‘360 டிகிரி’ ருத்ர தாண்டவம் ஆட, 195 ரன்கள் வெற்றி இலக்காக நிர்ணயித்தது ஆர்சிபி

ஐபிஎல் தொடரின் 28-வது லீக் ஆட்டம் ஷார்ஜாவில் நடைபெற்று வருகிறது. இதில் ராயல் சேலஞ்சர்ஸ் பெங்களூர் - கொல்கத்தா நைட் ரைடர்ஸ் அணிகள் பலப்பரீட்சை நடத்தி வருகின்றன. டாஸ் வென்ற ஆர்சிபி பேட்டிங் தேர்வு செய்தது.

அதன்படி தேவ்தத் படிக்கல், ஆரோன் பிஞ்ச் ஆகியோர் தொடக்க வீரர்களாக களம் இறங்கினர். இருவரும் சீரான வேகத்தில் ரன்கள் அடித்தனர். இதனால் ஓவருக்கு 9 என்ற விகிதத்தில் ரன்கள் வந்து கொண்டிருந்தது. அணியின் ஸ்கோர் 7.4 ஓவரில் 67 ரன்னாக இருக்கும்போது தேவ்தத் படிக்கல் 23 பந்தில் 32 ரன்கள் எடுத்த நிலையில் ஆட்டமிழந்தார்.

இன்று சிறப்பாக விளையாடிய ஆரோன் பிஞ்ச் 47 ரன்னில் ஆட்டமிழந்தார். அப்போது ஆர்சிபி 12.2 ஓவரில் 94 ரன்கள் எடுத்திருந்தது. 3-வது விக்கெட்டுக்கு விராட் கோலியுடன் டி வில்லியர்ஸ் ஜோடி சேர்ந்தார். இருவரும் முதலில் நிதானமாக விளையாடினர்.

ஆர்சிபி 15 ஓவரில் 111 ரன்களே எடுத்திருந்தது. அப்போது டி வில்லியர்ஸ் 9 பந்தில் 8 ரன்களே எடுத்திருந்தார். 16-வது ஓவரில் இருந்து டி வில்லியர்ஸ் வாணவேடிக்கை நிகழ்ச்சியை தொடங்கினார். 16-வது ஓவரில் டி வில்லியர்ஸ் இரண் சிக்ஸ், ஒரு பவுண்டரி விரட்டினார்.

17-வது ஓவரில் அதேபோல் இரண்டு சிக்ஸ், ஒரு பவுண்டரி விளாசினார். 18-வது ஓவரை அந்த்ரே ரஸல் வீசினார். இந்த ஓவரில் தலா ஒரு பவுண்டரி, சிக்ஸ் அடித்தார். முதல் பந்தில் பவுண்டரி, 2-வது பந்தில் சிக்ஸ் அடித்து 23 பந்தில் அரைசதம் அடித்தார்.

19-வது ஓவரில் ஒரு பவுண்டரி மட்டுமே கிடைத்தது. கடைசி ஓவரில் ஒரு சிக்ஸ் உடன் 17 ரன்கள் கிடைக்க ஆர்சிபி 20 ஓவரில் 2 விக்கெட் இழப்பிற்கு 194 ரன்கள் குவித்துள்ளது. விராட் கோலி 28 பந்தில் 33 ரன்களுடனும், டி வில்லியர்ஸ் 33 பந்தில் 73 ரன்களும் விளாசி ஆட்டமிழக்காமல் இருந்தனர்.