நீச்சலில் 3 புதிய உலக சாதனை

ரியோ டி ஜெனிரோ:

ரியோ ஒலிம்பிக் போட்டியில் இந்திய நேரப்படி இன்று காலை நடந்த நீச்சல் பந்தயத்தில் 3 புதிய உலக சாதனை படைக்கப்பட்டது.

பெண்களுக்கான 100 மீட்டர் பட்டர்பிளை நீச்சலில் சுவீடன் வீராங்கனை சாரா ஜோஸ்டோம் 55.48 வினாடியில் கடந்து புதிய உலக சாதனை மற்றும் ஒலிம்பிக் சாதனை படைத்து தங்கம் வென்றார். இதற்கு முன்பு அவர் கடந்த 55.64 வினாடியில் கடந்ததே சாதனையாக இருந்தது. தனது சாதனையை அவர் முறியடித்தார்.

கனடாவை சேர்ந்த பென்னி ஒலிஸ்கா 56.46 வினாடியில் கடந்து வெள்ளிப் பதக்கமும், அமெரிக்காவை சேர்ந்த டானா ஹேல்மர் 56.63 வினாடியில் கடந்து வெண்கல பதக்கமும் பெற்றனர்.

ஆண்களுக்கான 100 மீட்டர் பிரஸ்டிரோக் நீச்சலில் இங்கிலாந்து வீரர் ஆடம் பெய்ட்டி புதிய உலக சாதனை நிகழ்த்தினார். அவர் பந்தய தூரத்தை 57.13 வினாடியில் கடந்தார்.

தென் ஆப்பிரிக்க வீரர் கேமரூன் ஹன்டர் 58.69 வினாடியில் கடந்து வெள்ளியும், அமெரிக்க வீரர் மில்லர் 58.87 வினாடியில் கடந்து வெண்கலமும் பெற்றார்.

பெண்களுக்கான 400 மீட்டர் பிரீஸ்டைல் நீச்சலில் அமெரிக்க வீராங்கனை கேத்லின் லெட்ல்சி 3 நிமிடம் 56.46 வினாடியில் கடந்து புதிய உலக சாதனை படைத்து தங்கம் வென்றார்.

இதற்கு முன்பு அவர் 2014-ம் ஆண்டு 3 நிமிடம் 58.37 வினாடியில் கடந்ததே சாதனையாக இருந்தது. தனது சாதனையை முறியடித்து கேத்லின் புதிய சாதனை நிகழ்த்தினார்.

இங்கிலாந்தை சேர்ந்த கார்லின் வெள்ளி பதக்கமும், அமெரிக்காவை சேர்ந்த சுமித் வெண்கலமும் பெற்றனர்.

ஆண்களுக்கான 50 கிலோ உடல் எடை பிரிவு பளு தூக்குதலில் சீன வீரர் லாங் சிங்குவான் புதிய உலக சாதனை படைத்தார். அவர் 307 கிலோ தூக்கி தங்கம் வென்றார்.