இஸ்ரேல்-ஹமாஸ் போர் லைவ் அப்டேட்ஸ்: காசாவில் உள்ள ஹமாஸ் தலைவரை கண்டுபிடித்து ஒழிப்போம்: இஸ்ரேல்

காசாவில் பலி எண்ணிக்கை அதிகரித்து வரும் நிலையில், பொதுமக்களை பாதுகாக்க அமெரிக்க அதிபர் ஜோ பைடன், இஸ்ரேல் பிரதமர் நேதன்யாகுவிடம் வலியுறுத்தியுள்ளார்.

மேற்கு கரை ஜெனின் பகுதி மீது இஸ்ரேல் வான்தாக்குதல் நடத்தியதாக தகவல் வெளியாகியுள்ளது.

காசாவில் உள்ள துருக்கி- பாலஸ்தீனம் நட்பு மருத்துவமனை அருகே தாக்குதல் நடத்தப்பட்டுள்ளதால் மனிதாபிமான உதவிகள் தடைபட்டுள்ளதாக, அந்த மருத்துவமனையின் இயக்குனர் தெரிவித்துள்ளார்.

பாலஸ்தீனத்தின் ரமல்லா பகுதியின் வடமேற்கிலுள்ள பெய்ட் ரிமா, நப்லு பகுதியில் உள்ள அஸ்கர் அகதிகள் முகாம் மற்றும் வடக்கே உள்ள டுபாஸ் நகர் ஆகிய 3 இடங்களிலும் ஹமாஸ் அமைப்பினரை தேடும் முயற்சியில் இஸ்ரேல் ராணுவம் ஈடுபட்டு வந்தது. இதில் மறைவிடங்களில் இருந்து ஹமாஸ் அமைப்பினர் இஸ்ரேல் ராணுவத்தினர் மீது வெடிகுண்டுகளை வீசி தாக்கினர். அப்போது இரு தரப்பினருக்கும் இடையே நடைபெற்ற சண்டையில் 29லிருந்து 31 வரை வயதுடைய 3 பேர் கொல்லப்பட்டுள்ளனர்.

இதுவரை பாலஸ்தீனத்தின் மேற்கு கரை பகுதியில் 110 பாலஸ்தீனர்கள் உயிரிழந்துள்ளனர்.

இரு தரப்பிலான போரில் உயிரிழந்தோர் எண்ணிக்கை 9 ஆயிரத்தை கடந்தது. ஹமாஸ் தாக்குதலில் 1,405 பேரும், இஸ்ரேல் தாக்குதலில் 7,703 பேரும், மேற்குகரை பகுதியில் நடந்த மோதலில் 109 பேரும் கொல்லப்பட்டுள்ளனர்.

இஸ்ரேல்-ஹமாஸ் போர் தொடர்பாக மத்திய கிழக்கு நாடுகளில் வளர்ந்து வரும் நெருக்கடி குறித்து பிரதமர் நரேந்திர மோடி, எகிப்து அதிபர் அப்தெல் பத்தா அல் சிசியுடன் தொலைபேசியில் பேசினார்.

காசாவில் தொலைத்தொடர்பு சேவைகள் இன்று மீண்டும் செயல்பாட்டிற்கு வந்துள்ளது. இணைய தளம் மற்றும் செல்போன் சேவைகள் மீண்டும் செயல்பாட்டிற்கு வந்துள்ளது.

தங்களிடம் உள்ள பிணைக்கைதிகளை விடுவிக்க வேண்டுமெனில் இஸ்ரேல் சிறையில் வாடும் பாலஸ்தீன கைதிகளை விடுவிக்க வேண்டும் என ஹமாஸ் அமைப்பு நிபந்தனை விதித்துள்ளது.