திருமலை :
திருப்பதி ஏழுமலையான் கோவிலில் ஆர்ஜித சேவையில் பங்கேற்று சாமி தரிசனம் செய்ய விருப்பம் உள்ள பக்தர்களின் வசதிக்காக திருமலை திருப்பதி தேவஸ்தானம் வர்சுவல் முறையில் கல்யாண உற்சவம், ஊஞ்சல் சேவை, ஆர்ஜித பிரம்மோற்சவம், சகஸ்ர தீபலங்கார சேவை ஆகியவற்றை நடத்தி வருகிறது.
அதில் முன்பதிவு செய்த பக்தர்கள் வெங்கடேஸ்வரா பக்தி சேனலில் ஒளிப்பரப்பப்படும் நிகழ்ச்சியில் பங்கேற்று சாமி தரிசனம் செய்யலாம். அத்துடன் கூடுதலாக கட்டணம் செலுத்தி ரூ.300 டிக்கெட் தரிசனத்திலும் சாமி தரிசனம் செய்யலாம்.
அதன் படி மார்ச் மாதத்துக்கான ஆர்ஜித சேவை டிக்கெட்டுகள் வர்ச்சுவல் (காணொலி காட்சி மூலம்) முறையில் நேற்று முன்தினம் 11 மணியளவில் திருமலை திருப்பதி தேவஸ்தான இணையதளத்தில் வெளியிடப்பட்டது. அதில் பக்தர்கள் முன்பதிவு செய்து கொண்டு ஏழுமலையானை தரிசிக்கலாம்.
மேலும் கல்யாண உற்சவ டிக்கெட் முன்பதிவு செய்த பக்தர்களுக்கு மட்டும் (2 பேருக்கு) 90 நாட்களுக்குள் தேவஸ்தானம் இலவச விரைவு தரிசனத்தை அளித்து வருகிறது. பக்தர்கள் அந்தத் தரிசன டிக்கெட்டுகளை திருமலை திருப்பதி தேவஸ்தான இணையதளத்தில் முன்பு செய்து கொள்ளலாம்.
