search icon
என் மலர்tooltip icon

    தமிழ்நாடு

    கலெக்டர் பங்களாவிற்குள் சிறுத்தை புகுந்த காட்சி சி.சி.டி.வி காமிராவில் பதிவாகி இருந்ததை படத்தில் காணலாம்.
    X
    கலெக்டர் பங்களாவிற்குள் சிறுத்தை புகுந்த காட்சி சி.சி.டி.வி காமிராவில் பதிவாகி இருந்ததை படத்தில் காணலாம்.

    ஊட்டி கலெக்டர் பங்களாவிற்குள் புகுந்த சிறுத்தை- சமூக வலைதளங்களில் வைரலாகும் வீடியோ

    சம்பவத்தன்று நள்ளிரவு வனப்பகுதியில் இருந்து வெளியேறிய சிறுத்தை ஒன்று, கலெக்டர் குடியிருப்பு வளாகத்திற்குள் புகுந்து அங்குள்ள சாலையில் சர்வசாதாரணமாக சுற்றி திரிந்தது.
    ஊட்டி:

    நீலகிரி மாவட்டம் ஊட்டி மற்றும் அதனை சுற்றியுள்ள பகுதிகள் அடர்ந்த வனப்பகுதியை கொண்டது. இந்த வனப்பகுதியில் கரடி, காட்டெருமை, சிறுத்தை உள்ளிட்ட வன விலங்குகளின் வசிப்பிடமாக உள்ளது.

    அவ்வப்போது வனப்பகுதியில் இருந்து வெளியேறும் வனவிலங்குகள் குடியிருப்புகள் மற்றும் விளைநிலங்களில் அருகே உலா வருவது வழக்கம்.

    ஊட்டி பிங்கர்போஸ்ட் அடுத்த தமிழகம் ஆய்வு மாளிகை அருகே நீலகிரி மாவட்ட கலெக்டரின் குடியிருப்பு மற்றும் முகாம் அலுவலகம் உள்ளது. இங்கு தற்போது கலெக்டராக உள்ள அம்ரித் வசித்து வருகிறார்.

    இந்த பங்களாவில் நுழைவு வாயில் பகுதியில் இருந்து சாலை மற்றும் இருபுறமும் புல்வெளிகளுடன் கூடிய சிறு பூங்கா உள்ளது. சுற்றிலும் தடுப்புச்சுவர் அமைக்கப்பட்டுள்ளது.

    இந்த பங்களாவிற்கு அருகே வனப்பகுதி அமைந்துள்ளது.

    இந்த நிலையில் சம்பவத்தன்று நள்ளிரவு வனப்பகுதியில் இருந்து வெளியேறிய சிறுத்தை ஒன்று, கலெக்டர் குடியிருப்பு வளாகத்திற்குள் புகுந்து அங்குள்ள சாலையில் சர்வசாதாரணமாக சுற்றி திரிந்தது.

    கலெக்டரின் கார் பார்க்கிங் வரை சாவகாசமாக நடந்து வந்த சிறுத்தை அங்கேயே சுற்றி திரிந்ததுடன், சிறிது நேரம் அங்கு ஒய்வெடுத்தது.

    இதையடுத்து பங்களாவில் இருந்த மலர் செடிகளுக்கு நடுவே ஏறி தடுப்புசுவரை தாண்டி வெளியில் சென்று மறைந்தது.

    சிறுத்தை நடமாடிய காட்சிகள் அனைத்தும் அங்குள்ள கண்காணிப்பு கேமிராவில் பதிவாகி இருந்தது. தற்போது இந்த காட்சிகள் சமூக வலைதளங்களில் வைரலாகி வருகிறது.

    இதனை தொடர்ந்து வனத்துறையினர் அப்பகுதியில் சிறுத்தை நடமாட்டம் குறித்து கண்காணிக்கும் பணியில் ஈடுபட்டு வருகின்றனர்.

    மேலும் அந்த சிறுத்தை புலிக்கு 7 வயது இருக்கலாம் என வனத்துறையினர் தெரிவித்துள்ளனர்.
    Next Story
    ×