நீங்கள் தேடியது "உள்ளுர் பொருட்கள்"

மதுரை

மதுரை ரெயில்வே கோட்டத்தில் ‘ஒரு நிலையம்: ஒரு பொருள்’ திட்டத்தின் கீழ் உள்ளூர் பாரம்பரிய பொருட்கள் விற்பனை செய்யப்பட்டு வருகின்றன.  மதுரை, நெல்லை ரெயில் நிலையங்களில் முறையே சுங்குடி சேலை, பனை பொருட்கள்   விற்க அனுமதி வழங்கப்பட்டுள்ளது.

இந்த திட்டத்தை மேலும் விரிவுபடுத்துவது என்று அதிகாரிகள் முடிவு செய்தனர். அதன்படி திண்டுக்கல் ரெயில் நிலையத்தில் சின்னாளப்பட்டி கைத்தறி சேலைகள், தூத்துக்குடி-வாஞ்சி மணியாச்சியில் மக்ரூன், ராமேசுவரத்தில் கடல் பாசி, கோவில்பட்டியில் கடலை மிட்டாய், விருதுநகர்- சாத்தூரில் காராச்சேவு, தென்காசி- செங்கோட்டையில் மூங்கில் பொருட்கள், ராமநாதபுரத்தில் கருவாடு, திருச்செந்தூரில் பனை பொருட்கள், காரைக்குடியில் ஆத்தங்குடி டைல்ஸ், பழனியில் பஞ்சாமிர்தம், பரமக்குடியில் மிளகாய் வத்தல், ராஜபாளையத்தில் ஆயத்த ஆடைகள், சங்கரன்கோவிலில் மாம்பழம் உள்ளிட்ட விவசாய பொருட்கள், சிவகாசியில் டைரிகள், நோட்டு புத்தகங்கள், மானாமதுரையில் மண்பாண்ட பொருட்கள், புதுக்கோட்டையில் பலாப்பழம், சிவகங்கையில் செட்டிநாடு கொட்டான், ஸ்ரீவில்லிபுத்தூரில் பால்கோவா, கொடைக்கா னல் ரோட்டில் பன்னீர் திராட்சை, திருமங்கலத்தில் கைலிகள், ஒட்டன்சத்திரத்தில் வெண்ணை, அம்பாசமு த்திரத்தில் பத்தமடை கோரைபாய், மணப்பாறையில் முறுக்கு, புனலூரில் மிளகு, கொட்டாரகராவில் முந்திரி ஆகியவற்றை விற்பதற்கான ஸ்டால்கள் அமைக்க விருப்ப மனு கோரப்பட்டு உள்ளது. 

இதற்கான மனுவை www.sr.indianrailways.gov.in  இணையதளத்தில் தரவிறக்கம் செய்யலாம். பூர்த்தி செய்யப்பட்ட விருப்ப மனுக்களை வருகிற 5-ந் தேதி மாலை 3 மணி வரை மதுரை கோட்ட அலுவலகத்தில் நேரடியாக சமர்ப்பிக்கலாம்.  srdcm@mdu.railnet.gov.in என்ற இணையதள முகவரிக்கும் அனுப்பலாம்.

ரெயில் நிலையங்களில் உள்ளூர் பொருட்களை  விற்க 15 நாட்களுக்கு எந்த கட்டணமும் இல்லை.   பதிவு பெற்ற சுய உதவி குழுக்கள் மற்றும் அரசு அனுமதியுடன் பொருட்கள் தயாரிக்கும் அனைவரும் இதில் கலந்து கொள்ளலாம். மேலும் விவரங்களுக்கு 9003862967 என்ற அலைபேசி எண்ணில் தொடர்பு கொள்ளலாம்.

மேற்கண்ட தகவலை மதுரை கோட்ட ரெயில்வே செய்தித் தொடர்பு அலுவலகம் தெரிவித்து உள்ளது.