ரெட்மி நோட் 4 ஸ்பெஷல் எடிஷன் ஸ்மார்ட்போன் இந்தியாவில் அறிமுகம்

புதுடெல்லி: 

சீன ஸ்மார்ட்போன் நிறுவனமான சியோமி இந்தியாவில் 'வேக் தி லேக்' (Wake the lake) என்ற திட்டத்தின் கீழ் புதிய ஸ்பெஷல் எடிஷன் ஸ்மார்ட்போன் ஒன்றை அறிமுகம் செய்துள்ளது. லேக் புளூ எடிஷன் என அழைக்கப்படும் புதிய ஸ்பெஷல் எடிஷன் ஸ்மார்ட்போனில் கிடைக்கும் வருவாய் ஸ்வச் பாரத் அபியம் சார்ந்த திட்டங்களுக்கு வழங்கப்படும் என அறிவிக்கப்பட்டுள்ளது. 

புதிய நிறம் மட்டும் வழங்கப்பட்டுள்ள நிலையில் ஸ்மார்ட்போனின் சிறப்பம்சங்களில் எவ்வித மாற்றங்களும் மேற்கொள்ளப்படவில்லை. இந்தியாவில் சியோமி ரெட்மி நோட் 4 ஸ்மார்ட்போன் தற்சமயம் இந்தியாவில் அதிகம் விற்பனை செய்யப்படும் ஸ்மார்ட்போனாக இருக்கிறது.   

ரெட்மி நோட் 4 ஸ்மார்ட்போனின் சிறப்பம்சங்களை பொருத்த வரை 5.5 இன்ச் ஃபுல் எச்டி டிஸ்ப்ளே, 2.5D வளைந்த கிளாஸ் டிஸ்ப்ளே, குவால்காம் ஸ்னாப்டிராகன் 625 பிராசஸர், 4 ஜிபி ரேம் மற்றும் 64 ஜிபி இன்டெர்னல் மெமரி வழங்கப்பட்டுள்ளது. இத்துடன் மெமரியை கூடுதலாக நீட்டிக்கும் வசதியும் 13 எம்பி பிரைமரி கேமரா, 5 எம்பி செல்ஃபி கேமரா, ஆண்ட்ராய்டு நௌக்கட் சார்ந்த MIUI 8 இயங்குதளம் கொண்டுள்ளது. 

4100 எம்ஏஎச் பேட்டரி மூலம் சக்தியூட்டப்படும் ரெட்மி நோட் 4 கடந்த ஆறு மாதங்களில் 50 லட்சத்திற்கும் அதிகமானோர் பயன்படுத்தி வருகி்ன்றனர். இதேபோன்று IDC Q2 2017 அறிக்கையின் படி இந்திய ஸ்மார்ட்போன் வரலாற்றில் அதிகம் விநியோகம் செய்யப்பட்ட ஸ்மார்ட்போனாக ரெட்மி நோட் 4 இருப்பதாக தெரிவிக்கப்பட்டது.   

புதிய ஸ்பெஷல் எடிஷன் ரெட்மி நோட் 4 ஸ்மார்ட்போன் விலை ரூ.12,999 விலையில் விற்பனை செய்யப்படும் என்றும் முதல் பிளாஷ் விற்பனை செப்டம்பர் 4-ம் தேதி மதியம் 12.00 மணிக்கு நடைபெறுகிறது. புதிய ஸ்பெஷல் எடிஷன் ஸ்மார்ட்போன் ப்ளிப்கார்ட், Mi ஹோம் ஸ்டோர், Mi விற்பனையாளர்களிடம் விற்பனை செய்யப்படும் என அறிவிக்கப்பட்டுள்ளது.