வெப் தொடரில் அறிமுகமாகும் ஜெய்

விஜய் நடிப்பில் கடந்த 2002-ம் ஆண்டு வெளியான பகவதி படம் மூலம் திரையுலகில் அறிமுகமானார் ஜெய். இதையடுத்து சென்னை 28, சுப்ரமணியபுரம், எங்கேயும் எப்போதும், கலகலப்பு 2 என பல்வேறு ஹிட் படங்களை கொடுத்து தமிழ் திரையுலகில் தனக்கென ஓர் இடத்தை பிடித்தார். சமீபத்தில் இவரின் 25-வது படமான கேப்மாரி ரிலீசானது. இவர் கைவசம் பிரேக்கிங் நியூஸ், எண்ணித் துணிக, பார்ட்டி போன்ற படங்கள் உள்ளன.

இந்நிலையில், இவர் அடுத்ததாக வெப் தொடர் பக்கம் தனது கவனத்தை திருப்பியுள்ளார். இவர் அறிமுகமாகும் வெப் தொடரை இயக்குனர் கார்த்திக் சுப்புராஜின் உதவி இயக்குனர் சாருகேஷ் இயக்கி உள்ளார். இந்த வெப் தொடரில் ஜெய்க்கு ஜோடியாக 'ஓ மை கடவுளே' படத்தில் நடித்து பிரபலமான வாணி போஜன் நடித்துள்ளார். இந்த வெப் தொடரை கார்த்திக் சுப்புராஜ் தயாரித்துள்ளார்.