மெர்சிடிஸ் பென்ஸ் நிறுவனம் புதிய எலெக்ட்ரிக் மாடல்களை அறிமுகம் செய்யும் பணிகளில் ஈடுபட்டு வருகிறது. செப்டம்பரில் நடைபெற இருக்கும் IAA முனிச் மோட்டார் விழாவில் மெர்சிடிஸ் நான்கு எலெக்ட்ரிக் கார்களை அறிமுகம் செய்ய இருக்கிறது. இவற்றில் புதிய EQE ஆல்-எலெக்ட்ரிக் செடான் மாடலுக்கு அதிக எதிர்பார்ப்பு ஏற்பட்டுள்ளது.
புதிய பென்ஸ் EQE இந்த ஆண்டு துவக்கத்தில் அறிமுகம் செய்யப்பட்ட EQS மாடலின் கீழ் நிலைநிறுத்தப்படுகிறது. டீசர் புகைப்படங்களின் படி புதிய EQE மாடலில் பெரிய சென்ட்ரல் இன்போடெயின்மென்ட் ஸ்கிரீன், டர்பைன் போன்ற ஏ.சி. வென்ட்கள், ஆம்பியன்ட் லைட் செட்டப் உள்ளிட்டவை வழங்கப்படுகிறது.
காரின் வெளிப்புற தோற்றம் பற்றி அதிக விவரங்கள் இல்லை. இதன் டெயில் லைட் இடது முதல் வலது புறம் வரை நீள்கிறது. புதிய EQE ஒட்டுமொத்த டிசைன், காருக்கு ஸ்போர்ட் தோற்றம் வழங்கும் வகையில் இருக்கும் என தெரிகிறது. எலெக்ட்ரிக் பிரிவில் அதிகம் கவனம் செலுத்தி வருவதால் மெர்சிடிஸ் பென்ஸ் நிறுவனம் EQE மாடலை விரைவில் பல்வேறு சந்தைகளில் அறிமுகம் செய்யும் என எதிர்பார்க்கலாம்.
