புனித சின்னப்பர் ஆலய திருவிழா கொடியேற்றம்

முக்கூடல் அருகே சிங்கம்பாறை புனித சின்னப்பர் ஆலய திருவிழா நேற்று காலை கொடியேற்றத்துடன் தொடங்கியது. அதனை தொடர்ந்து சிறப்பு ஆராதனை நடைபெற்றது. பின்னர் ஊர் பொதுமக்கள் சார்பில் பொது அன்னதானம் நடந்தது. விழா தொடர்ந்து 25-ந் தேதி வரை 10 நாட்கள் நடைபெறுகிறது.

இன்று (வெள்ளிக்கிழமை) இரவு அன்பிய கலைநிகழ்ச்சி, நாளை (சனிக்கிழமை) இரவு மாதா சபை, 19-ந் தேதி இரவு பட்டிமன்றம், 20-ந் தேதி சிங்கம்பாறை தூய பவுல் மேல்நிலைப்பள்ளி மாணவர்களின் கலைநிகழ்ச்சி, 22-ந் தேதி மைலபுரம் தொடக்கப்பள்ளி சார்பாக கலைநிகழ்ச்சிகள் ஆகியன நடைபெறும். 23-ந் தேதி இரவு பட்டிமன்றம், 24-ந் தேதி பாளை.மறை மாவட்ட ஆயர் அந்தோணிசாமி தலைமையில் தேரடி திருப்பலி, உறுதி பூசுதல் கொண்டாட்டம் நடைபெறும்.

25-ந் தேதி காலை நன்றி திருப்பலி, மதியம் சப்பர பவனி, இரவு கொடியிறக்கம், சிறப்பு வாண வேடிக்கை நடக்கிறது. அதனை தொடர்ந்து 17-வது ஆண்டு மாநில அணிகள் கலந்துகொள்ளும் மின்னொளி கபடி போட்டி நடைபெறும். கொடியேற்றம் நிகழ்ச்சியில் அந்தோணி குரூஸ் அடிகளார், அருள்ராஜ் அடிகளார், சகாய பவுல், செல்வராஜ் உள்பட பலர் கலந்துகொண்டனர்.