ஜூனியர் உலக கோப்பை கிரிக்கெட்: நியூசிலாந்து அணி அரைஇறுதிக்கு முன்னேற்றம்

16 அணிகள் பங்கேற்றுள்ள 13-வது ஜூனியர் உலக கோப்பை கிரிக்கெட் போட்டி (19 வயதுக்கு உட்பட்டோர்) தென்ஆப்பிரிக்காவில் நடந்து வருகிறது. இதில் பினோனியில் நேற்று நடந்த 2-வது கால் இறுதி ஆட்டத்தில் வெஸ்ட் இண்டீஸ் - நியூசிலாந்து அணிகள் பலப்பரீட்சை நடத்தின.

‘டாஸ்’ ஜெயித்து முதலில் பேட்டிங் செய்த வெஸ்ட் இண்டீஸ் அணி 47.5 ஓவர்களில் 238 ரன்னில் ‘ஆல்-அவுட்’ ஆனது. அதிகபட்சமாக கிர்க் மெக்கன்சி 99 ரன்கள் (104 பந்து, 11 பவுண்டரி, 3 சிக்சர்) எடுத்தார். நியூசிலாந்து அணி தரப்பில் கிறிஸ்டியன் கிளார்க் 4 விக்கெட்டும், ஜோய் பீல்டு, ஜெஸ்சி தாஷ்கோப் தலா 2 விக்கெட்டும் கைப்பற்றினார்கள்.

பின்னர் இலக்கை நோக்கி ஆடிய நியூசிலாந்து அணி 49.4 ஓவர்களில் 8 விக்கெட் இழப்புக்கு 239 ரன்கள் எடுத்து 2 விக்கெட் வித்தியாசத்தில் வெற்றி பெற்று அரைஇறுதிக்கு முன்னேறியது.

தோல்வி கண்ட வெஸ்ட்இண்டீஸ் அணி அரைஇறுதி வாய்ப்பை இழந்து வெளியேறியது. 9-வது விக்கெட்டுக்கு ஜோய் பீல்டு (38 ரன்கள்), கிறிஸ்டியன் கிளார்க் (46 ரன்கள்) ஜோடி ஆட்டம் இழக்காமல் 86 ரன்கள் திரட்டி அணியின் வெற்றியில் முக்கிய பங்கு வகித்தது. நியூசிலாந்து வீரர் கிறிஸ்டியன் கிளார்க் ஆட்ட நாயகன் விருது பெற்றார்.