நீங்கள் தேடியது "Abhilash"

நாயகன் அபிலாஷ் தனது நண்பர்களுடன் இணைந்து கிரிக்கெட் விளையாடுவதையே பொழுதுபோக்காக வைத்துள்ளார். கிரிக்கெட் என்றால் போதும் அனைவரும் ஒன்றுகூடும் அளவுக்கு விளையாட்டு மீது பற்றாக இருக்கிறார்கள். அதே ஊரில் டீ கடை வைத்திருக்கும் ஒருவர், கபடி விளையாட்டின் பெருமையை சொல்லி கபடி விளையாட சொல்கிறார். ஆனால் அவரது பேச்சை அவர்கள் கேட்பதாக இல்லை.

இந்த நிலையில், அவர்கள் கிரிக்கெட் விளையாடும் இடத்திற்கு சொந்தக்காரர், தான் வாங்கிய கடனை திருப்பி செலுத்த முடியாமல், அந்த இடத்தை கடன் வாங்கியவரிடமே கொடுத்து விடுகிறார்.

இதையடுத்து கிரிக்கெட் விளையாட இடமில்லாமல் தவிக்கும் அந்த ஊர் இளைஞர்கள், அந்த இடத்தை வாங்கியவரிடம் சென்று அந்த இடத்தை தரும்படி கேட்கின்றனர். தனக்கு வர வேண்டிய கடன் தொகையை குறிப்பிட்ட தேதிக்குள் கொடுத்துவிட்டு அந்த இடத்தை வாங்கி செல்லும்படி அவர் சொல்ல, அதற்காக பணம் சேர்க்க ஆரம்பிக்கின்றனர். இதற்கிடையே தனது ஊருக்கு வரும் நாயகி லீமா பாபு மீது அபிலாஷுக்கு காதல் வருகிறது.

நாயகன் அபிலாஷின் தந்தை சொந்த வீட்டை அடமானம் வைத்து பணம் கொடுக்கிறார். அதேபோல் ஊர் மக்களிடமும் பணம் வசூலிக்க, அவர்களுக்கு தேவையான காசு ஓரளவுக்கு சேர்த்து விடுகிறது. மீதி காசை சேர்க்க வழி தெரியாமல் தவிக்க, டீ கடைக்காரர் அவர்களை கபடி விளையாடி வென்றால் பரிசுத் தொகை கிடைக்கும் என்று சொல்கிறார்.

அவர்களுக்கும் அது சரியாக பட கபடி விளையாடுவதற்கு தயாராகிறார்கள். அந்த டீக்கடைகாரர் அவர்களுக்கு கபடி பயிற்சி அளிக்கிறார். 

கடைசியில், கபடி போட்டியில் வென்று பரிசை வென்றார்களா? கிரிக்கெட் விளையாடும் இடத்தை திரும்பப் பெற்றார்களா? கபடி விளையாட்டின் அருமை புரிந்ததா? அதன் பின்னணியில் என்ன நடந்தது? என்பதே படத்தின் மீதிக்கதை.

அபிலாஷ் கல்லூரி இளைஞராக, கிரிக்கெட், கபடி விளையாட்டு வீரராக போதுமான நடிப்பை கொடுத்திருக்கிறார். எனினும் நடிப்பில் இன்னமும் கொஞ்சம் கவனம் செலுத்த வேண்டும். லீமா பாபுவுக்கு பெரிய கதாபாத்திரம் இல்லை என்றாலும் வரும் காட்சிகளில் சிறப்பாக நடித்திருக்கிறார். படத்தில் வரும் மற்ற கதாபாத்திரங்களும் கதைக்கு தேவையான நடிப்பை வெளிப்படுத்தியிருக்கின்றனர்.

முதலாவதாக கபடியின் மகத்துவத்தை சொல்ல முயற்சித்திருக்கும் இயக்குநர் பி.ஐயப்பனுக்கு பாராட்டுக்கள். கிரிக்கெட்டையே பெரிதாக நினைக்கும் இளைஞர்களுக்கு தமிழனின் விளையாட்டான கபடியின் முக்கியத்துவத்தை புரிய வைக்கிறார். எனினும் படத்தின் திரைக்கதையும், கதாபாத்திரங்களும் ஒன்றவில்லையோ என்றும் யோசிக்க வைக்கிறார்.

சி.ஜே.ரோஷன் ஜோசப்பின் இசையில் பாடல்கள் சுமார் ரகம் தான். வெங்கடேஷின் ஒளிப்பதிவு சிறப்பாக வந்திருக்கிறது.

மொத்தத்தில் `தோனி கபடிகுழு' வளர வேண்டும். #DhoniKabbadiKuzhuReview #Abhilash #LeemaBabu

கிரிக்கெட்டையும் கபடியையும் இணைத்து உருவாகி உள்ள தோனி கபடி குழு என்ற படத்தின் இசை வெளியீட்டு நிகழ்ச்சி தனியார் திரையரங்கில் நடைபெற்றது. அபிலாஷ், லீமா, தெனாலி, சரண்யா உள்பட பலர் நடித்து ஐயப்பன் இயக்கி இருக்கும் இந்த படத்தின் இசை வெளியீட்டு நிகழ்ச்சியில் நடிகர் ஆரி பேசியதாவது:-

நம் பாரம்பரிய விளையாட்டை முதன்மைப்படுத்தி எடுத்திருக்கும் இப்படத்தைச் சார்ந்த அனைவருக்கும் எனது பாராட்டுக்கள். சென்னைக்கு ஒன்று நேர்ந்தால் மட்டும்தான் அனைவரும் குரல் கொடுக்கின்றனர். எங்கு எங்கு இருந்தோ நிவாரண உதவிகள் குவிகின்றன.

