புதுடெல்லி:
இந்திய கிரிக்கெட் அணி இந்த ஆண்டில் (2022) விளையாடும் போட்டி விவரங்களை பி.சி.சி.ஐ. (இந்திய கிரிக்கெட் கட்டுப்பாட்டு வாரியம்) வெளியிட்டுள்ளது.
இந்திய அணி தற்போது தென் ஆப்பிரிக்காவில் விளையாடி வருகிறது. 2-வது டெஸ்ட் நாளை முதல் 7-ந் தேதி வரை ஜோகன்னஸ்பர்க்கிலும், 3-வது மற்றும் கடைசி டெஸ்ட் 11 முதல் 15 வரை கேப்டவுனிலும் நடக்கிறது.
அதன்பிறகு தென் ஆப்பிரிக்காவுடன் 3 ஒருநாள் போட்டிகளில் 19, 21 (பாரல்) மற்றும் 23 (கேப்டவுன்) ஆகிய தேதிகளில் விளையாடுகிறது.
அதைத் தொடர்ந்து இந்திய அணி வெஸ்ட் இண்டீசுடன் விளையாடுகிறது. வெஸ்ட் இண்டீஸ் அணி இந்தியா வந்து 3 ஒருநாள் போட்டி மற்றும் மூன்று 20 ஓவர் ஆட்டங்களில் விளையாடுகிறது.
ஒருநாள் போட்டிகள் பிப்ரவரி 6, 9 மற்றும் 12-ந் தேதிகளில் அகமதாபாத், ஜெய்ப்பூர், கொல்கத்தா ஆகிய நகரங்களிலும், 20 ஓவர் போட்டிகள் 15, 18 மற்றும் 20 ஆகிய தேதிகளில் கட்டாக், விசாகப்பட்டினம், திருவனந்தபுரம் ஆகிய நகரங்களிலும் நடக்கிறது.
இலங்கை அணி பிப்ரவரி முதல் மார்ச் வரை இந்தியாவில் சுற்றுப்பயணம் செய்து 2 டெஸ்ட் மற்றும் மூன்று 20 ஓவர் போட்டிகளில் விளையாடுகிறது.
முதல் டெஸ்ட் பிப்ரவரி 25 முதல் மார்ச் 1-ந் தேதி வரை பெங்களூரிலும், 2-வது டெஸ்ட் மார்ச் 5 முதல் 9- ந் தேதி வரை மொகாலியிலும் நடக்கிறது.
20 ஓவர் போட்டிகள் மொகாலி, தர்மசாலா, லக்னோ ஆகிய நகரங்களில் முறையே மார்ச் 13, 15 மற்றும் 18 ஆகிய தேதிகளில் நடக்கிறது.
ஏப்ரல், மே மாதங்களில் சர்வதேச போட்டிகள் கிடையாது. ஐ.பி.எல். போட்டி நடைபெறுவதால் இந்திய அணி சர்வதேச போட்டியில் ஆடவில்லை.
ஜூன் மாதம் தென் ஆப்பிரிக்க அணி இந்தியா வந்து ஐந்து 20 ஓவர் ஆட்டத்தில் விளையாடுகிறது. முதல் போட்டி ஜூன் 9-ந் தேதி சென்னை சேப்பாக்கம் எம்.ஏ.சிதம்பரம் மைதானத்தில் நடைபெறுகிறது.
அதைத் தொடர்ந்து ஜூன் 12, 14, 17 மற்றும் 19 ஆகிய தேதிகளில் பெங்களூர், நாக்பூர், ராஜ்கோட், டெல்லி ஆகிய நகரங்களில் 20 ஓவர் போட்டிகள் நடக்கிறது.
ஜூன் கடைசி வாரத்தில் இந்திய அணி இங்கிலாந்து செல்கிறது. கடந்த சுற்றுப் பயணத்தின்போது ஒத்திவைக்கப்பட்ட 5-வது டெஸ்ட் ஜூலை 1 முதல் 5-ந் தேதி வரை மான்செஸ்டரில் நடக்கிறது.
அதைத் தொடர்ந்து மூன்று 20 ஓவர் போட்டிகள் ஜூலை 7, 9 மற்றும் 10 (சவுத்தம்டன், பிர்மிங்காம், நாட்டிங்காம்) ஆகிய தேதிகளிலும், ஒருநாள் போட்டிகள் 12, 14 மற்றும் 17 ஆகிய தேதிகளிலும் (லண்டன், மான்செஸ்டர்) நடக்கிறது.
பின்னர் இந்திய அணி வெஸ்ட் இண்டீஸ் செல்கிறது. அதைத் தொடர்ந்து ஆசிய கோப்பையில் விளையாடுகிறது. இதற்கான தேதி விவரம் இன்னும் முடிவு செய்யப்படவில்லை.
அக்டோபர் 16-ந் தேதி முதல் நவம்பர் 13-ந் தேதி வரை ஆஸ்திரேலியாவில் நடைபெற உள்ள 20 ஓவர் உலக கோப்பை போட்டியில் இந்திய அணி பங்கேற்கிறது. அதற்கு பிறகு வங்காளதேசத்துக்கு செல்கிறது. இதற்கான தேதி இன்னும் முடிவாகவில்லை.
