இந்தியா - நியூசிலாந்து டெஸ்ட் தொடர்.. முதல் போட்டிக்கு செக் வைக்க போகும் மழை..?

நியூசிலாந்து கிரிக்கெட் அணி இந்தியாவில் சுற்றுப் பயணம் மேற்கொண்டு மூன்று டெஸ்ட் போட்டிகளில் விளையாட உள்ளது. இரு அணிகள் மோதும் முதலாவது டெஸ்ட் போட்டி பெங்களுரூவில் உள்ள சின்னச்சாமி மைதானத்தில் நாளை (16ந் தேதி) தொடங்குகிறது.

இந்த நிலையில், இரு அணிகள் இடையிலான போட்டி நடைபெறும் சின்னசாமி மைதானத்தில் ஐந்து நாட்களும் மழை பெய்ய வாய்ப்பு இருப்பதாக வானிலை ஆய்வு மையம் தெரிவித்துள்ளது. முன்னதாக இந்தியா வங்கதேசம் அணிகள் மோதிய கடைசி டெஸ்ட் போட்டியின் போதும் மழை குறுக்கிட்டது குறிப்பிடத்தக்கது.

ரோகித் சர்மா தலைமையிலான இந்திய அணி வெற்றியுடன் கணக்கை தொடங்கும் ஆர்வத்தில் உள்ளது. சமீபத்தில் வங்கதேசத்துக்கு எதிரான டெஸ்ட் தொடரை இந்திய அணி 2-0 என்ற கணக்கில் கைப்பற்றியது. இதனால் நியூசிலாந்தை மிகுந்த நம்பிக்கையுடன் எதிர்கொள்ளும்.

இந்திய அணி தொடர்ச்சியாக சொந்த மண்ணில் 18 டெஸ்ட் தொடரை கைப்பற்றி முத்திரை பதித்துள்ளது. நியூசிலாந்துக்கு எதிராகவும் இது நீடிக்கும் என்று எதிர்பார்க்கப்படுகிறது.

உலக டெஸ்ட் சாம்பியன்ஷிப் புள்ளிகள் பட்டியலில் இந்தியா முதல் இடத்திலும், நியூசிலாந்து 6-வது இடத்திலும் உள்ளன. உலக டெஸ்ட் சாம்பியன்ஷிப் இறுதிப்போட்டியில் நுழைய எந்தவித சிக்கலும் இல்லாமல் இருக்க இந்த தொடரை 3-0 என்ற கணக்கில் முழுமையாக வெல்லும் வேட்கையில் இந்திய அணி இருக்கிறது.

நியூசிலாந்து அணி சமீபத்தில் இலங்கையில் 0-2 என்ற கணக்கில் டெஸ்ட் தொடரை இழந்தது. இதனால் டாம் லாதம் தலைமையிலான நியூசிலாந்து அணிக்கு இந்தியாவில் வெற்றி பெற வேண்டிய நெருக்கடியில் உள்ளது.