்றும் வீல் ஆர்ச்களை கொண்டிருக்கும்.
டாடா கான்செப்ட் ஹேட்ச்பேக் மாடலில் 1.2 லிட்டர் பெட்ரோல் மற்றும் 1.5 லிட்டர் டீசல் இன்ஜின்கள் வழங்கப்படலாம் என கூறப்படுகிறது. இந்த இன்ஜின்களில் நெக்சனை விட சற்று அதிக செயல்திறன் கொண்டிருக்கும் என எதிர்பார்க்கப்படுகிறது. டிரான்ஸ்மிஷனை பொருத்த வரை 6-ஸ்பீடு மேனுவல் கியர்பாக்ஸ் வழங்கப்படலாம்.
புகைப்படம் நன்றி: Rushlane
