ஒலிம்பிக்கில் முதல் பதக்கம் வென்றது பிஜி: ஆண்கள் ரக்பி செவன்ஸ் போட்டியில் தங்கம்

பிரேசில் நாட்டின் ரியோ டி ஜெனீரோ நகரில் நடைபெற்று வரும் ஒலிம்பிக் போட்டியில் ரக்பி செவன்ஸ் போட்டி முதல் முறையாக சேர்க்கப்பட்டது. இதில் ஆடவர் பிரிவுக்கான இறுதிப்போட்டியில் சிறிய தீவு நாடான பிஜி நாட்டின் அணியும், பிரிட்டன் அணியும் மோதின.

விறுவிறுப்பாக நடைபெற்ற இப்போட்டியின் துவக்கம் முதலே சிறப்பாக விளையாடிய பிஜி அணி 43-7 என்ற புள்ளிகள் கணக்கில் வெற்றி பெற்று அசத்தியது. இதன்மூலம் ஒலிம்பிக் ரக்பி செவன்ஸ் போட்டிக்கான முதல் தங்கத்தை பிஜி வென்றுள்ளது. ஒட்டுமொத்தமாக ஒலிம்பிக் போட்டியில் பிஜி பெறும் முதல் பதக்கமும் இதுதான். எனவே, இந்த வெற்றியை பிஜி மக்கள் மிகவும் உற்சாகமாக கொண்டாடி வருகின்றனர்.

இப்போட்டியில் பிரிட்டனுக்கு வெள்ளிப் பதக்கம் கிடைத்தது. வெண்கலப் பதக்கத்துக்கான போட்டியில் தென்கொரிய அணி ஜப்பானை வீழ்த்தி பதக்கம் வென்றது.

மகளிருக்கான ரக்பி செவன்ஸ் பிரிவில் ஆஸ்திரேலியா தங்கப் பதக்கம் வென்றது. நியூசிலாந்து வெள்ளி, கனடா வெண்கலப் பதக்கம் வென்றது குறிப்பிடத்தக்கது.