ஐ.பி.எல்: டெல்லியை 14 ரன்கள் வித்தியாசத்தில் வீழ்த்தி மும்பை இந்தியன்ஸ் வெற்றி

கொல்கத்தா:

ஐ.பி.எல். சீசன் 10-ன் 25-வது லீக் ஆட்டம் மும்பையின் வான்கடே மைதானத்தில் நடைபெற்றது. இதில் டெல்லி டேர்டெவில்ஸ் அணியை 14 ரன்கள் வித்தியாசத்தில் வீழ்த்தி மும்பை இந்தியன்ஸ் வெற்றி பெற்றது.

முன்னதாக டாஸ் வென்ற டெல்லி அணி பந்துவீச்சை தேர்வு செய்தது. இதையடுத்து களமிறங்கிய மும்பை இந்தியன்ஸ் 20 ஓவர்கள் முடிவில் 8 விக்கெட்டுகளை இழந்த 142 ரன்களை எடுத்தது. மும்பை அணியில் அதிகபட்சமாக பட்லர் 28 (18), பொல்லார்டு 26 (29), பாண்டியா 24 (23) ரன்களும் எடுத்தனர். டெல்லி அணி சார்பில் மிஷ்ரா, கம்மின்ஸ தலா 2 விக்கெட்டுகளை வீழ்த்தினர்.

143 ரன்கள் எடுத்தால் வெற்றி என களமிறங்கிய டெல்லி அணியின் முதல் ஆறு வீரர்களான சஞ்சு சாம்சன் 9 (6), தாரே 0 (1), கருண் நாயர் 5 (15), ஸ்ரேயாஸ் ஐயர் 6 (7), கோரி ஆண்டர்சன் 0 (3), ரிஷப் பாண்ட் 0 (3) ரன்கள் எடுத்து அவுட்டாக 24 ரன்களில் 6 விக்கெட்டுகளை இழந்து டெல்லி அணி தடுமாறியது.

இதையடுத்து ஜோடி சேர்ந்த கிறிஸ் மோரிஸ் - ரபாடா அதிரடி காட்ட அணியின் ரன்வேகம் உயரத் தொடங்கியது. எனினும் முதலில் இந்த ஜோடியை கட்டுப்படுத்த திணறிய மும்பை பந்துவீச்சாளர்கள், 19வது ஓவரின் போது ராபாடா விக்கெட்டை வீழ்த்த மும்பைக்கு வெற்றி வாய்ப்பு பிரகாசமானது. ரபாடா 39 பந்துகளில் 4 பவுண்டரி, 1 சிக்சர் என 44 ரன்கள் எடுத்து பும்ரா பந்துவீச்சில் போல்டானார்.

இறுதியில் டெல்லி அணி 20 ஓவர்கள் முடிவில் 7 விக்கெட்டுகளை இழந்து 128 ரன்களை எடுத்தது. டெல்லி அணியில் மோரிஸ் அதிகபட்சமாக 52 (41) ரன்களை குவித்து கடைசி வரை ஆட்டமிழக்காமல் இருந்தார். கடைசியில் மும்பை அணி 14 ரன்கள் வித்தியாசத்தில் வெற்றி பெற்றது.