வீடுகள் உள்ளிட்ட பல்வேறு கட்டமைப்புகள் அனைத்திலும் தக்க இணைப்புகள் மற்றும் ஒயர்கள் மூலம் மின்சார பயன்பாடு இருந்து வருகிறது. அவற்றில் சிக்கனம் மற்றும் பாதுகாப்பு நடவடிக்கைகள், பொதுவாக அனைத்து இடங்களிலும் நடைமுறையில் உள்ளன. இருப்பினும், வெவ்வேறு காரணங்களின் அடிப்படையில் வீடுகளில் உள்ள மின் சாதனங்களில் இணைப்பு பழுது ஏற்பட்டு மின்சார அதிர்ச்சிக்கு பலரும் உள்ளாகும் சம்பவங்கள் பல இடங்களில் நடந்து விடுகின்றன.
எச்சரிக்கை குறிப்புகள் மின்சாரம் மூலம் இயங்கும் வீட்டு உபயோக பொருட்களில் பாதுகாப்பு அம்சங்கள் இருப்பினும், பாதிப்புகளை தவிர்க்க அவற்றில் எந்த விதங்களில் பழுது ஏற்படலாம் என்பதை அறிந்து கொண்டு எச்சரிக்கையாக செயல்பட மின்பொறியியல் வல்லுனர்கள் மற்றும் எலக்ட்ரிஷியன்கள் ஆகியோர் அளிக்கும் குறிப்புகளை இங்கே காணலாம்.
மூன்று விதங்கள் பொதுவாக, மின்சாரம் சம்பந்தப்பட்ட பழுதுகள் மூன்று விதங்களாக உள்ளன. அதாவது, ஒப்பன் சர்க்கியூட் பால்ட் (Open Circuit Fault), சார்ட் சர்க்கியூட் பால்ட் (Short Circuit Fault) மற்றும் எர்த் அல்லது லீக்கேஜ் பால்ட் (Earth fault and Leakage Fault) ஆகியயனவாகும்.
மின் சுற்றில் தடை (Open Circuit Fault) மின் கடத்தா பொருட்கள் மூலம் தக்க பாதுகாப்பு உறைகள் கொண்டு மூடப்பட்ட ஒயர்கள் மூலம் மின்சாரம் வீடுகளுக்குள் பயன்படுத்தப்படுகிறது. அந்த ஒயர்கள் ஏதாவது காரணங்களால் பாதிக்கப்படும்போது மின் பாதையில் தடை ஏற்பட்டு, மேற்கொண்டு மின்சாரம் செல்வதில்லை. சம்பந்தப்பட்ட உபகரணங்களை இணைக்கும் ஒயர்கள் துண்டிக்கப்படுவது, எரிந்து விடுவது, துரு போன்ற காரணங்களால் பாதிக்கப்படுவது அல்லது தளர்வான இணைப்பு ஆகியவற்றால் மின் சுற்றில் தடை ஏற்படலாம்.
குறை மின்னழுத்த பாதிப்பு (Short Circuit Fault) இரண்டு புள்ளிகளுக்கு இடையில் தேவையான அளவை விடவும் குறைவான அழுத்தத்தில் அல்லது கூடுதலான அழுத்தத்தில் மின்சாரம் செல்லும்போது, அதற்கான பியூஸ் இணைப்பு எரிந்து, மின்சார இணைப்பு தடுக்கப்படுகிறது. பொதுவாக, தளர்வான இணைப்புகள் மற்றும் பாதுகாப்பு அம்சங்களில் பாதிப்பு ஆகியவற்றால் குறை மின்னழுத்த பாதிப்பு ஏற்படுத்துகிறது.
தரை இணைப்பு மற்றும் மின்கசிவு பொதுவாக, கிரைண்டர் போன்ற சாதனங்களுக்கு ‘எர்த்திங்’ எனப்படும் தரை இணைப்பு அவசியமானது. அவ்வாறு தரை இணைப்பு கொடுக்கப்படாத சமயங்களில் பியூஸ் இணைப்பில் பாதிப்பு உண்டாகும்போது மின் சாதனங்கள் மின் அதிர்ச்சியை ஏற்படுத்துகின்றன. மின் சாதனங்களில் உள்ள ஒயர் இணைப்புகள் பாதிக்கப்பட்டு, தொடர்ச்சியான மின்னோட்டம் காரணமாக அதை தொடுபவர்களுக்கு மின் அதிர்ச்சி ஏற்படுகிறது.
