மும்பை:
2018-ம் ஆண்டுக்கான ஆசிய விளையாட்டு போட்டிகள் வருகிற ஆகஸ்ட் 18-ம் தேதி முதல் செப்டம்பர் 2-ம் தேதி வரை இந்தோனேசியா தலைநகர் ஜகார்த்தாவில் நடைபெறுகிறது. இதில் 40 விதமான விளையாட்டுகளை சேர்ந்த 462 போட்டிகள் நடைபெற உள்ளன.
இந்த தொடரில் இந்திய அணி தடகளம், ஹாக்கி, குத்துச்சண்டை, மல்யுத்தம், வில் வித்தை, டேபிள் டென்னிஸ் உள்ளிட்ட போட்டிகளில் கலந்துகொள்ள இருக்கிறது.
இந்நிலையில், ஆசிய விளையாட்டு போட்டிகளில் இந்திய கால்பந்து அணியை விளையாட அனுமதிக்க வேண்டும் என இந்திய அணியின் பயிற்சியாளர் ஸ்டீபன் கான்ஸ்டண்டைன் கோரிக்கை விடுத்துள்ளார். இதுகுறித்து அவர் கூறியதாவது:-
எங்களுக்கு நிறைய போட்டிகள் தேவைப்படுகிறது. ஒருவேளை அரசு கவனித்தால் எங்களை ஆசிய விளையாட்டு போட்டிகளுக்கு அனுப்பி வையுங்கள். அது 23 வயதிற்குட்பட்டோருக்கான போட்டி. நமது அணியில் 23 வயதிற்குட்பட்டவர்கள் 11 பேர் உள்ளனர். அந்த வீரர்கள் மூலம் ஆசிய விளையாட்டு போட்டிகளில் நாம் அதிக பலன்கள் பெறலாம்.
போட்டியை காண வாருங்கள் என மக்களிடம் நாம் பிச்சை எடுப்பது போல் கேட்க கூடாது. இன்று (திங்கள்கிழமை) கிடைத்த வரவேற்பு நான் எதிர்பார்த்தைவிட மிகவும் அதிகம். அனைவருக்கும் தனிப்பட்ட முறையில் நன்றி தெரிவித்து கொள்கிறேன். அடுத்த இரண்டு போட்டிகளுக்கும் அதே ஆதரவு இருக்கும் என நம்புகிறேன்.
இவ்வாறு ஸ்டீபன் கான்ஸ்டண்டைன் கூறியுள்ளார். #WeAreIndia #BackTheBlue #StephenConstantine #IndiaFootball
