விஜய்யின் ‘மாஸ்டர்’ படம் ஓ.டி.டி.யில் வெளியாகாது - லோகேஷ் கனகராஜ் திட்டவட்டம்

கோவை மாவட்ட தலைமை விஜய் நற்பணி இயக்கம் சார்பில் மாஸ்டர் படம் வெற்றி பெற வேண்டி நலத்திட்ட உதவிகள் வழங்கும் நிகழ்ச்சி ஆர்.எஸ்.புரத்தில் நடந்தது. இதில் மாஸ்டர் திரைப்பட இயக்குனர் லோகேஷ் கனகராஜ் கலந்து கொண்டு நலத்திட்ட உதவிகளை வழங்கினார்.

அதன்பின் அவர் நிருபர்களுக்கு அளித்த பேட்டியில் கூறியதாவது: நடிகர் விஜய் நடித்த மாஸ்டர் திரைப்படம் ஓ.டி.டி.யில் வெளியாக வாய்ப்பு இல்லை. மாஸ்டர் திரைப்படம் தியேட்டர்களில் தான் வெளிவரும். தியேட்டர்கள் திறக்க அரசு அனுமதி அளித்த பின்னர் திரைப்படம் வெளியாகும் தேதியை தயாரிப்பு நிறுவனம் முடிவு செய்யும்.

கொரோனா காரணமாக தியேட்டர்கள் மூடப்பட்டு உள்ளதால், அதனை நம்பி உள்ளவர்களின் வாழ்வாதாரம் பாதிக்கப்பட்டு உள்ளது. தியேட்டர்களை விரைவில் திறக்கவில்லை என்றால் பலரும் கஷ்டப்படுவார்கள். எனவே விரைவில் தியேட்டர்கள் திறக்கப்படும் என நம்புகிறேன். இவ்வாறு அவர் கூறினார்.