திருவாடானை தாலுகா திருவெற்றியூரில் சிவகங்கை சமஸ்தானம் தேவஸ்தான ராணி மதுராந்தகி நாச்சியார் நிர்வாகத்திற்கு உட்பட்டதும் தமிழகத்தின் பிரசித்தி பெற்ற கோவிலில் ஒன்றான பாகம்பிரியாள் சமேத வல்மீகநாதசுவாமி கோவில் உள்ளது. இந்த கோவிலில் சித்திரை திருவிழா வருகிற 7-ந்தேதி கொடியேற்றத்துடன் தொடங்குகிறது.
10 நாட்கள் நடைபெறும் இந்த கோவில் திருவிழாவில் தினமும் பஞ்ச மூர்த்திகள் புறப்பாடு நடக்கிறது. 11-ந் தேதி இரவு சுவாமி, அம்பாள் திருக்கல்யாணம் வைபவம் நடைபெறுகிறது. திருவிழாவையொட்டி சுவாமி, அம்மன் புஷ்ப பல்லக்கு, வெள்ளி ரிஷப வாகனம், பூதம், காமதேனு, அன்ன வாகனங்களில் வீதி உலா நிகழ்ச்சிகளும் நடக்கிறது.
விழாவின் முக்கிய நிகழ்ச்சியாக 9-ம் நாள் திருவிழாவையொட்டி 15-ம் தேதியன்று தேரோட்டமும் 10-ம் திருநாளன்று 16-ம் தேதி தீர்த்தவாரி உற்சவமும் நடைபெறுகிறது. இதனையொட்டி பட்டிமன்றம், சிறப்பு கலை நிகழ்ச்சிகள் நடைபெறுகிறது.விழாவில் திருவெற்றியூர் மற்றும் சுற்றுவட்டார பகுதிகளை சேர்ந்த பொதுமக்களின் மண்டகப்படி மற்றும் அன்னதானம் நிகழ்ச்சிகளும் நடைபெறுகிறது.
இதற்கான ஏற்பாடுகளை சிவகங்கை சமஸ்தான மேலாளர் இளங்கோ, திருவெற்றியூர் சரக தேவஸ்தான கண்காணிப்பாளர் செந்தில்குமார், திருவெற்றியூர் பாகம்பிரியாள்கோவில் கவுரவ கண்காணிப்பாளர் சுந்தரராஜன், கோவில் ஸ்தானிகம் மணிகண்ட குருக்கள் மற்றும் கோவில் பணியாளர்கள் செய்து வருகின்றனர்.
