முதல் டெஸ்ட்: வங்காள தேசத்தை சரிவில் இருந்து மீட்ட தமீம் இக்பால் - சாஹிப் அல் ஹசன்

வங்காள தேசம் - ஆஸ்திரேலியா அணிகளுக்கு இடையிலான இரண்டு போட்டிகள் கொண்ட டெஸ்ட் தொடரின் முதல் டெஸ்ட் டாக்காவில் இன்று தொடங்கியது. வங்காள தேச அணி கேப்டன் முஷ்பிகுர் ரஹிம் டாஸ் வென்று பேட்டிங் தேர்வு செய்தார்.

அதன்படி தமீம் இக்பால், சவுமியா சர்கர் ஆகியோர் தொடக்க வீரர்களாக களம் இறங்கினார்கள். அணியின் 10 ரன்னாக இருக்கும்போது சவுமியா சர்கர் 8 ரன்கள் எடுத்த நிலையில் ஆட்டம் இழந்தார். அடுத்து வந்த இம்ருல் கெய்ஸ், சபீர் ரஹ்மான் ஆகியோரை ரன்ஏதும் எடுக்க விடாமல் கம்மின்ஸ் தன் வேகத்தில் அடுத்தடுத்து பெவிலியின் திருப்பினார். இதனால் வங்காள தேச அணி 10 ரன்கள் எடுப்பதற்குள் 3 விக்கெட்டுக்களை இழந்து தத்தளித்தது.


3 விக்கெட் வீழ்த்திய கம்மின்ஸ்

4-வது விக்கெட்டுக்கு தமீம் இக்பால் உடன் சாஹிப் அல் ஹசன் ஜோடி சேர்ந்தார். அனுபவ வீரர்களான இருவரும் சிறப்பான ஆட்டத்தை வெளிப்படுத்தினார்கள். இதானல் வங்காள தேச அணியின் ஸ்கோர் 100-ஐ தாண்டியது. இருவரும் சிறப்பாக விளையாடி அரைசதம் அடித்தனர்.

அணியின் ஸ்கோர் 165 ரன்னாக இருக்கும்போது இந்த ஜோடி பிரிந்தது. தமீம் இக்பால் 71 ரன்கள் எடுத்த நிலையில் மேக்ஸ்வெல் பந்தில் ஆட்டம் இழந்தார். இந்த ஜோடி 4-வது விக்கெட்டுக்கு 155 ரன்கள் சேர்த்து அணியை சரிவில் இருந்து மீட்டது. தமீம் இக்பால் அவுட்டான சிறிது நேரத்தில் சாஹிப் அல் ஹசன் 84 ரன்கள் எடுத்த நிலையில் ஆட்டம் இழந்தார். அப்போது வங்காள தேசம் 188 ரன்கள் எடுத்திருந்தது.


84 ரன்கள் சேர்த்த சாஹிப் அல் ஹசன்

6-வது விக்கெட்டுக்கு கேப்டன் முஷ்பிகுர் ரஹிம் உடன் நசிர் ஹொசைன் ஜோடி சேர்ந்தார். முதல் நாள் தேனீர் இடைவேளை வரை வங்காள தேச அணி 5 விக்கெட் இழப்பிற்கு 190 ரன்கள் எடுத்துள்ளது.

முஷ்பிகுர் ரஹிர் 12 ரன்னுடனும், நசிர் ஹொசைன் ரன்ஏதும் எடுக்காமலும் களத்தில் உள்ளனர்.