ஆஸ்திரேலியா - இந்தியா இடையிலான 2-வது டெஸ்ட் மெல்போர்ன் மைதானத்தில்
பாக்சிங் டே போட்டியாக நடக்கிறது. அடிலெய்டில் 36 ரன்னில் இந்தியா சுருண்டதால், இந்திய பேட்ஸ்மேன்கள் என்னத்த சாதிக்கப்போகிறார்கள் என்று ரசிகர்கள் விரக்தியடைந்தனர். விமர்சகர்களும் அப்படித்தான் எண்ணினார்கள்.
ஆனால் டாஸ் வென்று முதலில் பேட்டிங் செய்த ஆஸ்திரேலியாவை இந்தியா 195 ரன்னில் சுருட்டியது. அதன்பின் முதல் இன்னிங்சில்
ரஹானே அபாரமாக விளையாடி சதம் அடித்தார். ஜடேஜா அரைசதமும், ஷுப்மன் கில் 45 ரன்களும் விளாச இந்தியா 326 ரன்கள் அடித்தது.
டெஸ்ட் போட்டியில் ரஹானேயின் 12-வது சதம் இதுவாகும். இதற்கு முன் ரஹானே சதம் கண்ட 11 போட்டிகளிலும் இந்தியா தோல்வியை சந்தித்தது கிடையாது. 8 டெஸ்ட் போட்டிகளில் இந்தியா வெற்றி பெற்றுள்ளது. 3 போட்டிகளில் டிரா கண்டுள்ளது.
இந்த போட்டியிலும் இந்தியா வெற்றி பெற பிரகாசமான வாய்ப்பு உள்ளது. இதனால் ரஹானேயின் செஞ்சூரி சென்டிமென்ட் தொடர்கிறது.
