துபாய்:
நடப்பாண்டின் ஐபிஎல் தொடரின் இரண்டாவது பகுதி தற்போது விறுவிறுப்பாக நடந்து வருகிறது. இந்நிலையில் அதில் பங்கெடுத்துள்ள ஒரு வீரர், இந்த ஆண்டு ஒலிம்பிக் போட்டியில் தடகளப் பிரிவில் இந்தியாவுக்காக தங்கம் வென்ற நீரஜ் சோப்ராவைப் போலவே இருக்கிறார் என்று நெட்டிசன்கள் பொங்கி வருகின்றனர்.
ஐபிஎல் 2021-ன் 32வது போட்டி பஞ்சாப் கிங்ஸ் அணிக்கும் ராஜஸ்தான் ராயல்ஸ் அணிக்கும் இடையில் நடந்தது. இந்தப் போட்டியில் முதலில் பேட்டிங் செய்த ராஜஸ்தான் அணி, 185 ரன்கள் அடித்தது.
இதைத் தொடர்ந்து அதிரடி ரன் குவிப்பில் ஈடுபட்ட பஞ்சாப் அணி, கண்டிப்பாக வெற்றிவாகை சூடும் என்று எதிர்பார்க்கப்பட்டது. ஆனால், கடைசி ஓவரை வீச வந்த ராஜஸ்தானின் கார்த்திக் தியாகி, வரலாற்றை மாற்றி எழுதினார். கடைசி ஓவரில் பஞ்சாப், 4 ரன்கள் எடுத்தால் வெற்றி என்ற நிலை இருந்தது. ஆனால் கார்த்திக், 2 ரன்கள் வித்தியாசத்தில் ராஜஸ்தான் அணியை வெற்றிபெற வைத்தார். அவருக்கு ஆட்டநாயகன் விருதும் வழங்கப்பட்டது.
கார்த்திக், தன் அசத்தலான பந்துவீச்சின் மூலம் ஒரே நாளில் உலக புகழ் பெற்றார். இது ஒரு பக்கம் இருக்க, சில நெட்டிசன்கள் கார்த்திக்கும் நீரஜ் சோப்ராவும் பார்ப்பதற்கு ஒரே மாதிரி இருக்கிறார்கள் என்று சொல்லி, இருவருடைய புகைப்படங்களையும் பகிர்ந்துள்ளனர். இதை பலரும் ஆமோதித்து வருகிறார்கள்.
