இந்தியாவில் மினி ஜான் கூப்பர் வொர்க்ஸ் கார் அறிமுகம் செய்யப்பட்டுள்ளது. இந்த கார் முற்றிலும் உதிரி பாகமாக இறக்குமதி செய்யப்பட்டு இந்தியாவில் அசெம்பிள் செய்யப்பட்டுள்ளது. இதனால் கூப்பர் எஸ் மாடலை விட இதன் விலை ரூ.9.2 லட்சம் அதிகமாகும். தற்சமயம் கூப்பர் எஸ் மாடல் விலை ரூ.34.20 லட்சம் என நிர்ணயிக்கப்பட்டுள்ளது.
மூன்று கதவுகளைக் கொண்ட ஹேட்ச்பேக் மாடலாக வெளியாகியுள்ள இந்த கார் 231 ஹெச்.பி. திறனும், 320 என்.எம். டார்க் இழுவிசையும் கொண்டதாகும். இந்த கார் 2 லிட்டர், நான்கு சிலிண்டர் டர்போ பெட்ரோல் என்ஜினைக் கொண்டிருக்கிறது. இதில் 8 ஸ்பீடுகியர் பாக்ஸ் வழங்கப்பட்டுள்ளன.
கூப்பர் எஸ் மாடலில் 7 கியர்கள் மட்டுமே உள்ளன. புதிய மினி ஜான் கூப்பர் வொர்க்ஸ் கார் பத்து அழகிய நிறங்களில் அறிமுகம் செய்யப்பட்டுள்ளது. நான்கு வித்தியாசமான வண்ணக் கலவைகளைக் கொண்டதாக இது உள்ளது. மேற்கூரை மற்றும் பக்கவாட்டு கண்ணாடிகள் ஒரு நிறத்தில் உள்ளது.
இதற்கு 17 அங்குல அலாய் சக்கரங்கள் உள்ளன. மேட்ரிக்ஸ் எல்.இ.டி. விளக்கு, மேற்கூரை ஆகிய வசதிகளும் இதில் உள்ளன. தேவைப்பட்டால் 18 அங்குலம் கொண்ட சக்கரங்களையும் தேர்வு செய்து கொள்ளலாம்.
இதன் உள்பகுதி மிகச் சிறப்பாக உள்ளது. முன்பகுதி மற்றும் பின் பகுதியில் பார்க்கிங் சென்சார் உள்ளது. அத்துடன் ரிவர்ஸ் கேமராவும் வழங்கப்பட்டுள்ளது. அடாப்டிவ் சஸ்பென்ஷன் இருப்பது கூடுதல் சிறப்பாகும். மேலும் ஆப்பிள் கார் பிளே, நேவிகேஷன் வசதியும் உள்ளது.
