ஆஷஸ் சிட்னி டெஸ்ட்: கவாஜா சதத்தால் ஆஸ்திரேலியா 416 ரன் குவித்து டிக்ளேர்

ஆஸ்திரேலியா- இங்கிலாந்து அணிகளுக்கு இடையில் ஆஷஸ் தொடரின் 4-வது டெஸ்ட் சிட்னியில் நேற்று தொடங்கியது. மழைக் காரணமாக நேற்று 46.5 ஓவர்களே வீசப்பட்டன. இதில் ஆஸ்திரேலியா 3 விக்கெட் இழப்பிற்கு 126 ரன்கள் எடுத்திருந்தது. ஸ்டீவன் ஸ்மித் 6 ரன்களுடனும், உஸ்மான் கவாஜா 4 ரன்களுடனும் களத்தில் இருந்தனர்.

இன்று 2-வது நாள் ஆட்டம் நடைபெற்றது.  ஸ்மித், கவாஜா சிறப்பான ஆட்டத்தை வெளிப்படுத்தினர். ஸ்மித் 67 ரன்கள் எடுத்த நிலையில் ஆட்டம் இழந்தார். ஆனால், கவாஜா சிறப்பாக விளையாடி சதம் விளாசினார். டிராவிஸ் ஹெட்டுக்கு கொரோனா தொற்று உறுதியானதால் விளையாட முடியாத நிலை ஏறு்பட்டது. இதனால் நீண்ட நாட்களாக அணியில் இடம் கிடைக்காமல் இருந்த கவாஜாவுக்கு வாய்ப்பு கிடைத்தது. இதை சரியாக பயன்படுத்திக் கொண்டார் கவாஜா. தொடர்ந்து விளையாடி அவர் 137 ரன்களில் ஆட்டமிழந்தார்.

பேட் கம்மின்ஸ் 24 ரன்களும், மிட்செல் ஸ்டார்க் ஆட்டமிழக்காமல் 34 ரன்களும் அடிக்க ஆஸ்திரேலியா 8 விக்கெட் இழப்பிற்கு 416 ரன்கள் குவித்து முதல் இன்னிங்சை டிக்ளேர் செய்தது. இங்கிலாந்து அணியில் ஸ்டூவர்ட் பிராட் சிறப்பாக பந்து வீச ஐந்து விக்கெட்டுகள் சாய்த்தார்.

பின்னர், முதல் இன்னிங்சை தொடங்கிய இங்கிலாந்து 2-வது நாள் ஆட்ட முடிவில் விக்கெட் இழப்பின்றி 13 ரன்கள் சேர்த்துள்ளது.

இதையும் படியுங்கள்...  ரிஷாப் பண்ட் ‘டக்அவுட்’: கவுதம் காம்பீர் சாடல்