என் மலர்
உலகம்
இஸ்ரேல்-ஹமாஸ் போர் லைவ் அப்டேட்ஸ்: காசாவில் உள்ள ஹமாஸ் தலைவரை கண்டுபிடித்து ஒழிப்போம்: இஸ்ரேல்
- இஸ்ரேல் படைகள் காசாவில் ஹமாஸ் அமைப்பினருடன் சண்டையிட்டு வருகின்றன.
- ஹமாஸ் காசா தலைவரை கண்டுபிடித்து ஒழித்துக் கட்டுவோம் என்று இஸ்ரேல் தெரிவித்தது.
இஸ்ரேல் மீது ஹமாஸ் பயங்கரவாதிகள் கடந்த 7-ம் தேதி திடீரென தாக்குதல் நடத்தினர். அத்துடன் பலர் பிணைக்கைதிகளாக பிடிக்கப்பட்டுள்ளனர். இதற்கு இஸ்ரேல் காசா மீது ஏவுகணைகளை வீசி பதிலடி கொடுத்து வருகிறது. இதனால் இரு பக்கமும் உயிர்ச்சேதம் ஏற்பட்டுள்ளது.
இருதரப்பிலும் உயிரிழந்தோர் எண்ணிக்கை 10 ஆயிரத்தைக் கடந்துள்ளது.
இந்நிலையில், இஸ்ரேல் பாதுகாப்பு மந்திரி யோவ் கேலன்ட் கடந்த இரு தினங்களில் வடக்கு எல்லை மற்றும் தெற்கில் சுற்றுப்பயணம் செய்தார்.
அதன்பின், செய்தியாளர்களிடம் பேசிய அவர், இஸ்ரேலியப் படைகள் காசாவில் ஹமாஸ் பயங்கரவாதிகளுடன் கடும் சண்டையில் ஈடுபட்டுள்ளன. ஹமாஸ் காசா தலைவரை கண்டுபிடித்து ஒழித்துக் கட்டுவோம் என்று தெரிவித்தார்.
Live Updates
- 16 Oct 2023 8:56 AM IST
போர் தொடங்கியதில் இருந்து இதுவரை மொத்தம் 330 பாலஸ்தீனியர்கள் கைது செய்யப்பட்டுள்ளதாக இஸ்ரேல் பாதுகாப்புப் படை தெரிவித்துள்ளது. அவர்களில் 190 பேர் ஹமாஸ் படையினருடன் தொடர்புடையவர்கள் என்று தெரிவிக்கப்பட்டுள்ளது.
- 16 Oct 2023 8:09 AM IST
பிரதமர் பெஞ்சமின் நேதன்யாகு, இஸ்ரேலின் டெல் அவிவ் நகரில் ஹமாஸ் தாக்குதலில் மாயமானோர் மற்றும் ஹமாஸ் அமைப்பினரால் சிறைபிடிக்கப்பட்டோரின் குடும்பத்தினரை நேரில் சந்தித்து, ஆறுதல் கூறினார்.
- 16 Oct 2023 7:03 AM IST
ஐக்கிய நாடுகள் சபை பொதுச் செயலாளர் அன் டோனியோ குட்டரெஸ் எக்ஸ் தளத்தில் பதிவிட்டுள்ள செய்தியில், எவ்வித நிபந்தனை இன்றி ஹமாஸ் அமைப்பினர் பிணைக்கைதிகளை விடுவிக்க வேண்டும், காசாவில் உள்ள மக்களுக்கு தேவையான மனிதாபிமான உதவிகள் விரைவில் கிடைக்க இஸ்ரேல் அனுமதி வழங்கவேண்டும் என வேண்டுகோள் விடுத்துள்ளார்.
- 16 Oct 2023 6:23 AM IST
இஸ்ரேல்-ஹமாஸ் அமைப்பு இடையே நடந்து வரும் போரில் தாய்லாந்து நாட்டைச் சேர்ந்த மேலும் 4 பேர் உயிரிழந்ததாக தகவல் வெளியானது. இதன் மூலம் போரில் கொல்லப்பட்ட தாய்லாந்து நாட்டவர்களின் எண்ணிக்கை 28 ஆக உயர்ந்துள்ளது.
- 16 Oct 2023 2:21 AM IST
காசா பகுதிக்கு குடிநீர் விநியோகம் செய்ய இஸ்ரேல் ஒப்புதல் அளித்துள்ளதாக தகவல் தெரிவிக்கப்பட்டுள்ளது. அமெரிக்கா-இஸ்ரேல் இடையே நடந்த பேச்சுவார்த்தையில் இஸ்ரேல் பிரதமர் இந்த முடிவு எடுத்துள்ளதாக தெரிவிக்கப்பட்டுள்ளது.
- 15 Oct 2023 9:04 PM IST
தெற்கு காசாவில் சில பகுதிகளுக்கு மீண்டும் தண்ணீர் விநியோகம் செய்ய முடிவு செய்யப்பட்டுள்ளதாக இஸ்ரேலின் எரிசக்தித் துறை அமைச்சர் தெரிவித்துள்ளார்.
- 15 Oct 2023 6:29 PM IST
இஸ்ரேலின் டெல் அவிவ் நகரில் ராக்கெட் தாக்குதல் குறித்து சைரன் ஒலிக்கப்பட்டு எச்சரிக்கை விடுக்கப்பட்டுள்ளது
- 15 Oct 2023 1:55 PM IST
வடகாசாவில் வசிக்கும் மக்களுக்கு இஸ்ரேல் ராணுவம் கடைசி எச்சரிக்கை விடுத்துள்ளது. அதன்படி, காலை 10 மணி முதல் மதியம் 1 மணி வரை வடகாசாவில் இருந்து வெளியேறும்படியும், பாதுகாப்பான பாதையில் தாக்குதல் நடத்தப்படாது எனவும் தெரிவித்துள்ளது.
- 15 Oct 2023 1:33 PM IST
இஸ்ரேல் - காசா விவகாரம் தொடர்பாக வாக்கெடுப்பு நடத்த வேண்டும் என ஐ.நா.பாதுகாப்பு கவுன்சிலுக்கு ரஷியா கோரிக்கை விடுத்துள்ளது. பொதுமக்களுக்கு எதிரான வன்முறை மற்றும் பயங்கரவாத செயல்களுக்கு ரஷ்யா கண்டனம் தெரிவித்துள்ளது.
- 15 Oct 2023 12:55 PM IST
ஹமாஸ் அமைப்பினரால் பிடித்து வைக்கப்பட்டுள்ள பிணைக்கைதிகள் பாதாள சுரங்கங்களில் வைக்கப்பட்டிருக்க அதிக வாய்ப்பு உள்ளது என இஸ்ரேல் பாதுகாப்புப் படை செய்தித் தொடர்பாளர் ஜொனாதன் தெரிவித்துள்ளார்.
