இந்துசமய அறநிலைய கோவில்களில் ஆடி அமாவாசை, ஆடிபூரம் நாட்களில் வழிபாட்டுக்கு தடை

சென்னை:

தமிழகத்தில் கொரோனா பரவலை கட்டுப்படுத்துவதற்காக தமிழக அரசு பல்வேறு நடவடிக்கைகளை மேற்கொண்டு வருகிறது.

தற்போது கொரோனா 2-வது அலை தணிந்து வரும் நிலையில் ஊரடங்கு கட்டுப்பாடுகள் 23-ந் தேதி வரை அமலில் இருக்கும் என்று அறிவிக்கப்பட்டுள்ளது.

அனைத்து மத வழிபாட்டுத்தலங்களிலும் வெள்ளி, சனி, ஞாயிற்றுக்கிழமைகளில் தரிசனத்துக்கு தடை விதிக்கப்பட்டுள்ளது. இதைத் தொடர்ந்து பள்ளி, கல்லூரிகளை திறப்பதற்கான ஏற்பாடுகள் செய்யப்பட்டு வருகின்றன.

இந்தநிலையில் கொரோனா 3-வது அலை அச்சுறுத்தலும் நிலவியபடி இருக்கிறது. 3-வது அலையை எதிர்கொள்ள 13 பேர் கொண்ட செயல் திட்டக்குழுவை

தமிழக அரசு அமைத்து உள்ளது.

இந்தநிலையில் நாளை ஆடி அமாவாசைக்கான வழிபாடுகள் தமிழகம் முழுவதும் நடைபெற உள்ளன. கடலோர பகுதிகளிலும், ஆலயங்கள் அருகில் உள்ள நீர்நிலை பகுதிகளிலும் மறைந்த முன்னோர்களுக்கு தர்ப்பணம் கொடுப்பது பெரிய அளவில் நடைபெறும்.

இதேபோன்று வருகிற 11-ந் தேதி ஆடிப்பூரம் வருகிறது. அன்றைய தினம் அம்மன் கோவில்களில் பக்தர்கள் கூட்டம் அதிக அளவில் திரள வாய்ப்பு உள்ளது.

கொரோனா பரவல் அச்சுறுத்தலை கருத்தில் கொண்டு ஆடி அமாவாசை மற்றும் ஆடிப்பூரம் நிகழ்ச்சிகளுக்கு பக்தர்கள் அதிக அளவில் திரள்வதை தவிர்க்க தமிழக அரசு நடவடிக்கை எடுத்துள்ளது.

தமிழக முதல்-அமைச்சர் மு.க.ஸ்டாலின் வழிகாட்டுதலின்படி இந்து சமய அறநிலையத்துறைக்கு சொந்தமான கோவில்களில் வருகிற 8-ந் தேதி (ஞாயிற்றுக்கிழமை) ஆடி அமாவாசை மற்றும் 11-ந் தேதி (புதன்கிழமை) ஆடிப்பூரம் ஆகிய நாட்களில் பக்தர்கள் வழிபாட்டிற்கு தடை விதிக்கப்படுகிறது.