ஆனால் சென்னையைத் தாண்டி மற்ற இடங்களில் ஏதாவது நேர்ந்தால் அதை யாரும் கண்டு கொள்வதில்லை. அப்படி உதவி சென்று சேர்ந்திருந்தால் இன்று கஜா புயலால் விவசாயிகள் தற்கொலை செய்துக் கொண்டிருக்கமாட்டார்கள்.

அரசியல்வாதிகள் அவர்கள் கடமையைச் சரியாக செய்தாலே நடிகர்களுக்கு வேலை இருக்காது.

சினிமாவை வாழவைக்க வேண்டும். திரையரங்கத்தில் ஆன்லைன் பதிவுக்கு வசூலிக்கும் கட்டணத்தைக் குறைக்க வேண்டும். சிறிய படங்களுக்கு மாலை மற்றும் இரவு காட்சிகளை அதிகப்படுத்த வேண்டும்.

இவ்வாறு அவர் பேசினார். #DhoniKabadiKulu #Aari

திரைப்படம் மற்றும் விளையாட்டு போட்டிகளை கண்டுகளிக்கும் போது தான் மக்கள் மிகப்பெரிய அளவில் ஒருவருக்கு ஒருவர் நெருக்கமாகிறார்கள். பல திரைப்படங்கள் தமிழில் விளையாட்டை மையமாக வைத்து வந்துள்ளது. அந்த வரிசையில் `தோனி கபடி குழு' இணைந்துள்ளது. 

`மைடியர் பூதம்' தொடரில் நடித்த அபிலாஷ் இந்த படத்தில் கதாநாயகனாக நடிக்கிறார். இவர் ஏற்கனவே `நாகேஷ் திரையரங்கம்' படத்தில் வில்லனாக நடித்துள்ளார். `தோனி கபடி குழு' என்ற தலைப்பே கதையை உணர்த்துகிறது. நல்ல கதை தான் எப்போதும் கதாநாயகன். அதன்படி இப்படத்தின் கதை கபடி மற்றும் கிரிக்கெட் என்று இரண்டு கதாநாயகர்களின் இடையே நடைபெறுகிறது என்றார் நாயகன் அபிலாஷ். என்னை தவிர்த்து படத்தில் 8-கதாபாத்திரங்கள் உள்ளன. இயக்குனர் ஏ.வெங்கடேஷின் துணை இயக்குனரான பி.ஐயப்பன் இந்த படத்தை இயக்குகிறார்.  

   

படத்தை பற்றி இயக்குனர் கூறியதாவது,

இந்த கதை முழுவதும் கற்பனையானது. அதில் என்னுடைய வாழ்க்கையையும் நான் சேர்த்துள்ளேன். நான் சிறு வயதிலிருந்து கபடி விளையாடி தான் வளர்ந்தேன். பள்ளியில் கபடி சாம்பியன். அப்போது என்னுடைய நண்பர்கள் கிரிக்கெட் விளையாடும் போது எனக்கு பிடிக்காது. அதன் பிறகு கிரிக்கெட் என்னை மிகவும் ஈர்த்தது. தோனி கபடி குழுவில் சமூக கருத்தும் உள்ளது என்றார். நடிகர்களை தாண்டி படத்தில் நிஜ வாழ்கையில் கபடி விளையாட்டு வீரர்களாக வரும் சிலரும் நடிக்கிறார்கள். `பட்டம் போலே' படத்தில் துல்கருடன் நடித்த லீமா இப்படத்தில் நடிக்கிறார்.

மேலும் படத்தில் தெனாலி, சரண்யா, செந்தில், புகழ், விஜித், சி.என்.பிரபாகரன், ரிஷி, நவீன் சங்கர், சுஜின், பீட்டர் உள்ளிட்டோர் நடிக்கிறார்கள். கதை, திரைக்கதை மற்றும் வசனத்தை ஐயப்பன் எழுதியுள்ளார். ரோஷன் ஜோசப் இசையமைக்க, வெங்கடேஷ் ஒளிப்பதிவு பணிகளை மேற்கொள்கிறார். இந்த படத்தின் படப்பிடிப்பு விழுப்புரம், கள்ளக்குறிச்சி ஆகிய பகுதிகளில் 40 நாட்கள் தொடர்ந்து நடைபெற உள்ளது. படம் வருகிற ஆகஸ்ட் அல்லது செப்டம்பரில் வெளியாகவுள்ளது. நந்தகுமார் இப்படத்தை தயாரிக்கிறார். வருகிற  7-ம் தேதி இந்தியன் கிரிக்கெட் கேப்டன் தோனியின் பிறந்த நாளன்று படத்தின் டைட்டில் லோகோ வெளியிடப்படுகிறது. #DhoniKabbadiKuzhu