முன்பதிவில் புது மைல்கல் - அமோக வரவேற்பை பெறும் பிஎம்டபிள்யூ பைக்!

பிஎம்டபிள்யூ மோட்டராட் நிறுவனம் தனது புதிய G 310 RR மாடல் இந்திய சந்தை முன்பதிவில் ஆயிரம் யூனிட்களை கடந்து இருப்பதாக அறிவித்து உள்ளது. இது பற்றிய அறிவிப்பு அந்நிறுவனத்தின் அதிகாரப்பூர்வ சமூக வலைதள பக்கங்களில் வெளியிடப்பட்டு இருக்கிறது. டிவிஎஸ் அபாச்சி RR 310 மாடலை சார்ந்து உருவாக்கப்பட்ட பிஎம்டபிள்யூ G 310 RR மாடலின் விலை ரூ. 3 லட்சத்து 85 ஆயிரம், எக்ஸ்-ஷோரூம் என துவங்குகிறது.

புதிய பிஎம்டபிள்யூ G 310 RR மாடல் - ஸ்டாண்டர்டு மற்றும் ஸ்டைல் ஸ்போர்ட் என இரண்டு வேரியண்ட்களில் கிடைக்கிறது. தோற்றத்தில் மட்டுமே இரு மாடல்களும் வித்தியாசமாக காட்சியளிக்கின்றன. ஸ்டாண்டர்டு வேரியண்ட் பிளாக் ஸ்டாம் மெட்டாலிக் நிறத்தில் கிடைக்கிறது. அதிக விலையில் கிடைக்கும் ஸ்டைல் ஸ்போர்ட் வேரியண்ட் ரேசிங் புளூ மெட்டாலிக், ரேசிங் ரெட் நிறத்தில் கிடைக்கிறது.

விலை விவரங்கள்:

பிஎம்டபிள்யூ G 310 RR ஸ்டாண்டர்டு ரூ. 3 லட்சத்து 85 ஆயிரம்

பிஎம்டபிள்யூ G 310 RR ஸ்டைல் ஸ்போர்ட் ரூ. 3 லட்சத்து 99 ஆயிரம்

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளன

பி.எம்.டபிள்யூ. G 310 RR மாடலில் 313சிசி சிங்கில் சிலிண்டர் லிக்விட் கூல்டு என்ஜின் வழங்கப்பட்டு உள்ளது. இந்த என்ஜின் 34 ஹெச்.பி. பவர், 27 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டு இருக்கிறது.

அம்சங்களை பொருத்தவரை முழுமையான டிஜிட்டல் இன்ஸ்ட்ரூமெண்ட் கிளஸ்டர், ஸ்பீடோமீட்டர், ஓடோமீட்டர், ட்ரிப் மீட்டர், பியூவல் லெவல், என்ஜின் டெம்பரேச்சர் மற்றும் பல்வேறு அம்சங்கள் உள்ளன. இந்த மாடலில் யு.எஸ்.டி. முன்புற ஃபோர்க்குகள், மோனோஷாக் யூனிட், இரு புறங்களிலும் டிஸ்க் பிரேக், டூயல் சேனல் ஏ.பி.எஸ். வழங்கப்பட்டு இருக்கிறது.