பென்ச்மார்க்கில் ஆப்பிள் பிராசஸரை பின்னுக்குத் தள்ளிய குவால்காம்

குவால்காம் நிறுவனத்தின் புதிய பிளாக்ஷிப் பிராசஸர் விரைவில் அறிமுகம் செய்யப்பட இருக்கிறது. புதிய ஸ்னாப்டிராகன் 875 பிராசஸர் முந்தைய ஆண்டின் ஸ்னாப்டிராகன் 865 பிராசஸரின் மேம்பட்ட வெர்ஷன் ஆகும். சமீபத்தில் புதிய குவால்காம் ஸ்னாப்டிராகன் 875 பிராசஸர் பென்ச்மார்க் செயல்திறன் பற்றிய விவரங்கள் வெளியாகி உள்ளது. 

அந்த வகையில் ஏற்கனவே எதிர்பார்க்கப்பட்டதை விட முந்தைய ஸ்னாப்டிராகன் 865 பிராசஸரை விட புதிய பிளாக்ஷிப் பிராசஸர் 25 மடங்கு வேகமாக இருக்கிறது. அன்டுடு பென்ச்மார்க் சோதனையில் இந்த பிராசஸர் 8,47,868 புள்ளிகளை பெற்று இருக்கிறது. இது ஆப்பிள் நிறுவன பிராசஸர்களை விட அதிகம் ஆகும்.

பென்ச்மார்க் விவரங்களின் படி புதிய ஆப்பிள் ஏ14 பயோனிக் பிராசர் 6,60,000 புள்ளிகளை பெற்று இருந்தது. இதேபோன்று கிரின் மற்றும் எக்சைனோஸ் முறையே 6,96,000 மற்றும் 6,93,000 புள்ளிகளை பெற்று இருந்தன. புள்ளிகள் அடிப்படையில் சில பிராசஸர்கள் அதிக புள்ளிகளை பெற்று இருக்கின்றன.

எனினும், பிராசஸர்கள் எந்தளவு மென்பொருளுடன் சீராக இணைந்து செயல்படுகிறது என்பதை பொருத்தே அதன் செயல்திறனை அறிந்து கொள்ள முடியும். அந்த வகையில் முந்தைய காலக்கட்டங்களில் ஆப்பிள் மற்றும் கூகுள் இந்த விஷயத்தில் அதிக சிறப்பாக செயலாற்றி இருக்கின்றன.

சியோமி, ஒன்பிளஸ் மற்றும் ரியல்மி போன்ற நிறுவனங்களும் இந்த பிளாக்ஷிப் பிராசஸரை பயன்படுத்த இருக்கின்றன. அந்த வகையில் பிராசஸரை எந்த நிறுவனம் சிறப்பாக கையாள்கிறது என்பதை பொருத்து இருந்து பார்க்க வேண்டும்.